Salmo 74
74
Salmo 74 (73)
Kuyanqan runakunata salvananpaq mañakunqan
1a (1a) Asaf qellqanqan salmum.
1 1 (1b) Dios Yayallä, ¿asïpaqku dëjayämashkanki?
Majädaykichö üshaykinö kaykäyaptï ¿imanirtan alläpa rabyashkanki?
2Unaypita akranqayki runakuna kaykäyaptïqa yarpaykayällämay.
Herenciayki kayänäpaqmi salvayämarqayki.
Sión lömachö täkunqayki templuyki rayku yanapaykayällämay.
3Templuchö kaqkunatam contraykikuna llapanta ushakätsiyashqa.
Juchutsiyanqanta rikänaykipaq shamuykullay.
4Templuykita juchuskatsirmi kushikur qayaykachäyashqa.
Tsaymanmi bandërankunatapis jawiyashqa.
5Paykunam muntiq jachakunachö walluqnö templuykita juchutsiyashqa.
6Tablakunachö kuyakuypaq tällar adornayanqantam jächawan y pïcuwan jankat ushakätsiyashqa.
7Tsaynömi templuykita waykayashqa.
Täkunayki templuta manakaqman churarmi llapanta juchutsiyashqa.
8Tsay runakunam jankat ushakätsiyämayta yarpäyan.
Kay nacionchö qamta adorayänaqpaq qorikäyanqä wajikunatapis llapantam waykayashqa.
9Bandëräkuna parparyaqtapis mananam rikäyänatsu.
Profëtakunapis mananam kayannatsu.
Manam musyayätsu imayyaq kawayänäpaq kanqantapis.
10Dios Yayallä, ¡imayyaqraq chikimaqkuna ofendiyämanqa!
¡Imayyaqraq rimayäshunki!
11¿Imanirtan yanapayämankinatsu?
¿Imanirtan makiki cruzashqa rikaraykäyämanki?
12Dios Yayallä, unaypitam mandamaqnï rey kanki.
Kay markachö atska kutim chikimaqnïkunata vencishkanki.
13Lamartapis podernikiwanmi ishkayman rakirqayki.#Éxo. 14.21.
Lamarchö mantsaypaq wätakunapa umantapis pakirqaykim.
14Mantsaypaq Leviatán#Job 3.8; 41.1; Sal. 104.26; Isa. 27.1. wätapa umankunatam llapirqayki.
Tsaypitam desiertuchö päraq wätakuna mikuyänanpaq jitapurqayki.
15Mayu kananpaqmi yakutapis pashtatsimurqayki.
Mana tsakiq mayukunatam jankat tsakitsirqayki.
16Junaqta y paqastapis qammi kamashkanki.
Killatawan rupaytapis qamllam kamashkanki.
17Kay patsa maypita mayyaq kananpaqpis qammi señalta churashkanki.
Usya killata y tamya killatapis qammi kamashkanki.#Gén. 1.3-18.
18 Dios Yayallä, contraykikunam ashayäshunki.
Mana alli ruraq runakuna contrayki parlayanqanta ama perdonaytsu.
19Ama qonqaykayällämaytsu.
Kullkushnömi alläpa mantsakashqa kaykäyä.
Chucaru wätanö mana alli ruraq runakunapa makinman ama dëjaykayällämaytsu.
20Kay nacionchöqa maytsaychöpis mana allikunallatam ruraykäyan.
Noqakunawan pactu ruranqaykita yarpar yanapaykayällämay.
21Sufritsiyämänanta ama permïtiykullaytsu.
Waktsakunawan qollmi shonqu kaqkuna alabayäshunaykipaq yanapaykullay.
22Dios Yayallä, podernikichö kaykäyaptïqa sas yanapaykayällämay.
Tsay mana alli ruraq runakunam waran waran contrayki shäriyan.
23Chikiyäshuqniki runakunam contrayki imaypis parlayan.
Tsaynö kayanqanta rikaykarqa sas yanapaykayällämay.
Currently Selected:
Salmo 74: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
