Salmo 68
68
Salmo 68 (67)
Contrankunata Dios Yaya vencinqanpita alabanqan
1 (1) Cantaqkunapa mandakuqninpaqmi. David qellqanqan salmu. Cantanapaqmi.
1 1 (2) Dios Yayallä, janäkuna shäriykullay.
Contraykikuna witsikar aywakuyätsun.
Chikishuqnikikunapis puntaykipita qeshpir aywakuyätsun.#Núm. 10.35.
2 2 (3) Wayrawan qoshni illakaqnö illakäyätsun.
Ninachö cëra tsulluqnö ushakäyätsun.
Jutsasapakunapis puntaykichö ushakäyätsun.
3 3 (4) Peru alli ruraq runakuna sïqa kushikuyätsun.
Puntaykichö kushishqa kawakuyätsun.
Kushikuypita saltaykachäyätsun.
4 4 (5) Dios Yayata alabayay.
Himnukunata cantar shutinchö alabayay.
Paymi pukutaynin montashqa purin.
Paypa shutinmi Yahweh.
¡Paypa puntanchö kushikuyay!
5 5 (6) Dios Yayam sagrädu templunchö täkun.
Paymi waktsakunapa taytan.
Paymi viüdakunapa favornin.
6 6 (7) Dios Yayam ayllunnaqkunata yanapan aylluyuqnö kayänanpaq.
Prësukunata jipiskirmi imaykayuq kayänanpaq yanapan.
Peru mana cäsukuq runakunatam sïqa desiertuchö täkuqtanö sufritsin.
7 7 (8) Dios Yayallä, kuyanqayki runakunatam Egiptupita yarqayämunanpaq yanapashkanki.
Tsaypitam desiertupa pushamushkanki. Selah
8 8 (9) Patsam alläpa tsuktsukyarqan.
Tamyapis shallyaypa shallyarraqmi tamyamurqan.
Dios Yaya tsaychö kaptinmi Sinaí jirka kuyurqan.
Paymi Israel runakunata kuyaq Dios Yaya.#Éxo. 19.18; Jue. 5.4-5.
9 9 (10) Dios Yayallä, tamyatapis allim tamyatsimushkanki.
Qachpa chakratam alli wayuq chakraman tikratsishkanki.
10 10 (11) Kuyanqayki runakuna kayaptïmi tsaychö täkuyänäpaq churayämashkanki.
Kuyayämarmi faltäpukuyaptïpis yanapayämashkanki.
11 11 (12) Dios Yaya mandaptinmi atskaq warmikuna willakur niyarqan:
12 12 (13) <<¡Contrantsik reykunapis soldädunkunawan qeshpirmi aywakuyashqa!>>
Contrankunapita apayanqantam wajinkunachö warmikuna rakipunakuyarqan.
13 13 (14) Wätankunata täpar quëdaqkunapis palumanö adornukunatam chaskiyarqan.
Tsay adornukunam kayan yuraq qellaypita rurashqa riprayuq y qoripita rurashqa plümayuq.
14 14 (15) Llapanpaq poderyuq Dios Yaya mantsakätsiptinmi tsay reykuna qeshpir aywakuyarqan.
Tsaynö qeshpiyanqanmi Salmón jirkachö rashtata wayra apanqannö karqan.
15 15 (16) Basán jirkakunam alläpa lliwyaraykan.
Puntankunapis alläpa altum.
16 16 (17) Altu jirkakuna, ¿imanirtan chikir rikaräyanki Dios Yaya täkunqan Sión lömata?
¡Tsaychömi Dios Yaya imaypis täkunqa!
17 17 (18) Dios Yayapa guërra carrëtankunam yupaytapis mana puëdiypaq.
Tsay carrëtankunawanmi Sinaí jirkapita templunman shamushqa.
18 18 (19) Dios Yayallä, prësukunata apamurmi witsämushkanki.
Runakuna apayämunqan qaraykunatam chaskishkanki.#Efe. 4.8.
Mana cäsukuq runakunapis podernikichömi kayan.
Paykuna täkuyanqanchönam täkunki.
19 19 (20) ¡Salvakuq Dios Yaya alabashqa kaykullätsun!
Paymi waran waran yanapamantsik. Selah
20 20 (21) Diosnintsikmi imaykapitapis salvakuq Dios.
Wañuypitapis paymi salvamantsik.
21 21 (22) Dios Yayam contrankunapa umanta pakinqa.
Jutsa rurayllachö kawaqkunapa umantam ñututsinqa.
22 22 (23) Dios Yayam nin:
<<Basánpitapis contraykikunatam kutitsimushaq.
Lamar rurinpitapis jipimushaqmi.
23 23 (24) Tsaynömi rurashaq yawarninkunawan chakikikunata mayllayänaykipaq
y allquykikunapis yawarninta laqwayänanpaq>>.
24 24 (25) Mandamaqnï Dios Yaya, maytsikaq runakunam adorayäshunki.
Fïlay fïlaymi templuykiman yaykuykäyan.
25 25 (26) Puntatam cantaqkuna aywaykäyan.
Qepantanam töcaqkuna aywaykäyan.
Chawpintanam panderëtakunata töcaraykar jipashkuna aywaykäyan.
26 26 (27) ¡Dios Yayata llapayki alabayay!
¡Israel runakuna, llapayki qorikaykur alabayay!
27 27 (28) Puntantam tapshi kaq Benjamín trïbukuna aywaykäyan.
Paykunawanmi Judá, Zabulón y Neftalí trïbukunapita atskaq mandakuqkuna aywaykäyan.
28 28 (29) Dios Yayallä, poderösu kanqaykita tantiyaykatsiyällämay.
Ñawpata yanapayämanqaykinö yapay yanapaykayällämay.
29 29 (30) Jerusalén templuykimanmi reykuna qaraykunata apayämunqa.
30 30 (31) Guërrallapaq yarparaq runakunata castigaykullay.
Paykunam ututukunaman tsinkaykur atacakuq wätanö kayan.
Tsaynöllam chucaru waqrakuq törukunanö kayan.
Rïcu kayta munarmi nacionkunata venciskir imaykantapis apakuyan.
Tsaynö runakunata ushakaykatsillay.
31 31 (32) Egiptupitam Faraón mandamunqankuna shayämunqa.
Etiopía nación runakunanam Dios Yayata alabayanqa.
32 32 (33) Kay patsachö llapan nación runakuna, Dios Yayata alabayay.
Cantukunata cantar alabayay. Selah
33 33 (34) Dios Yayam montashqa ciëlupa purin.
Parlamunqanpis maytsaymanmi wiyakämun.
34 34 (35) Dios Yaya poderösu kanqanpita alabayay.
Paymi poderösu kayninwan Israel runakunata yanapan.
Azulyaraykaq ciëluchöpis poderösum.
35 35 (36) Dios Yayam templunchöpis mantsakaypaq.
Kuyanqan Israel runakunatam poderösu kayninwan yanapan.
¡Dios Yaya alabashqa kaykullätsun!
Currently Selected:
Salmo 68: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
