Romanos 8

Espíritu Santupa poderninchö kawakunapaq ninqan

1Tsaymi Jesucristuchö kaqkunaqa condenashqatsu kayanqa. [Jutsata rurar kawayanqanpa rantinmi Espíritu Santu tantiyatsinqannö kawakuykäyan.] 2Jutsapa poderninchö kanqantsikpitam Espíritu Santu jipimashkantsik. Jutsapa poderninchö wañushqanö karpis Jesucristo salvamashqam alli kawayta tarintsik.

3Jutsapa poderninchö kashqam Dios Yayapa leyninkuna salvamarqantsiktsu. Tsaymi Tsurin Jesucristuta Dios Yaya kachamurqan noqantsiknö runa kananpaq. Paymi sacrificiupaq apayanqan wätanö noqantsik rayku wañurqan. Tsaynöpam jutsapa poderninpita Dios Yaya salvamashkantsik. 4Salvamarnintsikmi leyninkunata cumpliqtanöna Dios Yaya chaskimantsik. Tsaymi jutsata rurar kawanqantsikpa rantin Espíritu Santu tantiyatsimanqantsiknöna kawaykantsik.

5Jutsapa poderninchö kawaqkunam shonqunkuna yarpanqanta rurayänanpaq yarpachakuyan. Peru Espíritu Santupa poderninchö kawaqkunam sïqa Espíritu Santu tantiyatsinqannö kawayänanpaq yarpachakuyan.

6Jutsapa poderninchö kawaqkunaqa Dios Yayapa puntanman manam chäyanqatsu. Peru Espíritu Santupa poderninchö kawaqkunam sïqa Dios Yayapa puntanchö kushishqa kawakuyanqa.

7Jutsapa poderninchö kawaqkunaqa Dios Yayapa contran karmi leyninkuna ninqannö kawayta munayantsu ni puëdiyantsu. 8Yapaymi nï: Tsay runakunaqa manam Dios Yaya munanqannö kawayta puëdiyantsu.

9Peru noqantsikqa manam jutsapa poderninchönatsu kawaykantsik. Dios Yayapa Espïritun noqantsikchö kaptinmi paypa poderninchöna kawaykantsik. Jesucristupa Espïritun#8.9 Dios Yayapa Espïritunpaq y Jesucristupa Espïritunpaq parlarmi Espíritu Santupaq parlan. noqantsikchö mana kaptinqa manam Jesucristupatsu kantsik.

10Jesucristo noqantsikchö kaptinmi perdonashqana kaykantsik. Tsaymi jutsantsikpita wañunapaq kaptinpis Espíritu Santu kawayta qaramantsik. 11Dios Yayapa Espïritun noqantsikchö kaptinmi#1Cor. 3.16. Jesucristo wañunqanpita kawatsimunqannö noqantsiktapis Dios Yaya kawatsimäshun. Tsaynö kawatsimäshun noqantsikchö kaykaq Espíritu Santupa poderninwanmi.

12Wawqikuna y panikuna, tsaynö kaykaptinqa jutsa rurayta yarparpis ama rurashuntsu. 13Jutsa rurayllachö kawashqam infiernuman Dios Yaya jitarpamäshun. Peru Espíritu Santu tantiyatsimanqantsiknö jutsa ruraypaq wañushqanö karmi sïqa imayyaqpis mana ushakaq kawayta tarishun.

14Dios Yayapa Espïritun tantiyatsinqannö kawaqkunam llapanpis Dios Yayapa wamrankuna kayan. 15Wamran kanapaqmi Espíritu Santu qorimashkantsik. Espíritu Santuta chaskishqana karmi patronninta serviqnin mantsaq mantsaqlla mañakunqannötsu Dios Yayata mañakuntsik, sinöqa mana mantsakuypa mañakurmi <<¡Abba, Taytallä!>> nintsik.#Mar. 14.36; Gál. 4.6.

16Kikin Espíritu Santum Diospa wamran kanqantsikta tantiyatsimantsik. 17Dios Yayapa wamran karmi pay prometinqan herenciata Jesucristo chaskinqannö noqantsikpis chaskishun. Imaykata ñakarpis Jesucristuman creyikurmi paywan gloriachö kawakushun.

Llapanpis mushuqman tikrananpaq ninqan

18Kay patsachö ñakanqantsikkunaqa päsaqllam kaykan. Gloriachö Dios Yaya kushikuyta qaramänapaq kanqanmi sïqa imayyaqpis kanqa. Tsaytaqa llapan shonqüwanmi creyï. 19Tsaymi Dios Yaya wamrankunata puntanman qorinanpaq llapan kamanqankuna shuyaykäyan.

20Shuyaräyanqanyaqmi pay kamanqankuna maldicionädu kayan. Peru manam kikinpitatsu maldicionädu kayan, sinöqa Dios Yaya maldicionanqanpitam.#Gén. 3.17; Rom. 5.12. Kanan maldicionashqa kaptinpis 21wamrankunata mushuqman Dios Yaya tikratsinqannöllam llapan kamanqankunatapis mana ushakäyänanpaq mushuqman tikratsinqa.

22Tsayyaqmi Dios Yaya llapan kamanqankunapis warmi qeshyakur ñakanqannö ñakar llakikuykäyan. 23Manam kamanqan kaqkunallatsu llakikuyan, sinöqa Dios Yaya sasllana qorikamänata munarmi noqantsikpis llakikuykantsik. Espíritu Santuta primiciatanö chaskishqa karmi#8.23 Primiciaqa punta poquqkunam. Punta poquqta rikar cosëcha kananpaq kanqanta musyanqantsiknömi Espíritu Santuta chaskir musyantsik gloriaman chänapaq kanqanta. shuyaykantsik cuerpuntsiktapis mushuqman tikratsinanpaq.#2Cor. 5.2-4.

24Mushuqman tikranapaqmi Dios Yaya salvamashkantsik. Peru tsay höra manam chämunraqtsu. Mushuqman tikrashqana kaykarqa ¿imatanatan shuyaräshun? 25Peru mushuqman manaraq tikrarmi sïqa imaykata ñakarpis shuyaykantsik.

26Dios Yayata mañakurpis pay munanqannö mañakuyta manam puëdintsiktsu. Tsaymi Espíritu Santu Dios Yayata waqapaypa favornintsik rugakun. 27Rugakurmi Dios Yaya munanqannölla imaypis mañakun. Espíritu Santu noqantsikpaq mañakunqantam Dios Yaya musyan. Paymi shonquntsik imata yarpanqankunatapis musyan.

Dios Yaya kuyamanqantsikta pipis mana amatsakunanpaq ninqan

28Musyantsikmi ima kaptinpis Dios Yayata kuyaqkunapaq llapanpis alli kananpaq kanqanta. Paykunatam kikin munanqannö kayänanpaq Dios Yaya qayarqan. 29Unaypitana reqirmi Tsurin Jesucristunö kayänanpaq destinarqan. Tsaynöpam Jesucristuqa llapan creyikuqkunapa mayor wawqinkuna. 30Destinanqan kaqkunatam Dios Yaya qayarqan. Qayanqan kaqkunatam perdonarqan. Perdonanqan kaqkunatanam gloriaman pushanqa.

31Tsaynö kaykaptinqa ¿imatanatan munashun? Dios Yaya favornintsik kaykaptinqa ¿pinatan contrantsik kanqa? 32Noqantsik rayku wañunanpaq kuyay Tsurintapis kachaykämurqa ¿manatsuraq llapan prometimanqantsiktapis paywan Dios Yaya cumplinqa?

33Kikin Dios Yaya akraykämashqaqa y jutsantsikkunatapis perdonaykämashqaqa ¿piraq puntanchö shimpimäshun? 34Jesucristo wañunqanpita kawaskamur Dios Yayapa derëcha kaq lädunchö jamar favornintsik parlaykaptinqa ¿piraq castigashqa kanapaq ninqa?

35Jesucristupa kuyakuyninpita ¿piraq rakimäshun? Payqam kuyamantsik ñakashqa, llakikushqa, runakuna chikimashqa, mallaqashqa, llatapannaq kashqa, peligruchö kashqa y runakuna wañutsimashqapis.

36Dios Yayapa palabranmi nin:

<<Munanqaykinö kawayaptïmi chikiyämar imaypis wañutsiyäman.

Pishtayänanpaq üshanömi kayä>>.#Sal. 44.22.

37Peru tsaykuna päsamashqapis Dios Yaya kuyamashqam kushishqa imaypis confiakuntsik.

38Dios Yayam kuyamantsik kawashqapis, wañushqapis, ima päsamashqapis y ima päsamänapaq kaptinpis. Tsaymi angelkunapis, ni supaykunapis, ni ima poderyuq kaqkunapis, 39ni ciëluchö kaqkunapis, ni patsa rurinchö kaqkunapis, ni Dios Yaya ima kamanqankunapis paypa kuyakuyninpita rakimäshuntsu. Tsaynö kuyamanqantsiktam tantiyatsimashkantsik noqantsik rayku wañunanpaq Señornintsik Jesucristuta kachamur.

Currently Selected:

Romanos 8: qxn

Highlight

Compare

Copy