Zacarías 11
11
1¡Líbano nación, punkuykikunata kichay nina yaykur cedru qeruykikunata rupananpaq!
2Ciprés qerukuna, waqayay cedru qerukuna ishkiyanqanpita.
Kuyakuypaq cedru qerukunam ushakäyashqana.
Basánchö encina qerukuna, jatun munti ushakaptin waqayay.#Isa. 2.12-13.
3Llulluypa llulluykaq qewakunapis tsakishqanam kayan.
Tsaymi üsha mitsikuqkuna qayaraykacharnin waqayan.
Jordán mayu kuchunchö muntikunapis ushakäyashqanam.
Muntikuna manana kaptinmi leonkunapis qayaraykachäyan.
Ishkaq mitsikuqman iwalatsiypa tantiyatsinqan
4 Dios Yayam nimarqan: <<Pishtaypaq kaykaq üshakunata shumaq mitsiy. 5Üshakunata rantiqkunaqa mana llakiparmi pishtayan. Rantikuqkunanam niyan: <¡Pächi! ¡Dios Yayapa bendicionninwanmi rïcuyäyashkä!> Üsha mitsiqkunapis manam üshankunata llakipäyantsu.#11.5 Üshakunaqa Dios Yaya kuyanqan runankunam kayan. Üsha mitsikuqkunanam autoridäninkuna y sacerdötikuna kayan. Üshakunata rantiqkunaqa Dios Yaya kuyanqan runankunapa contrankunam kayan. Rantikuqkunaqa contrankunapa poderninman entregaqkunam kayan.
6<<Tsaynö kayaptinmi noqapis kay nacionchö täkuq runakunata llakipäshaqtsu. Tsaymi chikiqninkunapa y mandakuq reykunapa makinman entregashaq. Chikiqninkuna kay nacionta ushakätsiyaptin manam ni imanöpa salvashaqtsu. Noqa Dios Yayam nï>>.
7Tsaymi üshata rantiq negociantikuna contratayämaptin pishtaypaq kaq üshakunata shumaq cuidarqä. Cuidanäpaqmi ishkay tukruta ashirqä. Jukaq tukrutam shutitsirqä Alli Kawayta. Jukaq tukrutanam shutitsirqä Jukllatsashqata. Tsay tukrükunawanmi#11.7 Üshata mitsinanpaq tukruqa väranö jatunmi. Peru puntanchö shiwinayuq kaqmi üshata qarachämunanpaq. üshakunata mitsirqä. 8Podernïchö kaykaq kimsa mitsikuqkuna chikimar rabyatsiyämaptinmi juk killallachö paykunata qarqurqä.
9Tsaypitanam üshäkunata nirqä: <<¡Manam qamkunata mitsiyäshaykinatsu! ¡Wañuyaptiki, wañutsiyäshuptiki y kikikipura wañutsinakuyaptikipis manam ni ima importakamannatsu!>>
10Tsaynö nirmi Alli Kaway shutitsinqä tukrüta pakiskirqä. Tsaynö pakiskirmi musyatsishkä maytsay nación runakunawan ruranqan pactuta Dios Yaya ushakätsinqanta. 11Tsaymi tsay junaq ushakarqan Dios Yaya paykunawan pactu ruranqan. Pakinqäta rikarmi üshata rantiq negociantikuna tantiyayarqan pactu ruranqanta Dios Yaya ushakätsinqanta.
12Tsaymi nirqä: <<Qamkunapaq alli kaptinqa mitsinqäpita pägayämay. Pägayämayta mana munarqa amapis pägayämaytsu>>.
Tsaymi mitsinqäpita kimsa chunka (30) qellayta pägayämarqan.
13Tsaynö pägayämaptinmi Dios Yaya nimarqan: <<Mitsikuq kanaykipaq churaykaptiqqa wallkallata pägayäshurnikim noqatapis manakaqman churaykäyäman. Arunqaykipita pägayäshunqayki qellaytaqa templuchö babulman wiñay>>.
Tsaymi tsay kimsa chunka (30) yuraq qellayta apar templuchö babulman wiñarqä.#Mat. 27.9-10. 14Tsaynöllam Jukllatsashqa shutiyuq tukrütapis pakiskirqä. Tsaynömi musyatsirqä Judá runakunawan Israel runakuna chikinakur kawayanqanta.
15Tsaymi Dios Yaya nimarqan: <<Kananqa mana alli mitsikuq runa kanqannö kay. 16Kananpitaqa kay nacionman juk mitsikuqtanam churashaq oqrakashqa üshata mana ashiqta, ashkashkunata mana cäsuqta, chakin pakishqata mana jampiqta, uyukunatapis alli qewaman mana qatiqta. Shumaq mitsinqanpa rantinmi weran weran kaqllata mikur shillullantana dëjanqa>>.#Eze. 34.2-4.
17¡Allaw, mana väliq mitsikuq runa!
Mitsinqayki üshata dëjanqaykipita derëcha kaq makikitapis roquyätsun.
Derëcha kaq ñawikitapis espädawan jorquyätsun.
Rikraykipis usunkar shikwatsun.
Derëcha kaq ñawikipis qaprayar ama rikätsunnatsu.
Currently Selected:
Zacarías 11: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
