Romanos 14
14
Mana musyapänakunapaq yachatsinqan
1Jesucristuman creyikuq majintsikkuna mana tantiyakuyaptinpis ama musyapäyaytsu. Tantiyayanqaykinö mana tantiyayaptinpis ama discutinakur piñanakuyaytsu. 2Wakinmi yarpäyan aytsata mikur jutsata mana rurayanqanta y wakinnam yarpäyan aytsata mikur jutsata rurayanqanta.#14.2 Tsay witsaymi wätakunata pishtayaq ïdulukunapa shutinchö. Israel runakunam pipis tsay aytsata mikur supaykunata adoraykanqanta yarpäyarqan. Tsaymi Jesucristuman creyikurpis mikuyta munayarqantsu. Peru Jesucristuman mana creyikuq mana Israel runakunam sïqa tsay aytsata mikurpis supaykunata mana adorayanqanta tantiyayarqan. Tsaymi paykunaqa ïdulukunapaq pishtayanqan aytsatapis mikuyarqan. 3Aytsa mikuqkunapis Diospa wamranmi kayan. Tsaymi aytsata mana mikuq kaqkuna ama musyapäyaytsu aytsa mikuq kaqkunata. Aytsa mikuq kaqkunapis ama musyapäyätsuntsu aytsata mana mikuq kaqta. 4Qam ¿pitan kanki Jesucristupa serviqninta juzganaykipaq? Jutsa ruranqanpitam patronnin Jesucristo juzganqa. Imanö kaptinpis jutsata mana rurananpaqmi Jesucristo yanapan.
5Tsaynöllam wakin creyikuq majintsikkuna yarpäyan Dios Yayata alabanapaq reqishqa junaqlla qorikänapaq kanqanta. Wakinnam yarpäyan Diosta alabanapaq llapan junaqkunapis allilla kanqanta. Reqishqa junaqchö o wakin junaqchö qorikarpis shumaq yarpachakuyay mayqan junaqchö qorikäyänaykipaqpis. 6Qorikaykur Dios Yayata alabayänaykipaq juk junaq mas alli kanqanta yarpaq runapis Dios Yayata cäsuyta munarmi tsaynö yarpan. [Diosta alabayänaykipaq llapan junaqkuna alli kanqanta yarpaq runapis Dios Yayata cäsuyta munarmi tsaynö yarpan.] Aytsata mikuq runapis Dios Yayata agradëcikurmi paypa shutinchö mikun. Aytsata mana mikuq runapis Dios Yayata agradëcikurmi paypa shutinchö mikun.#Col. 2.16.
7Manam kikillantsikpaqtsu kawantsik y manam kikillantsikpaqtsu wañuntsik. 8Kawarpis Dios Yayapaqmi kawantsik. Wañurpis Dios Yayapaqmi wañuntsik. Kawarpis wañurpis Jesucristupa poderninchömi kaykantsik. 9Kawaqkunapa y wañuqkunapa Señornin kananpaqmi Jesucristo wañuskir kawamushqa. 10Llapantsik paypa poderninchö kaykarqa ¿imanirtan creyikuq majintsikkunata juzgaykäyanki? Dios Yayapa puntanman#14.10 Wakin griego copiakunachömi Cristupa puntanman nin. chashqam llapantsikta juzgamäshun.#2Cor. 5.10. 11Dios Yayapa palabranmi nin:
<<Noqa Dios Yayam jurar nï:
Llapanmi puntäman qonqurikayämunqa.
Llapanmi cäsuyämänanpaq niyämanqa>>.#Isa. 45.23.
12Tsaymi llapantsikta Dios Yaya cuentata mañamäshun.
Creyikuq majintsikta jutsata mana ruratsinapaq ninqan
13Dios Yaya juzgamäna kaykaptinqa creyikuq majintsikkunawan ama juzganakushunnatsu. Creyikuq majintsik imatapis ruranqantsikta rikar creyikuyninta dëjananpaq kaptinqa tsayta ama rurashuntsu. 14Jesucristo discïpulunkunata yachatsishqa kaptinmi#Mar. 7.19. llapan mikuykuna y aytsakunapis allilla kanqanta musyä. Peru tsaynö kaptinpis wakin creyikuq majintsikkunam mana musyar aytsata mikur jutsata rurayanqanta yarpäyan. Tsaynö yarparmi aytsata mikur jutsata rurayan. 15Creyikuq majiki llakikunanpaq kanqanta musyaykar aytsata mikurmi paykunata kuyayankitsu. Paykunatapis salvananpaq Jesucristo wañushqa kaykaptinqa aytsata ama mikuyaytsu. Mikuqta rikäyäshurnikim Jesucristuman creyikuyanqatsu. 16Tsaynölla creyikuq majiki mana allikunata parlananpaq kaptinqa aytsata ama mikuyaytsu.
17Dios Yayapa mandakuyninchö kawayqa manam munanqantsikta mikunapaqtsu ni upyanapaqtsu, sinöqa allita ruranapaq, pïmaywanpis shumaq kawanapaq y Espíritu Santu yanapamashqa kushishqa kawanapaqmi. 18Jesucristuta servirnin tsaynö kawarmi Dios Yaya munanqannö kawantsik. Tsaynö kawashqaqa manam ni pipis musyapämäshuntsu. 19Tsaymi shumaq yarpachakushun creyikuq majintsikkunawan alli kawanapaq y animatsinakur Dios Yaya munanqannö kawanapaq.
20Dios Yaya kamanqan mikuykuna alli kaptinpis salvanqan kaqkuna creyikuyninta dëjananpaq kaptinqa tsay mikuyta ama mikuyaytsu. Mikurqa mana allitam rurayanki. 21Creyikuq majintsik [llakikuyänanpaq] o creyikuyninta dëjayänanpaq kaptinqa ama aytsata mikuyaytsu ni vïnutapis upyayaytsu. Tsaynölla imapis jutsa kanqanta yarpäyaptinqa ama rurayaytsu.
22Imatapis mikuyanqayki mana jutsa kanqanta tantiyarqa mana willakuyllapa shonquykikunallachö katsiyay. Mikuyänaykipaq alli kanqanta tantiyarqa kushishqam kayanki. 23Peru aytsa o ima mikuypis mana alli kanqanta yarparqa ama mikuyaytsu. Mana alli kanqanta yarpar mikurmi jutsata rurayanki. Tsaynöllam mana alli kanqanta yarpar imatapis rurarqa jutsata rurayanki.
Currently Selected:
Romanos 14: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.