Salmo 71
71
Salmo 71 (70)
Awkin runa Dios Yayata mañakunqan
1 Dios Yaya, qamllamanmi confiakamü.
Runakuna musyapäyämänanta ama permïtiykullaytsu.
2Allillata ruraq kaynikiwan salvaykallämay.
Mañakamunqaqta wiyaykallämay.
Saslla salvaykallämay.
3Tsinkakunä rumi kaykullay.
Qammanmi imaypis tsinkakamü.
Salvamänaykipaq kanqanta musyarmi confiakamü.
Qammi tsapämaq rumi y tsinkakunä törri kanki.
4Dios Yayallä, mana alli runakunapita tsapaykallämay.
Jutsasapakunapita y wañutsikuqkunapita salvaykallämay.
5Qamman confiakamuptïmi imayka desgraciapitapis tsapämanki.
Jöven kanqäpitam qamman confiakamü.
6Mamäpa pachanllachöraq kaykaptïmi yanapamarqayki.
Qam permïtiptikim yurishkä.
Tsaymi imaypis alabashayki.
7Llapan imaykachö yanapamaptikim wakin runakunapis noqanö kawayta munayan.
8Poderösu kaptikim waran waran alabaq.
9Awkinna kaptïpis ama qonqaykallämaytsu.
Kallpannaq kaptïpis ama dëjaykallämaytsu.
10Wañutsimayta munaqkunam qorikaykur conträ willanakuyan.
11Paykunam niyan: <<Qatikachar achkushun.
Diospis dëjashqanam.
Manam ni pipis salvanqanatsu>>.
12Dios Yayallä, noqapita ama witikullaytsu.
Sas shamur yanapaykallämay.
13Chikimaqkunaqa kikinkuna penqakushqa y wañutsishqa kayätsun.
Conträ shäriqkunaqa kikinkuna asipashqa kayätsun.
14Noqaqa imaypis qamllatam shuyaräshayki.
Waran waranmi mas alabashayki.
15Qoyat qoyatmi llakipäyämar salvayämanqaykita willakushaq.
Ayka kuti salvamanqaykita manam yupaytapis puëdïtsu.
16Tukuyläya mantsakaypaq kaqkunata ruranqaykitam willakushaq.
Qamlla imaypis alli ruraq kanqaykitam pïmaytapis willashaq.
17Dios Yayallä, jöven kanqäpitam yachatsimashkanki.
Tsaymi mantsakaypaq ruranqaykikunata kananyaqpis willakuykä.
18Kanan witsay runakunata y paykunapita miraqkunatapis willakushaqraqmi.
Awkinyar soquyashqana kaptïpis ama dëjaykallämaytsu.
19Dios Yayallä, manam pipis kantsu qamnö allilla ruraqqa.
Mantsakaypaqkunatam rurashkanki.
Manam ni pipis qammanqa iwalantsu.
20Alläpa sufriyman y llakikuyman churaskamarpis alli kawakunäpaq yapaymi yanapamanki.
Wañunaykaptïpis yapaymi sharkatsimanki.
21Poderyuq kanäpaqmi yanapamanki.
Yapaymi kushikatsimanki.
22Israel runakunapa santu Diosnin, tsaynö yanapamanqaykipitam arpakunata y salteriukunata töcar adorashayki.
Cantukunata cantarmi alabashayki.
23Salvamanqaykipitam llapan shonqüwan kushishqa alabashayki.
24Desgracia päsamänanta munaqkunam jankat penqakushqa kaykäyan.
Peru alli ruraq kanqaykitam imay hörapis parlashaq.
Currently Selected:
Salmo 71: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
