Zacarías 6

Chusku carrëtakunata revelacionchö rikanqan

1Tsaypitanam yapay juk mas revelacionta rikarqä. Tsaychömi ishkay jirkakuna chawpinpita chusku carrëtakuna yarqayämuqta rikaykurqä. Tsay jirkakunaqa broncipitam kayarqan. 2Punta yarqamuq carrëtatam puka bestiakuna qarachäyarqan. Tsaypa qepanta yarqamuq carrëtatam yana bestiakuna qarachäyarqan. 3Tsaypa qepanta yarqamuq carrëtatam yuraq bestiakuna qarachäyarqan. Ultimu yarqamuq carrëtatanam bäyu bestiakuna qarachäyarqan.#Zac. 1.8; Apoc. 6.2-5.

4Tsaykunata rikarmi parlapaykämaq angelta tapurqä: <<Taytay, rikätsimanqayki ¿imaninantan?>>

5Ángel nimarqan: <<Tsaykunam kayan kay patsata kamaq Dios Yayapa puntanpita chuskun lädupa aywaq wayrakuna.#Apoc. 7.1. 6Yana bestiakunam norti kaqläpa carrëtata qarachaykäyan. Yuraq bestiakunam rupay jeqanan kaqläpa carrëtata qarachaykäyan. Bäyu bestiakunam sur kaqläpa carrëtata qarachaykäyan>>.

7Tsay bestiakuna manaraq aywarmi entëru kay patsapa cörriyta munar jiruriykachaykäyarqan. Tsay bestiakunatam ángel nirqan: <<Entëru patsata tumayämuy>>.

Tsaymi paykunaqa entëru patsata tumayämurqan.

8Tsaypitanam ángel qayaskamar nimarqan: <<¡Rikay! Norti kaqläpa aywaq bestiakunam castïgüta tsayman chätsiyashqa.#6.8 Babilonia runakunata Dios Yaya castiganqantam tsaynö nirqan. Tsaymi kananqa rabyaynï päsashqana>>.

9Tsaypitanam Dios Yaya nimarqan: 10<<Heldai, Tobías y Jedaíasmi Babiloniachö täkuyanqanpita chäyämushqa. Paykuna apayämunqan qoritawan yuraq qellayta mañakuskir tsay junaqlla ayway Sofoníaspa tsurin Josíaspa wajinman. 11Chaykurnin apanqayki yuraq qellaypita y qoripita corönata ruraskatsir shukutsinki Josadacpa tsurin mandakuq sacerdöti Josuéta.

12<<Shukurkatsir ninki: <Llapanta mandaq Dios Yayam nin: <<Renuevo ninqan runa kaychömi kaykan.#Jer. 23.5; 33.15; Zac. 3.8. Paymi templüta shäritsinqa. 13Templüta shäritsiptinmi rey kananpaq churayanqa. Trönunman jamaykur mandakuptinmi lädunman juk sacerdötipis mandäsinanpaq jamanqa. Paykunaqa ishkanpis juk yarpayllam kayanqa. 14Tsay corönam templuchö churaranqa. Tsayta rikarmi runakuna yarpäyanqa Heldai, Tobías, Jedaías alistayanqanta y Sofoníaspa tsurin Josías corönata ruranqanta>>.

15<< <Diosnintsikta cäsuyaptikiqa juk nacionpitam templuta arüsiyäshunaykipaq shayämunqa. Niyanqaqnö kaptinmi musyayanki llapanta mandaq Dios Yaya qamkunaman kachamanqanta> >>.

Currently Selected:

Zacarías 6: qxn

Highlight

Copy

Compare