Salmo 69
69
Salmo 69 (68)
Llakikur Dios Yayata mañakunqan
1 (1) Cantaqkunapa mandakuqninpaqmi. Liriu waytakuna niyanqan cantupa tönunwan kay salmuta cantayanki. David qellqanqan salmu.
1 1 (2) Dios Yayallä, salvaykallämay.
Jundu mayuman tallpukaqnömi kaykä.
2 2 (3) Wambalyaykaq pätsiman jatikaqnömi kaykä.#Jon. 2.6.
Mayman jarunäpaqpis manam tarïtsu.
Jundu yakuman tallpuqnömi kaykä.
Bunyaypa bunyar yaku apaykämaqtanömi tantiyaykä.
3 3 (4) Tsayläya qayakamurmi jasmayashkä.
Kunkäpis alläpam nanan.
Dios Yayata shuyarar rikachakuptïmi ñawïpis tsakan.
4 4 (5) Chikiqnïkunam aqtsäpitapis yupayta mana puëdiypaq kayan.
Añaw kakuqtam chikiyäman.
Imankunatapis mana suwaykaptïmi <<kutitsimay>> nir tumpayäman.#Sal. 35.19; Juan 15.25.
5 5 (6) Dios Yayallä, musyankim mana cäsukuq kanqäta.
Llapan jutsa ruranqätam musyanki.
6 6 (7) Llapanta mandaq Dios Yaya, jutsä rayku qamman confiakamuqkunata ama musyapaykuyällätsuntsu.
Israel runakunata kuyaq Dios Yaya, jutsä rayku qamman confiakamuqkunata manakaqman ama churaykuyätsuntsu.
7 7 (8) Runakuna ashayämaptinpis qam raykum awantakushkä.
Penqakuywanmi qaqlläpis jankat pukayashqa.
8 8 (9) Wawqikunapis noqapita witikurmi juklä runatanöna rikäyäman.
Panïkunapaqpis mana reqishqanam kä.#Job 19.13; Sal. 31.11; 38.11; 88.18.
9 9 (10) Templuykitam wañur kawarpis respitatsishaq.#Juan 2.17.
Qamta manakaqman churarmi noqatapis manakaqman churayäman.#Rom. 15.3.
10 10 (11) Ayunarnin waqaptïmi musyapäyäman.
11 11 (12) Yarpachakurnin llakikur lütu llatapata shukukuptïmi asipäyäman.
12 12 (13) Pïmaymi rimayämar purin.
Machashqakunapis penqakatsiyämarmi cantapäyäman.
13 13 (14) Dios Yayallä, tsaymi rugakurniki mañakullaq.
Sas yanapaykallämay.
Mañakamunqäta llakipämar wiyaykallämay.
Imaypis salvamanqaykinö kananpis salvaykallämay.
14 14 (15) Pätsiman jatikashqa kaykaqtanö jipiykallämay.
Chikimaqnïkunapita libraykallämay.
Yaku rurinpitanö jipiykallämay.
15 15 (16) Bunyaypa bunyar aywaq yaku apamänanta ama permïtiykullaytsu.
Jundu yaku millpumänanta ama dëjaykallämaytsu.
16 16 (17) Dios Yayallä, rugakullaptiq wiyaykallämay.
Qamqa llakipäkuq y kuyakuqmi kanki.
Kuyakuq kaynikiwan yanapaykallämay.
17 17 (18) Serviqniki kaykaptïqa ama tsinkaykullaytsu.
Ñakaychö kaykaptïqa sas yanapaykallämay.
18 18 (19) Sas shamur salvaykallämay.
Chikimaqnïkunapa poderninpita libraykallämay.
19 19 (20) Qammi musyanki ofendiyämanqanta, musyapäyämanqanta y manakaqman churayämanqanta.
Musyankim pikuna chikimanqantapis.
20 20 (21) Qayapäyämaptinmi shonqüpis alläpa jaqayan.
Tsaymi imata ruranäpaq gänasnïpis ni kallpäpis kantsu.
Llakipämar yanapamänanpaq mayjina ashirpis manam ni pita tarishkätsu.
21 21 (22) Mikuynïmanpis venënutam wiñäyashqa.
Yakunaptïpis vinagritam upyatsiyämashqa.#Mat. 27.34, 48; Mar. 15.23, 36; Luc. 23.36; Juan 19.28-29.
22 22 (23) Allikunallata mikuyänanpaq qorikäyaptin castigaykullay.
Banquëtita mikuyanqanpis paykunapaq trampanö kaykullätsun.
23 23 (24) Paykunapa ñawinkunapis qaprayätsun.
Chankankuna imaypis tsuktsukyaykullätsun.#Rom. 11.9-10.
24 24 (25) Rabyaynikiwan paykunata castigaykullay.
Paykunataqa jankat ushakaykatsillay.
25 25 (26) Wajinkunapis tsunya katsun.
Täkuyanqan carpankunachö pipis ama täkutsunnatsu.#Hech. 1.20.
26 26 (27) Castigamanqaykita rikaykarmi sufritsiyäman.
Sufritsimanqaykita rikaykarmi ashayäman.
27 27 (28) Tsaynö runakunata jutsankunapita mana llakipar castigaykullay.
Paykunataqa ama perdonaykullaytsu.
28 28 (29) Libru de la Vïdachö shutinkuna qellqashqa kaykaqtapis börraykullay.#Éxo. 32.32; Apoc. 3.5; 13.8; 17.8.
Alli ruraq runakunapa shutinkuna apuntashqa kanqan librumanpis shutinkunata ama apuntaykullaytsu.
29 29 (30) Noqaqa ñakaychö karmi alläpa llakikü.
Dios Yaya, yanapamar salvaykallämay.
30 30 (31) Dios Yayapa shutinchömi cantashaq.
Agradëcikurmi adorashaq.
31 31 (32) Tsaynö alabaptïmi törukunata sacrificiupaq apamunqäpitapis Dios Yaya mas kushikunqa.
32 32 (33) Salvamanqanta rikarmi llakishqa kaykaqkunapis kushikuyanqa.
Dios Yayata ashiqkunapis valorakurmi payman creyikuyanqa.
33 33 (34) Dios Yayam waktsakuna mañakuyanqanta wiyan.
Payman confiakuqkunatam prësu apayaptinpis qonqantsu.
34 34 (35) ¡Ciëlupis, kay patsapis, Dios Yayata alabayätsun!
¡Lamarpis y tsaychö llapan kawaqkunapis, Dios Yayata alabayätsun!
35 35 (36) Dios Yayam Sión lömachö täkuq runakunata salvanqa.
Tsaynöllam Judáchö markakunata allitsatsinqa.
Tsaychömi kuyanqan runakuna yapay täkuyanqa.
36 36 (37) Dios Yayata serviqkunapita miraqkunam tsay markakunata chaskiyanqa.
Dios Yayata kuyaqkunam tsaychö täkuyanqa.
Currently Selected:
Salmo 69: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
