Romanos 15
15
Jesucristuman creyikuq majintsikwan alli kawakunapaq ninqan
1Creyikuq majintsik mana shumaq tantiyar imapis jutsa kanqanta yarpaptinqa tsayta ama rurashuntsu. Munayllantsikta ruranqantsikpa rantin 2imatapis rurashun creyikuq majintsikkuna Dios Yaya munanqannö kawayänanpaq. 3Jesucristupis manam kikinpa munayllanpitatsu imatapis rurarqan. Dios Yayapa palabranmi nin: <<Qamta manakaqman churashuqnikim noqatapis manakaqman churayäman>>.#Sal. 69.9.
4Dios Yayapa palabranmi tantiyatsimänapaq kaykan. Palabranta yachakurmi payman creyikur prometinqankunata cumplinanpaq kanqanta musyantsik. 5Mana ajayaypa y mana llakikuypa creyikunapaqmi Dios Yaya imaypis yanapaykämantsik. Tsaymi payta mañakü Jesucristo kuyamanqantsiknö juknin jukninwanpis kuyanakur kawakuyänaykipaq. 6Kuyanakur kawarmi Señornintsik Jesucristupa Taytan Dios Yayata juk yarpaylla alabayanki.
Mana Israel runakunapaqpis Diospa alli willakuynin kanqan
7Tsaymi Jesucristo kuyamanqantsiknö creyikuq majintsikkunawan kuyanakushun. Tsaynö kawashqam Dios Yayata alabayanqa. 8Yarpätsishayki: Israel runakunata salvananpaqmi Jesucristo shamurqan. Tsaynöpam Abrahamta, Isaacta y Jacobta prometinqanta Dios Yaya cumplirqan. 9Tsaynöllam Jesucristo shamurqan mana Israel runakunapis llakipäkuq kanqanpita Dios Yayata alabayänanpaq. Dios Yayapa palabranmi nin:
<<May nacionchö karpis adorashaykim.
Llapan shonqüwan cantarmi alabashayki>>.#2Sam. 22.50; Sal. 18.49.
10Tsaynöllam nin:
<<Maytsay nacionchö täkuqkuna,
Dios Yaya kuyanqan runankunawan paqta kushikuyay>>.#Deut. 32.43.
11Mastam nin:
<<Maytsay nacionchö täkuqkuna,
Dios Yayata alabashun.
Maytsaychö täkurpis payta adorashun>>.#Sal. 117.1.
12Profëta Isaías qellqanqanchömi nin:
<<Isaípita miraqpitam juk runa yurinqa.
Maytsay nacionchö täkuqkunata mandananpaqmi shamunqa.
Mana Israel runakunapis paymanmi creyiyanqa>>.#Isa. 11.10.
13Dios Yaya yanapaykuyälläshuy payman creyikur juknin jukninwanpis alli kawakuyänaykipaq, Espíritu Santupa poderninchö kawakuyänaykipaq y puntanman chäyänaykipaq kanqanta musyar waran waran kushishqa kawayänaykipaq.
Maytsaypa Pablo willakur purinqan
14Wawqikuna y panikuna, musyämi alli shonquyuq kayanqaykita, Dios Yayapa willakuyninta yachakuyanqaykita y wakintapis tantiyatsiyänaykipaq alli yachayanqaykita. 15Peru tsaynö kayaptikipis kay cartawanmi yarpätsiyaq yachakuyanqaykita mana qonqäyänaykipaq. Tsaynö niyaq Dios Yaya llakipämar 16Jesucristupa alli willakuyninta mana Israel runakunata willakunäpaq churamashqa kaptinmi. Tsaymi willakuykä mana Israel runakunapis Espíritu Santu yanapaptin Dios Yayapaq alli sacrificiunö kayänanpaq.
17Willakunäpaq Jesucristo yanapamaptinmi kushikü. 18Aläbakunqäpa rantinmi pay yanapamanqanllata maytsaychöpis parlashaq. Yanapamaptin willakuyninta willakurmi wakin kaqkuna rikäyämänanpaq alli kawakuykä. Tsaymi mana Israel runakunapis Dios Yayata cäsuyan. 19Espíritu Santupa poderninwan milagrukunata rurarmi Jerusalénpita qallaykur hasta Ilírico provinciayaq Jesucristupa willakuyninta willakushkä.
20Tsaynö willakurpis wakin kaqkuna willakuyanqan markakunamanqa manam aywayta munätsu. Tsaymi pipis manaraq willakunqan markakunachö Jesucristupa willakuyninta willakuykä. 21Dios Yayapa palabranmi nin:
<<Pipis mana willakunqantam musyayanqa.
Imaypis mana wiyayanqantam wiyayanqa>>.#Isa. 52.15.
Romaman Pablo aywayta yarpanqan
22Maytsaypa willakur purirmi qamkuna kaqman shamuyta puëdimushkäraqtsu.#Rom. 1.13. 23Peru kananqa kay purinqä markakunachö Jesucristupa willakuyninta willakushkänam. Unaypita yarpanqänömi qamkunata watukaskiyarniki 24Españapa aywayta yarpaykä. Tsayman aywanäpaq yanapayämänaykitam munä.
25Peru kananqa creyikuq majintsikkunapaq qoriyanqan ofrendakunata aparmi Jerusalénparaq aywaykä. 26Macedonia y Acaya provinciakunachö creyikuq majintsikkunam tsay ofrendata qoriyashqa Jerusalénchö waktsa wawqikunata y panikunata yanapayänanpaq.#1Cor. 16.1-4. 27Allita rurarmi ofrendata qoriyashqa. Paykunam Jesucristupa willakuyninta Jerusalénpita qallaykur willakuyaptin creyikuyashqa. Willakuyanqanpita kushikurmi ofrendata qoriyashqa Jerusalénchö waktsa wawqikunapaq y panikunapaq apanäpaq.#1Cor. 9.11. 28Kay ofrendakunata Jerusalénchö wawqikunata y panikunata entregaskirnam Españapa aywaqnölla watukaqnikikuna chämushaq. 29Qamkuna kaqman chämuptïmi animatsinakur kushikunapaq Jesucristo yanapamäshun.
30Wawqikuna y panikuna, Señornintsik Jesucristupa shutinchö y kuyamaqnintsik Espíritu Santupa shutinchömi rugayaq llapan shonquykikunawan Dios Yayata noqapaqpis mañakuyänaykipaq. 31Tsaynö mañakuyay Judea provinciaman chaptï mana cäsukuq runakunapita Dios Yaya tsapaykamänanpaq. Tsaynölla mañakuyay apanqä ofrendata Jerusalénchö wawqikuna y panikuna kushishqa chaskiyänanpaq. 32Jerusalénchö llapan alli kananpaq Dios Yaya yanapamaptinmi qamkuna kaqman chaykamuptï kushishqa kashun.
33Llapaykipis alli kawayänaykipaq Dios Yaya yanapaykuyälläshuy. Amén.
Currently Selected:
Romanos 15: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.