Salmo 73
73
Libru 3
Salmo 73—89
Salmo 73 (72)
Dios Yayaman confiakunqan llapanpitapis mas alli kanqan
1a (1a) Asaf qellqanqan salmu.
1 1 (1b) Israel runakunatam Dios Yaya alläpa kuyan.
Limpiu shonquyuqkunatam yanapan.
2Tsaynö kaykaptinpis noqaqa cäsi cäsim Dios Yayaman confiakuyta dëjashkä.
3Jutsa ruraqkuna rïcuyaqta rikarmi alläpa rabyakurqä.
4Paykunataqa manam qeshyaypis tsarintsu.
Wañuytapis manam yarpäyantsu.
5Manam wakin kaq runakunanö sufriyantsu.
Manam ni ima desgraciapis päsantsu.
6Allish tukurmi puriykäyan.
Runa majinkunata atacayänanpaqmi alistakushqallana kaykäyan.
7Imaykankuna kaptinmi werayaywan ñawinkunapis saltananraq.
Mana alli ruraykunallapaqmi imaypis yarparaykäyan.
8Pïmaytam manakaqman churayan.
Pitapis maqayänanpaq o wañutsiyänanpaqmi jurar puriyan.
9Dios Yayapa contranmi parlayan.
Runa majinkunapapis contranmi shäriyan.
10Tsaymi runakuna aläbar qatiräyan.
Ima niyanqantapis pïmaymi creyiyan.
11Tsay mana alli runakunam niyan:
<<¿Imanötaqshi Diosqa llapanta musyanqa?
¿Imanötaqshi ciëluchö kaykar tantiyanqa?>>#Sal. 10.4; 14.1; 53.1; Job 22.13-14; Isa. 29.15.
12Tsaynömi mana alli ruraq runakuna kayan.
Paykunaqa mana sufriyllapam rïcuyäyan.
13Noqaqa manakaqllapaqmi jutsata mana rurar kawaykä.
Manakaqllapaqmi allillata rurar kawaykä.
14Waran waranmi mana allikuna päsaman.
Cada alliqmi sufriykä.#Job 21; Jer. 12.1-4; Hab. 1.
15Tsaynö kaptinpis tsay yarpanqäkunata manam parlätsu.
Tsaykunata parlarqa kuyanqayki runakunatam rabyatsïman karqan.
16Mana alli runakuna imanir alli kawayanqantam tantiyätsu.
17Dios Yayapa templunman aywarraqmi tantiyashkä.
Tsaychöraqmi tsay runakuna imanö ushakäyänanpaq kanqanta tantiyashkä.
18Paykunam alläpa peligruchö kaykäyan.
Dios Yayam destinashqa ushakäyänanpaq.
19Paykunaqa illaqpitam ushakäyanqa.
Mantsakayllawanmi ushakäyanqa.
20Sueñuyninta runa qonqaqnömi paykunapis qonqashqa kayanqa.
Dios Yaya, castigaptikim tsaynö kayanqa.
21Shonqü alläpa rabyaptinmi jaqayashqa karqä.
22Mana tantiyakuq kaynïwanmi imayka wätanö puntaykichö kawarqä.
23Peru tsaynö kaykaptïpis qammi yanapamanki.
Derëcha kaq makïpitam jancharämanki.
24Yätsimarmi shumaq tantiyatsimanki.
Tsaypitam gloriaman pushamanki.
25Ciëluchöpis qamllam salvamaqnï kanki.
Kay patsachöpis qamwan kawakurmi kushishqa kawakushaq.
26Kallpä ushakaptin y shonqü llakikuptinpis qammi valoratsimanki.
Kikikim imayyaqpis herenciä kaykanki.
27Qampita witikuqkunatam ushakätsinki.
Mana cäsushuqnikikunatam illakätsinki.
28Peru noqam sïqa qamllaman imaypis confiakamushaq.
Qamman confiakamunqämi llapan imaykapitapis mas alli.
Qammi kanki tsapämaqnï, Dios Yaya.
Yanapamanqaykitam pïmaytapis willashaq.
Currently Selected:
Salmo 73: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
