Salmo 51
51
Salmo 51 (50)
Jutsa ruranqanpita perdonananpaq mañakunqan
1-2 (1-2) Cantaqkunapa mandakuqninpaqmi. Betsabéwan David jutsata rurayanqanpitam profëta Natán piñaparqan. Tsaymi jutsanpita pësakur kay salmuta David qellqarqan.#2Sam. 12.1-15.
1 1 (3) Llakipäkuq Diosnï, perdonaykallämay.
Llakipäkuq kaynikiwan jutsalläta qonqaykullay.
2 2 (4) Mana allita ruranqäpita mayllaykallämay.
Jutsäpita perdonaykallämay.
3 3 (5) Mana cäsukuq kanqätam pësakullä.
Jutsa ruranqätam imaypis yarparaykä.
4 4 (6) Qampa contraykim jutsata rurashkä.#Sal. 32.5.
Mana cäsurnikim piñatsishkaq.
Rasun kaqtam juzgamanki.
Imanö defendikuytapis manam puëdïtsu.#Rom. 3.4.
5 5 (7) Yurinqä junaqpitam jutsasapa kä.
Mamäpis jutsayuqtam wachamashqa.
6 6 (8) Jutsa ruranqanta reconöciqtam kuyanki.
Qammi jutsayuq kanqäta shonqüchö tantiyatsimanki.
7 7 (9) Hisöpu jachawan purificämaptikim limpiu kashaq.#Éxo. 12.22; Lev. 14.51; Núm. 19.18; Eze. 36.25; Heb. 9.13-14, 19.
Mayllamaptikim jankapitapis mas yuraq kashaq.#Isa. 1.18.
8 8 (10) Shonqulläman kushikuyta churaykallämuy.
Llakikuyman churamashqa karpis yapay kushikaykatsillämay.
9 9 (11) Jutsalläpita perdonaykallämay.
Mana allikunata ruranqäta ama yarpaykullaytsu.
10 10 (12) Dios Yayallä, munanqaykinö kawanäpaq limpiu shonquta qaraykallämay.
Nimanqaykita imaypis cäsunaqpaq yanapaykallämay.#Eze. 11.19; 36.26; 2Cor. 5.17.
11 11 (13) Puntaykipita ama qarqaykallämaytsu.
Espíritu Santuykitapis ama qechuykallämaytsu.
12 12 (14) Salvamanqaykipita yapay kushishqa kawakunäpaq yanapaykallämay.
Cäsukuq kanäpaq tantiyaykatsillämay.
13 13 (15) Mana cäsukuqkunatam tantiyatsishaq cäsuyäshunaykipaq.
Jutsa rurayta dëjaskirmi qamtana cäsuyäshunki.
14 14 (16) Salvakuq Dios Yayallä, runa majïta wañutsinqäpita perdonaykallämay.
Perdonamanqaykipitam kushishqa cantar imaypis alabashayki.
15 15 (17) Llapan shonqüwan alabanaqpaq yanapaykallämay.
16 16 (18) Sacrificiuta apamunätam munankitsu.
Apamunäta munaptikiqa apamümanmi.#Sal. 40.6; 50.8-14.
17 17 (19) Sacrificiuta apamunqäpa rantinmi jutsäpita arrepentikur llapan shonqüwan humillakunäta munanki.
Dios Yayallä, jutsankunapita llakikuqkunatam llakipanki.#Sal. 34.18.
18 18 (20) Siónta llakipaykullay.
Jerusalénpa murällanta allitsaykullay.
19 19 (21) Tsaymi mandayämanqaykinö sacrificiukunata waykayäshaq.
Mallwa törukunatam altarnikichö waykayäshaq.
Currently Selected:
Salmo 51: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
