Filemón 1

Apóstol Pablo saludakunqan

1Willakuq majï kuyay Filemón:

Noqa Pablum, Jesucristupa willakuyninta willakunqäpita carcelchö qaykuraykar wawqintsik Timoteuwan kay cartata cartakayämü. 2Panintsik Apiata, willakuq majintsik Arquiputa#Col. 4.17. y wajikichö qorikaykur Dios Yayata alabaq wawqintsikkunata y panintsikkunata saludaykullay. 3Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy.

Creyikuq majinkunawan Filemón alli kawakunqan

4Wawqi Filemón, imaypis mañakunqä höram qampaq Dios Yayata agradëcikü. 5Señor Jesucristuman creyikunqaykita y creyikuq majintsikkunawan kuyanakur kawanqaykitam willayämashqa. 6Tsaymi mañakü Jesucristuman creyikunaykipaq y noqantsik rayku wañunqanpita alli kaqkunata ruranaykipaq.

7Wawqi Filemón, kuyakuq kar creyikuq majintsikkunata shumaq animatsinqaykita musyarmi alläpa kushikü.

Onésimuta Filemón chaskinanpaq Pablo rugakunqan

8-10Wawqi Filemón, Señor Jesucristupa willakuyninta willakunqäpitam carcelchö qaykuraykä. Noqaqa awkinnam kä. Prësu kaykanqäman serviqniki Onésimo#Col. 4.9. chämuptinmi alli willakuyta willaptï Jesucristuta chaskikur imayka tsurïnö kaykan.

Tsaymi rugakamuq Onésimuta kachamuptï chaskiykunaykipaq. Jesucristupa apostolnin karmi obliganaqpaq podernï kan. Peru manam obligaynikita munätsu, sinöqa kuyakuq kaptikim Onésimuta shumaq chaskiykunaykipaq rugakamuq.

11Unayqa serviqniki karpis manam shumaqtsu yanapashurqayki. Peru kananmi sïqa Jesucristuta chaskishqana kar ishkantsiktapis yanapamäshun. 12Tsaymi alläpa llakirpis Onésimuta yapay kutiykätsimü. [Payta noqatanö chaskiykullay.] 13Alli willakuyta willakunqäpita prësu qaykuraptï rantiki yanapamänanpaq quëdatsiptïpis allim kanman karqan. 14Peru serviqnikita manam katsikümantsu. Masbien kikikim yanapamänanpaq o mana yanapamänanpaqpis ninayki.

15Talvezchi Dios Yaya permïtishqa Onésimo juk tiempulla qampita yarqamunanpaq. Tsaynöpam Jesucristuman creyikur kananqa imayyaqpis wawqikina kaykan. 16Kananpitaqa mananam serviqllaykinatsu kanqa, sinöqa kuyay wawqintsikmi. Tsaynö kaykaptinqa noqa kuyanqaqnölla podernikiman kutimuptin llakipaykullay. 17Creyikuq majï kaptikim rugakamuq noqata chaskimanqaykinölla paytapis chaskiykunaykipaq.

18Serviqniki Onésimo imaykitapis suwashqa kaptin o dëbishuptikiqa päganaqpaq willamay. 19Llapan dëbishunqaykita päganaqpaqmi kikï qellqamü. Peru ama qonqaytsu Jesucristupa alli willakuyninta willanqaqpita qampis dëbimanqaykita. 20Wawqi Filemón, creyikuq majï kaptikim ninqaqta ruranaykipaq rugakamuq. Rugakamunqaqta ruraptikiqa alläpam kushikushaq.

21Imatapis ninqänö ruranaykipaq kaqta musyarmi kay cartata cartakayämü. Ninqaqpita masta ruranaykipaq kaqtapis musyämi. 22Shamuptï patsatsimänaykipaq alistakuykällay. Dios Yayata mañakunqaykinömi carcelpita yarqaskamur watukaqniki shamushaq.

Cartapa ushanan

23Epafrasmi#Col. 1.7; 4.12. saludamushunki. Paypis Jesucristupa alli willakuyninta willakunqanpitam paqtä qaykuraykan. 24Tsaynöllam wawqintsik Marcos,#Hech. 12.12, 25; 13.13; 15.37-39; Col. 4.10. Aristarco,#Hech. 19.29; 27.2; Col. 4.10. Demas#Col. 4.14; 2Tim. 4.10. y Lucaspis#Col. 4.14; 2Tim. 4.11. saludayämushunki. Paykunam llapan imaykachö yanapayäman.

25Señornintsik Jesucristo llakipäyäshurniki imaypis yanapaykuyälläshuy. [Amén.]

Currently Selected:

Filemón 1: qxn

Highlight

Copy

Compare