Romanos 16
16
Pablo saludakunqan
1Panintsik Febim watukayäshuqniki shamunqa. Paymi Cencrea iglesiachö diacunïsa. 2Paymi creyikuq majintsikkunata alli yanapan. Tsaynöllam noqatapis willakur puriptï yanapaman. Jesucristuman creyikuq majintsik kaykaptinqa chaskiykuyällanki. Tsaynölla llapan wananqankunata alistapaykuyällanki.
3Priscilatawan Aquilata saludaykuyällanki. Paykunam Jesucristupa willakuyninta willakur puriptï yanapayämashqa.#Hech. 18.2. 4Paykunam wañuytapis mana mantsar yanapayämashqa. Tsaynö yanapayämanqanpitam noqapis y llapan mana Israel wawqikuna y panikunapis pächi nikuyä. 5Wajinchö qorikaq creyikuq majintsikkunatapis saludaykuyällanki.
Tsaynölla kuyanakuyanqä Epenetuta saludaykuyällanki. Paymi Asia provinciachö llapanpitapis mas puntata Jesucristuman creyikurqan. 6Panintsik Maríatapis saludaykuyällanki. Paymi alli yanapayäshushkanki. 7Tsaynölla Israel majïkuna Andrónicuta y Juniastapis saludaykuyällanki. Paykunawanmi carcelchö qaykuräyarqä. Paykunam noqapita mas puntata Jesucristuman creyikuyarqan. Apóstol majïkunapis paykunataqa allim respitayan.
8Tsaynölla saludaykuyällanki kuyanakuyanqä Ampliasta, 9willakuq majï Urbanuta y kuyanakuyanqä Estaquista. 10Tsaynölla Apelesta saludaykuyällanki. Jesucristupa alli serviqnin kaptinmi paytaqa llapan creyikuq majintsikkuna respitayan. Tsaynölla saludaykuyällanki Aristóbulupa ayllunkunata, 11Israel majï Herodiónta y Narcisupa ayllunchö Jesucristuman creyikuqkunata. 12Tsaynölla Trifenatawan Trifosata saludaykuyällanki. Tsay warmikunam Jesucristupa willakuyninta willakuqkunata alli yanapayan. Tsaynölla panintsik Pérsidata saludaykuyällanki. Paypis Jesucristupa willakuyninta willakuqkunatam alli yanapan. 13Tsaynölla kuyay wawqintsik Rufuta#Mar. 15.21. y mamanta saludaykuyällanki. Paymi imayka mamänö cuidamashqa. 14Tsaynölla saludaykuyällanki Asíncrituta, Flegontita, Hermesta, Patrobasta, Hermasta y paykunawan qorikaq wawqikunata y panikunatapis. 15Tsaynölla saludaykuyällanki Filóloguta, Juliata, Nereuta, Nereupa paninta, Olimpasta y paykunawan qorikaq wawqikunata y panikunatapis.
16Juknin juknikipis qaqllaykikunachö mutsanakur saludanakuykuyällay. Purinqä partikunachö wawqikuna y panikunam qamkunata saludayämushunki.
17Wawqikuna y panikuna, chikinakuyänaykipaq o Jesucristupa willakuyninta mana cäsuyänaykipaq pipis willayäshuptikiqa ama chaskiyaytsu. Tsaynö willakuqkunaqa llutantam yachatsiyäshunki. Paykunapita witikuyanki. 18Paykunaqa manam Jesucristo alabashqa kananta munartsu yachatsiyan, sinöqa kikinkuna aläbashqa kayta munarmi. Paykunam alli shimillankunapa mana tantiyaq wawqikunata y panikunata llutanta creyitsiyan.
19Dios Yayata cäsuyanqaykitam maytsaychö creyikuq majintsikkuna musyayan. Tsaynö kawayanqaykita musyarmi noqapis kushikü. Noqam munä jutsata mana rurar imaypis allita rurar kawayänaykita.#Mat. 10.16. 20Alli kawayänaykipaq yanapashuqniki Dios Yaya yanapaykuyäshuy Satanásta manakaqman churayänaykipaq. Señornintsik Jesucristo llakipäyäshurniki imaypis yanapaykuyälläshuy.
21Yanapamaq wawqintsik Timoteupis#Hech. 16.1. saludayämushunkim. Tsaynöllam Israel majïkuna Lucio, Jasón y Sosípaterpis saludayämushunki.
22(Noqa Terciupis Señornintsikpa shutinchömi saludayämuq. Apóstol Pablo dictamanqannöllam kay cartata qellqamü.)
23Tsaynöllam Gayupis#Hech. 19.29; 1Cor. 1.14. saludayämushunki. Paymi wajinta alistapämashqa patsakunäpaq y creyikuq majintsikkunawan tsaychö qorikäyänäpaq. Tsaynöllam kay markapa tesorërun Erastupis#2Tim. 4.20. y wawqintsik Cuartupis saludayämushunki. 24[Señornintsik Jesucristo llakipäyäshurniki imaypis yanapaykuyälläshuy. Amén.]
Cartapa ushanan
25¡Dios Yayata alabaykuyällay! Paymi Jesucristupa willakuyninta willakunqänölla yanapaykäyäshunki payman creyikur munanqannö kawayänaykipaq. Tsay willakuytaqa runakuna ñawpata manam musyayarqantsu. 26Peru kananmi sïqa profëtakuna qellqayanqannölla y imayyaqpis kawaq Dios Yaya ninqannölla willakuyninta maytsay nacionkunachöpis willakuyan. Tsaynö willakuyan pïmaypis Jesucristuman confiakur Dios Yaya munanqannö kawayänanpaqmi.
27¡Jesucristupa shutinchö Dios Yayata imaypis alabaykulläshun! ¡Payllam Diosqa! ¡Manam ni pipis paynö yachayyuqqa kantsu! Amén.
Currently Selected:
Romanos 16: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.