Tito 3

Imaypis allita rurayänanpaq ninqan

1Wawqikunata y panikunata yachatsinki mandakuqkunata y autoridäkunata respitar cäsukuyänanpaq y allita imaypis rurayänanpaq. 2Tsaynölla yachatsinki mana washarima kayänanpaq, piwanpis mana piñanakuyänanpaq, alli shonquyuq kayänanpaq y pïmaywanpis shumaq kawakuyänanpaq.

3Jesucristuta manaraq chaskirmi noqantsikpis wakin runakunanö mana musyar Dios Yayata cäsurqantsiktsu. Jutsa ruraytapis manam dëjayta puëdirqantsiktsu. Chikinakur piñanakurmi kawarqantsik. 4Tsaynö kawaykashqam Dios Yaya kuyakuq kayninwan 5salvamashkantsik. Manam allita ruranqantsikpitatsu salvamashkantsik, sinöqa jutsayuq kaykashqapis llakipämarnintsikmi salvamashkantsik.#Dan. 9.18. Jutsantsikpita mayllamarnintsikmi Espíritu Santuta kachamur mushuq kawayta qaramashkantsik. 6Espíritu Santutam tsaynö kachamushqa salvamaqnintsik Jesucristo noqantsik rayku wañunqanpita. 7Jutsasapa kaykashqam dembaldilla änimashkantsik herenciantsikta chaskir paypa puntanchö imayyaqpis kawanapaq.

8Tsay ninqaq llapanpis rasun kaqlla kaptinmi wawqikunata y panikunata mana juk qelanar yachatsinki. Tsaynö yachatsiptikim Dios Yaya munanqannö imaypis allikunata rurayänanpaq tantiyayanqa. Tsay yachatsinqaqkunaqa llapan runakunapaqpis allim kaykan.

9Wakinkunaqa unay ayllunkuna pï kanqanta y Israel runakunapa costumbrinkunapaqmi piñanakuyan. Tsaykunapaq ama piwanpis piñanakunkitsu. Tsaynö piñanakuyankipis manakaqllapaqmi.

10Tsaynö piñanakatsiqkunataqa ishkay kuti plëtunki. Plëtuptikipis mana cäsuyäshuptikiqa qarquskinki.#Mat. 18.15-17; 2Tes. 3.14. 11Musyanqaykinömi tsay runakunaqa jutsa rurayllachö kawar Dios Yayata cäsukuyantsu. Tsaynö kayanqanpitam Dios Yaya castiganqa.

Cartapa ushanan

12Wawqintsik Artemasta o Tíquicutam#Hech. 20.4; Efe. 6.21-22; Col. 4.7-8; 2Tim. 4.12. qam kaqman kachamushaq. Mayqanpis chäyämuptinqa tinkunapaq Nicópolisman saslla shamunki. Tsaychömi tamya killa päsanqanyaq täkuyta yarpaykä. 13Abogädu Zenaswan Apolos#Hech. 18.24; 1Cor. 16.12. viajayänanpaq alistakuyaptin wanayanqankunata llapayki alistapaykuyällanki. 14Tsaynö yanaparmi wawqikuna y panikuna yachakuyanqa wakintapis yanapayänanpaq. Tsaynö rurarqa Dios Yaya munanqannömi kawayanqa.

15Kaychö kaykaq wawqikuna y panikunam saludayämushunki. Tsaynölla wawqikunata y panikunata noqapitapis saludaykullanki. Llapayki alli kawakuyänaykipaq Dios Yaya llakipäyäshurniki yanapaykuyälläshuy. [Amén.]

Currently Selected:

Tito 3: qxn

Highlight

Copy

Compare