Romanos 2

Dios Yaya juzgananpaq ninqan

1Israel runa, qampis jutsayuq kaykar ¿imanirtan runa majikita juzgaykanki? Tsaynö juzgayanqaykipitam pï kaptikipis Dios Yaya juzgashurniki castigashunki.#Mat. 7.1; Luc. 6.37.

2Musyantsikmi pitapis jutsa ruraq kaqtaqa jutsa ruranqanman Dios Yaya castigananpaq kanqanta. 3Tsaynö kaykaptinqa ¿Dios Yayapa castïgunpita qeshpiyankitsuraq? 4Dios Yaya sas mana castigayäshuptiki ama yarpäyaytsu mana castigayäshunaykipaq kanqanta. Payqa llakipäkuq, pacienciakuq y perdonakuq karmi jutsaykikunapita arrepentikuyänaykita shuyaraykan. 5Peru alläpa mana wanakuq karmi jutsaykikunata dëjayankitsu. Tsaymi juzganan junaq chämuptin Dios Yaya alläpa rabyar castigayäshunki.

6Tsay junaqmi imanöpis kawayanqanman llapan runakunata juzganqa.#Prov. 24.12; Jer. 17.10; Eze. 18.30; 33.20; Mat. 16.27. 7Dios Yayapa puntanchö kawayta munar alli ruraqkunatam imayyaqpis kawayänanpaq gloriaman pushanqa. 8Peru Dios Yayata mana cäsur jutsa ruraqkunatam sïqa rabyarnin mana llakipaypa castiganqa.

9Mana llakipaypa castigaptinmi llapanpis jutsa ruraqkuna ñakar llakikuyanqa. Puntatam Israel runakuna ñakayanqa y tsaypitanam mana Israel runakuna. 10Peru alli ruraq kaqkunam sïqa Dios Yayapa puntanchö mana ushakaq kawayta chaskiyanqa. Puntatam Israel runakuna chaskiyanqa y tsaypitanam mana Israel runakuna.

11Dios Yayam llapan runakunata mana juk jananpaypa juzganqa.#Deut. 10.17. 12Tsaymi leyninkunata musyaqkunata y mana musyaqkunatapis jutsa rurayanqanpita Dios Yaya ushakätsinqa. Leyninkunata musyaqkunatam tsay leykuna ninqannö juzganqa. 13Manam leyninkunata musyayanqallanpitatsu Dios Yaya pitapis salvanqa, sinöqa leyninkunata cäsuyanqanpitam.

14Mana Israel runakuna Diospa leyninkunata mana musyarpis allita rurarmi tsay leykunata musyaqnö kayan. 15Jutsankunapita llakikuyaptin y allita rurayanqanpita kushikuyaptinmi musyantsik runakunapa shonqunkunachö Diospa leyninkuna qellqaranqanta. 16Tsaymi pakayllapa jutsa rurayanqanpita juzganan junaqchö Dios Yaya pïmaytapis juzganqa. Tsaynö juzgananpaqmi Jesucristuta Dios Yaya churashqa. Tsaypaqmi alli willakuyta willakurnin pïmaytapis tantiyatsï.

Diospa leyninkunata Israel runakuna mana cäsuyanqan

17Israel runakuna, musyayay. Qamkunam yarpäyanki Diospa leyninkunata yachayanqaykipita mana juzgayäshunaykipaq kanqanta. Tsaynöllam kushikuyanki Dios Yaya akrayäshunqaykipita. 18Dios Yayapa leyninkunata musyarmi pay munanqannö kawakuyänaykipaq musyayanki. Tsaymi alli y mana alli kanqantapis tantiyayanki. 19Qapranö kaqkunata pushaqnö y tutapaychönö kawaqkunata aktsipaqnö kayanqaykitam yarpäyanki. 20Mana yachaqkunata y wamrakunata alli yachatsiq kayanqaykitam yarpäyanki. Tsaynö yarpäyanki Diospa leyninkunata yachakushqa karmi.

21Wakin kaqkunata tsaynö yachaykätsirqa ¿imanirtan kikikikunaraq cäsuyankitsu? Mana suwakuyänanpaq yachatsikuykarqa ¿imanirtan kikikikuna suwakuyanki? 22Adulteriu jutsata mana rurayänanpaq yachatsikuykarqa ¿imanirtan kikikikunapis adulteriu jutsata ruraykäyanki? Ïdulukunata rikaytapis mana munaykarqa ¿imanirtan ïdulukunapa adornunkunata suwaykäyanki? 23Diospa leyninkunata yachayanqaykipita alabakuykarqa ¿imanirtan tsay leykunata mana cumplirnin Dios Yayata manakaqman churaykäyanki? 24Tsaynö kawayaptikim Dios Yayapa palabranpis nin: <<Qamkuna mana allikunata rurar kawayaptikim mana creyiq runakuna Dios Yayata manakaqman churayan>>.#Isa. 52.5; Eze. 36.22.

Señalakuypaq yachatsinqan

25Dios Yayapa leyninkunata cumpliyaptikiqa señalakuyanqaykipis allim. Peru leyninkunata mana cumpliyaptikim sïqa señalakuyanqaykipis manakaqllapaq. 26Mana señalakushqa kaqkunapis Diospa leyninkunata cumpliyaptinqa ¿manatsuraq señalakushqatanö Dios Yaya chaskinqa? 27Mana señalakushqa karpis Diospa leyninkunata cumpliqkunam día del juiciuchö niyäshunki: <<Señalakushqa kaykar y Diospa leyninkunata yachaykarqa ¿imanirtan Dios Yayata cäsuyarqaykitsu?>>

28Manam maman o taytan Israel kanqallanpitatsu pipis rasunpa Israel runa kaykan. Tsaynöllam señalakushqa kanqallanpitatsu pipis rasunpa señalakushqa kaykan. 29Tsaypa rantinmi rasunpa señalakushqa kaykan shonqunta Espíritu Santu señalaptin.#2.29 Cuerpunta señalarmi penqayninpa punta qaranta roqur jipiyaq. Tsaynöllam shonqunkunata señalarqa jutsankunata dëjayänanpaq tantiyatsiyan.#Deut. 10.16; 30.6; Jer. 4.4. Paykunata runakuna chikiyaptinpis Dios Yayam kuyan.

Currently Selected:

Romanos 2: qxn

Highlight

Compare

Copy