Salmo 107
107
Libru 5
Salmo 107—150
Salmo 107 (106)
Ñakayanqanpita Dios Yaya jipinqan
1Allillata ruraq kanqanpita Dios Yayata agradëcikuyay.
Kuyakuq kayninqa manam ni imaypis ushakantsu.#1Crón. 16.34; 2Crón. 5.13; 7.3; Esd. 3.11; Sal. 100.5; 106.1; 118.1; 136.1-26; Jer. 33.11.
2Salvashqa kaqkuna, Dios Yaya salvanqanta willakuyätsun.
Chikiqninkunapa makinpita libranqanta willakuyätsun.
3Norti kaqläpita, sur kaqläpita, rupay yarqamunan kaqläpita y rupay jeqanan kaqläpita Dios Yaya qorimunqankuna payta alabayätsun.
4Wakinkunam markaman aywaq nänita mana tarir desiertuchö oqrakashqa puriyarqan.
5Mallaqaywan yakunaywan wañunarmi puriyarqan.
6Llakikur Dios Yayata mañakuyaptinmi sufriyanqanpita salvarqan.
7Alli nänipa pusharmi täkuyänanpaq markaman chätsirqan.
8¡Llakipäkuq kanqanpita Dios Yayata agradëcikuyätsun!
¡Noqantsik rayku mantsakaypaqkunata ruranqanpita agradëcikuyätsun!
9Alläpa yakunaqkunatam yakunkuna alistapan.
Alläpa mallaqaqkunatam mikuyninkuna alistapan.
10Wakin kaqmi alläpa llakikuychö sufriyarqan.
Carcelchö qaykuraykaqnömi kayarqan.
11Poderösu Dios Yaya ninqankunata mana cäsurmi tsaynö kayarqan.
Dios Yaya yätsinqantapis manam cäsuyarqantsu.
12Tsaymi alli ñakar aruyänanpaq Dios Yaya churarqan.
Mayjina sufriyaptinpis manam ni pï yanaparqantsu.
13Llakikur Dios Yayata mañakuyaptinmi sufriyanqanpita salvarqan.
14Wañunaqnö y cadenashqanö kaykaqtam jipimurqan.
15¡Llakipäkuq kanqanpita Dios Yayata agradëcikuyätsun!
¡Noqantsik rayku mantsakaypaqkunata ruranqanpita agradëcikuyätsun!
16Bronci punkukunatam pakirqan.
Fiërru trancakunatam pakirqan.
17Wakin kaqmi mana cäsukuq kayanqanpita alläpa sufriyarqan.
18Mikuytapis shonqunkunam jankat melanarqan.
Wañuypis janankunachönam karqan.
19Llakikur Dios Yayata mañakuyaptinmi sufriyanqanpita salvarqan.
20Dios Yaya mandamuptinmi paykuna kutikäyarqan.
Wañuykaqtanam kutikätsirqan.
21¡Llakipäkuq kanqanpita Dios Yayata agradëcikuyätsun!
¡Noqantsik rayku mantsakaypaqkunata ruranqanpita agradëcikuyätsun!
22Dios Yayata agradëcikur sacrificiuta waykayätsun.
Allikunata ruranqanpita kushishqa willakuyätsun.
23Wakin kaqmi juklä nacionkunapa negociunkunata büquiwan apayaq.
24Lamarchömi Dios Yaya mantsakaypaq ruranqanta rikäyarqan.
25Dios Yaya mandaptinmi alläpa löcu wayra qallaykurqan.
Lamarpis altu altuyaqmi laqchikarqan.
26Altu altuyaq lamar laqchikaptinmi büquinkunapis cäsi cäsi jundikarqan.
Kawayänanpaq kaqtapis manam yarpäyarqannatsu.
27Imayka machashqanömi ichiyta ni puriytapis puëdiyarqantsu.
Alli manijay yachaq kayanqanpis manam ni imapaq servirqantsu.
28Llakikur Dios Yayata mañakuyaptinmi sufriyanqanpita salvarqan.
29Apäkuy wayrata Dios Yaya päratsiptinmi yakupis laqchikarqannatsu.
30Laqtsikaq öla päraqta rikarmi kushikuyarqan.
Büquikuna chäyänan sitiuman Dios Yayam chätsirqan.
31¡Llakipäkuq kanqanpita Dios Yayata agradëcikuyätsun!
¡Noqantsik rayku mantsakaypaqkunata ruranqanpita agradëcikuyätsun!
32¡Creyikuq majinkunawan qorikaykur alabayätsun!
¡Mayor runakuna qorikäyanqanchöpis alabayätsun!
33Dios Yayam mayukunata y pashtaq yakukunatapis tsakitsin.
34Jutsata rurayaptinmi alli chakrakunatapis qachpayätsin.
35Desiertukunatapis oqu patsamanmi tikratsin.
Tsaychönam yakukunata pashtatsimun.#Deut. 29.23; Isa. 40.3; 43.19.
36Markankuna shäritsiyänanpaqmi tsay chakrakunaman mana imannaq waktsakunata churan.
37Chakrata kicharmi üvata plantayan.
Maytsikatam cosechayanpis.
38Dios Yayapa bendicionninwanmi atskaman mirayan.
Wätankunapis maytsikamanmi mirayan.
39Chikiqninkuna paykunata wañutsir wallkayätsiyaptinmi 40tsay wañutsiqninkunata Dios Yaya castigan.
Castigaptinmi tsay chikiqninkuna desiertuchö oqrakashqa puriyan.#Job 12.24.
41Peru waktsakunatam sïqa mana llakikuyänanpaq Dios Yaya yanapan.
Atskaman mirayänanpaqmi tsurinkunamanpis bendicionninta churan.
Üshakuna maytsikaman mirayanqannömi paykunapis atskaman mirayan.
42Bendicionnin churanqanta rikarmi alli ruraq runakuna kushikuyan.
Peru mana alli ruraq runakunam sïqa ima niyta puëdiyantsu.
43Pipis tantiyakuq karqa shumaq tantiyakutsun.
Tsaynöpam tantiyakuyanqa Dios Yaya kuyakuq kanqanta.
Currently Selected:
Salmo 107: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
