Zacarías 10
10
Kuyanqan runankunata Dios Yaya salvananpaq äninqan
1Mikuykuna wiñanqan witsay tamyatsimunanpaq Dios Yayata mañakuyay.
Mañakuyaptikiqa illaqukatsimurmi tamyatsimunqa.
Tsaymi chakraykikunachö qewapis shumaq wiñanqa.
2Ïdulukunapa shutinchö willakuqkunam llullakuyan.
Tsaynöllam adivïnukunapis llullakuyan.
Imapaq sueñuyanqanta tapukuyaptinmi llutankunata parlayan.
Janan shonqullam llakipäkuyan.
Tsaynö engañayaptinmi runakuna mitsiqninnaq üshakunanö maytsaypa witsikashqa kaykäyan.#Jer. 50.6-7; Eze. 34.5-6; Mat. 9.36; Mar. 6.34.
3 Dios Yayam nin:
<<Kuyanqä runakunapa mandaqninkunawan rabyashqa karmi paykunata alläpa castigashaq.#Eze. 34.2.
Tsaypitanam kuyanqä Judá runakunata kikï rikäshaq.
Yanapaptïmi guërrachö pelyananpaq alli kaq bestianö kayanqa.
4<<Judá runakunapitam juk alli mandakuq shamunqa.
Paymi kanqa fuerti cimientuchö maestru ruminö,
carpata ichïtsiyänanpaq estäcanö
y guërrachö pelyananpaq flëchanö.
Tsaynöllam Judá runakunapita wakin mandakuqkunapis kayanqa.
5Paykunam allish chölu valienti kayanqa.
Nänichö qetäta jaruqnömi chikiqninkunata guërrachö jarutakuyanqa.
Yanapaptïmi guërrachö venciyanqa.
Bestiankuna montashqatapis venciskirmi penqakuyman churayanqa.
6<<Judá runakunatam valoratsishaq.
Josépita miraqkunatam#10.6 Josépita miraqkunaqa Israel runakunam kayan. salvashaq.
Paykunata llakiparmi nacionninkunaman kutitsishaq.
Imaypis mana dëjashqanömi kayanqa.
Noqam paykunapa Diosninkuna kä.
Mañakayämanqantam imaypis wiyashaq.
7Efraín#10.7 Efraín runakunaqa Israel runakunam kayan. runakunam allish chölu valienti kayanqa.
Vïnuta upyarnin kushikuqnömi kushishqa kayanqa.
Kushishqata rikarmi tsurinkunapis kushikuyanqa.
Yanapanqäpita kushikurmi alabayämanqa.
8<<Kuyanqä runakunatam salvashaq.
Wichyakurmi witsikashqa kaykäyaqta qorimushaq.
Ñawpata mirayanqannömi yapaypis maytsikaman mirayanqa.
9Maytsay markakunaman qarqushqa kaptïpis serviyämänanpaqmi tantiyakuyanqa.
Karu nacionkunapitam tsurinkunawan kutiyämunqa.
10Noqam Egiptupita y Asiriapitapis kutitsimushaq.
Kutitsimurmi Galaad y Líbano partikunachö täkuyänanpaq churashaq.
Tsaychö atskaman mirayaptinmi täkuyänanpaq sitiupis kanqatsu.
11<<Imayka lamarchö ölanöraq ñakaykuna kaptinpis tsayta päratsiqnömi yanapashaq.
Imayka mayu jeqaqnö ñakaykuna kaptinpis tranquïlu kawakuyänanpaqmi yanapashaq.
Asiria runakuna allish chölu tukuyaptinpis y Egipto runakuna poderyuq kayaptinpis manakaqmanmi churashaq.
12Cäsuyämar alli kawakuyänanpaqmi kuyanqä runakunata valoratsishaq.
Noqa Dios Yayam nï>>.
Currently Selected:
Zacarías 10: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
