Popular Bible Verses from Romanos 14

Share

Dios Yayapa mandakuyninchö kawayqa manam munanqantsikta mikunapaqtsu ni upyanapaqtsu, sinöqa allita ruranapaq, pïmaywanpis shumaq kawanapaq y Espíritu Santu yanapamashqa kushishqa kawanapaqmi. Jesucristuta servirnin tsaynö kawarmi Dios Yaya munanqannö kawantsik. Tsaynö kawashqaqa manam ni pipis musyapämäshuntsu.

Kawarpis Dios Yayapaqmi kawantsik. Wañurpis Dios Yayapaqmi wañuntsik. Kawarpis wañurpis Jesucristupa poderninchömi kaykantsik.

Tsaymi shumaq yarpachakushun creyikuq majintsikkunawan alli kawanapaq y animatsinakur Dios Yaya munanqannö kawanapaq.

Dios Yaya juzgamäna kaykaptinqa creyikuq majintsikkunawan ama juzganakushunnatsu. Creyikuq majintsik imatapis ruranqantsikta rikar creyikuyninta dëjananpaq kaptinqa tsayta ama rurashuntsu.

Dios Yayapa palabranmi nin: <<Noqa Dios Yayam jurar nï: Llapanmi puntäman qonqurikayämunqa. Llapanmi cäsuyämänanpaq niyämanqa>>. Tsaymi llapantsikta Dios Yaya cuentata mañamäshun.

Jesucristuman creyikuq majintsikkuna mana tantiyakuyaptinpis ama musyapäyaytsu. Tantiyayanqaykinö mana tantiyayaptinpis ama discutinakur piñanakuyaytsu.

Qam ¿pitan kanki Jesucristupa serviqninta juzganaykipaq? Jutsa ruranqanpitam patronnin Jesucristo juzganqa. Imanö kaptinpis jutsata mana rurananpaqmi Jesucristo yanapan.