Salmo 45
45
Salmo 45 (44)
Rey casaraptin cantapanqan
1 (1) Cantaqkunapa mandakuqninpaqmi. Liriu waytakuna niyanqan cantupa tönunwan kay salmuta cantayanki. Corépita miraqkuna qellqayanqan salmum. Kuyakuy cantuta cantapanqan.
1 1 (2) Shonqüchömi kuyakuy cantu kaykan.
Tsay cantutam reyta kushishqa cantapäshaq.
Akrashqa cantukunatam payta cantapäshaq.
2 2 (3) Llapan runakunapita mas kuyakuypaqmi kanki.
Cäsukuy munaytam parlankipis.
Tsaymi Dios Yaya bendicionninta qamman imaypis churamun.
3 3 (4) Alli chölu kanaykipaq tseqllaykiman espädaykita churay.
Espädaykiwanmi orgullösu ichiranki.
4 4 (5) Alli poderyuq karmi bestiata montarkur guërraman venciqllana aywanki.
Prometiyämanqaykita cumplir defendiyämänaykipaqmi yarqunki.
Qollmi shonqukunapa janan pelyarmi mana alli runakunata imaypis vencinki.
Derëcha kaq makikiwanmi alläpa mantsakaypaq imaykatapis vencinki.
5 5 (6) Flëchaykikunam fïlu puntayuq.
Flëchaptikim contraykikunapa shonqunman yaykun.
Llapan contrayki nacionkunatam vencinki.
6 6 (7) Dios Yaya, trönuykichömi imayyaqpis mandakuq kanki.
Qammi llapanta alli mandanki.
7 7 (8) Pipis allita ruraptinmi kushikunki.
Mana allita ruraptinmi rabyakunki.
Tsaymi Dios Yaya qamta churashushkanki pïmaypitapis mas kushishqa kanaykipaq.#Heb. 1.8-9.
8 8 (9) Mïrra mïrra, áloe áloe y canëla canëlanam llatapaykipis mushkun.
Alläpa kuyakuypaq marfilwan adornashqam palaciuykikunapis.
Tsaychömi arpakunata töcar kushikatsiyäshunki.
9 9 (10) Palaciuykichömi kuyakuypaq atska princesa jipashkunapis kayan.
Derëchaykichömi casaranaykipaq reina jamaykan.
Paypa llatapanmi Ofirpita apayämunqan qori püruwan adornashqa.
10 10 (11) Hïja, shumaq wiyamay.
Kanan ninqaqta shumaq tantiyay.
Marka majikikunapaq y aylluykikunapaq ama yarparaynatsu.
11 11 (12) Kuyakuypaq kaptikim rey kuyashunki.
Ollquykina kaykaptinqa payllatana cäsunki.
12 12 (13) Tiro markapita runakunam qarayniki aparkur shayämunqa.
Rïcukunapis yanapanaykipaqmi rugakuyäshunki.
13 13 (14) Churakänanpaq jipashmi alläpa kuyakuypaq.
Llatapanpis qoriwan adornashqa karmi alläpa chipakyanraq.
14 14 (15) Kuyakuypaq shumaq bordashqa llatapan shukushqatam rey kaqman pushaykäyan.
Jipashkunam qepanta aywaykäyan.
Yanasankunapis watsutsuypa watsutsurmi aywaykäyan.
15 15 (16) Alläpa kushishqam reypa palaciunman yaykuykäyan.
16 16 (17) Taytay rey, tsurikikunapis unay castaykikunanömi rey kayanqa.
Paykunatam mandäsiyäshunaykipaq maytsay markakunaman churanki.
17 17 (18) Kay cantapanqaqkunata cantarmi imaypis yarpäyäshunki.
Imaypis mana qonqarmi entëru nacionkunachö alabayäshunki.
Currently Selected:
Salmo 45: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
