Salmo 50
50
Salmo 50 (49)
Llapanta Dios Yaya juzganqan
1a (1a) Asaf qellqanqan salmu.
1 1 (1b) Poderyuq Dios Yayam kay patsachö täkuqkunata qayaykätsin.
Rupay yarqamunan kaqlächö täkuqkunatawan rupay jeqanqan kaqlächö täkuqkunatam qayaykätsin.
2Dios Yayam Sión lömapita chipakyämun.
Tsay lömam llapanpitapis mas kuyakuypaq.
3Diosnintsikmi shamuykanna.
Shamunqanmi wiyakämun.
Puntantam imaykatapis rupaq nina shamuykan.
Lädunkunapam löcu tamyawan mangäda shamuykan.
4Israel runakunata juzgarmi ciëluta y kay patsata testïgu kayänanpaq qayan.
5Paymi nin: <<Sacrificiuta rurar noqawan pactu ruraqkunata#Éxo. 24.3-8. qorikätsiyämuy>>.
6Ciëlum willakun Dios Yaya alli juzgakuq kanqanta.
Paymi pïmaytapis juzgan. Selah
7Dios Yayam nin:
<<Kuyanqä Israel runakuna, kanan niyanqaqta shumaq wiyayämay.
¡Noqam Dios kä!
¡Noqam Diosniki kä!
Tsaymi jutsaykikunapita juzgayäshayki.
8<<Sacrificiukunata noqapaq waykayanqaykim alli.
Ñawpächö imaypis waykayaptikim kushikü.
9Peru tsaynö kaptinpis corralnikipita mallwa törukunata manam wanätsu.
Qenchaykipita cabrakunatapis manam wanätsu.
10Noqapam muntichö wätakuna y maytsay jirkakunachö wäkakunapis.
11Tukuyläya pishqukunatapis reqïmi.
Llapan wätakunapis noqapam.
12Kay patsa y kay patsachö kaqkunapis noqapa kaykaptinqa mallaqarpis manam qamkunataraqtsu mañakuyaqman.
13¿Acäsu törupa aytsanta mikurku o chïvupa yawarninta upyarku kawä?
14<<Apayämunqayki sacrificium kanman llapan shonquykikunawan agradëcikayämanqayki.
Tsaynölla llapan äniyämanqaykita cumpliyay.
15Imayka ñakaykuna shamuptinpis mañakayämay.
Mañakayämaptikim yanapayäshayki.
Yanapayanqaqta tantiyarmi alabayämanki>>.
16Peru mana alli ruraq runatam Dios Yaya nin:
<<Qamqa ¿imanirtan leynïkunata willakur purinki?
Runakunawan pactu ruranqäpaqpis ¿imanirtan parlar puriykanki?
17Qamqa manam corrigiptiqpis chaskikunkitsu.
Yätsiptiqpis manam chaskikunkitsu.
18Suwakunawanmi acuerdu kanki.
Adulteriu jutsata ruraqkunawanpis apay marqaymi kaykanki.
19Llutallam shimiki tarinqanta parlanki.
Llullakurmi imaykatapis engañakunki.
20Wawqikitapis manakaqtam tumpanki.
Yawarniki kaykaptinmi ashanki.
21Tsaykunata ruraptikipis manam ni ima nishkaqtsu.
¿Tsayku qamnö kanqäta yarpanki?
Kananmi sïqa puntäman ichïkatsirniki shimpishayki.
Llapan ruranqaykitam jorqapushayki.
22<<Mana cäsukuqkuna, niyanqaqkunata shumaq tantiyakuyay.
Illaqpita shamuykur ushakätsiyaptiq manam ni pipis salvayäshunkitsu.
23Agradëcikayämanqaykim rasunpa kaq sacrificiu.
Tsaynö agradëcikayämarmi respitayämanki.
Munanqänö kawaqkunatam salvashaq>>.
Currently Selected:
Salmo 50: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
