Salmo 106
106
Salmo 106 (105)
Israel runakuna mana cäsukuq kayanqan
1¡Aleluya!
Allillata ruraq kanqanpita Dios Yayata agradëcikuyay.
Kuyakuq kayninqa manam ni imaypis ushakantsu.#1Crón. 16.34; 2Crón. 5.13; 7.3; Esd. 3.11; Sal. 100.5; 107.1; 118.1; 136.1-26; Jer. 33.11.
2Milagrukunata ruranqanpita willakurpis ¿piraq alli tantiyatsinman?
Mayjina alabarpis ¿piraq alli alabanman?
3Kushishqam kawayanqa Dios Yaya munanqannö kawaqkuna.
Paykunam imaypis allillata rurayan.
4 Dios Yaya, kuyanqayki Israel majïkunata yanapar noqatapis yarpaykallämay.
Shamur noqatapis salvaykallämay.
5Tsaynöpam akranqayki runakuna alli kawakuqta rikäshaq.
Paykuna kushikuyanqannömi noqapis kushikushaq.
Paykuna alabayäshunqaykinömi noqapis alabashayki.
6Unay ayllükunanöllam noqakunapis jutsata rurayashkä.
Paykunanöllam llutankunata rurayashkä.
7Unay ayllükunaqa Egiptuchö mantsakaypaq ruranqaykita rikaykarpis manam cäsuyäshushkankitsu.
Llakipar yanapanqaykitam yarpäyarqantsu.
Puka Lamarman chaykurmi contrayki shäriyarqan.#Éxo. 14.10-12.
8Peru llakipäkuq karmi paykunata salvarqayki.
Tsaynömi librarqayki poderösu kanqaykita tantiyatsiyta munar.#Deut. 7.7-8; Eze. 36.22-23.
9Puka Lamarta piñapaptikim tsakiskirqan.
Tsaypam tsakipana päsatsirqayki.
10Tsaynöpam contrankunapa y chikiqninkunapa poderninpita salvarqayki.
11Yaku tsapaskiptinmi chikiqninkuna shinqar wañuyarqan.
Manam jukllayllapis kawaykar quëdayarqantsu.
12Salvaptikim kuyanqayki runakuna prometinqaykita creyiyarqan.#Éxo. 14.21-31.
Kushikuypitam cantar alabayäshurqayki.#Éxo. 15.1-21.
13Tsaynö mantsakaypaq ruranqaykikunatam yapay qonqaskiyarqan.
Tantiyatsinqaykitapis manam cäsukuyarqannatsu.
14Desiertuchömi munayanqanta ruranaykita munar tentayäshurqayki.
15Tsaynö rabyatsiyäshuptikipis munayanqantam alistaparqayki.
Peru wakin kaqtam pesti qeshyaywan ushakätsirqayki.#Núm. 11.4-34.
16Campamentuchömi Moiséspa contran shäriyarqan.
Akranqayki Aarónpa contranmi shäriyarqan.
17Tsaymi patsa kichakaskir Datánta millpuskirqan.
Abiramtawan qatiraqninkunatapis patsam tsapaskirqan.
18Lunyaq nina ruparmi wakin kaq qatiraqninkunatapis usharqan.#Núm. 16.1-35.
Tsay mana alli ruraq runakunatam nina rupar ushakätsirqan.
19Horeb jirkachömi qorita fundiskir becërruta rurayarqan.
Qonqurikuykurmi tsay ïduluta adorayarqan.
20Poderösu kanqaykita musyaykarmi qewa mikuq törutanö ruraskir adorayarqan.#Jer. 2.11; Rom. 1.23.
21Egiptuchö mantsakaypaq kaqkunata rurar salvaykaptikim qonqayäshurqayki.
22Tsaynömi qonqayäshurqayki mantsakaypaq kaqkunata Egiptuchö ruraykaptikipis.
Tsaynöllam qonqäyäshurqayki Puka Lamarchö mantsakaypaq kaqkunata ruraykaptikipis.
23Tsaynö kayaptinmi alläpa rabyar paykunata jankat ushakätsiyta munarqayki.
Qam rabyaptikim paykunapa janan Moisés rugakushurqayki.
Tsaymi rabyayniki päsaptin paykunata ushakätsirqaykitsu.#Éxo. 32.1-14.
24Kuyakuypaq nacionman pushaptikipis manam yaykuyta munayarqantsu.
Tsay nacionta entreganaykipaq äninqaykitapis manam creyiyarqantsu.
25Ninqaykita mana cäsurmi carpankuna rurinchö contrayki parlayarqan.
26Tsaymi jurarnin nirqayki desiertullachö wañur ushakäyänanpaq.#Núm. 14.1-10.
27Paykunapita miraqkunata juklä nacionkunaman qarqunaykipaqmi nirqayki.#Lev. 26.33.
28Tsaynöllam Baal-peor ïduluta adorayarqan.
Mana rasunpa kaq dioskunapaq sacrificiu ruranqantam mikuyarqan.
29Tsaynö llutankunata rurarmi alläpa rabyatsiyäshurqayki.
Pesti qeshyaywanmi wakin kaqta ushakätsirqayki.
30Tsay junaqmi sacerdöti Finees aywar jutsayuq runata wañutsirqan.
Tsayraqmi pesti qeshyay pärarqan.
31Tsaynö ruranqanpitam änirqayki paypita miraqkuna imayyaqpis sacerdöti kayänanpaq.#Núm. 25.1-13.
32Meriba yaku kaqchömi rabyatsiyäshurqayki.
Paykunapa jananmi Moiséstapis nirqayki äninqayki nacionman mana yaykunanpaq.
33Tsay runakuna rabyatsiyaptinmi Moisés mana yarpachakuypa llutanta parlarqan.#Núm. 20.2-13.
34Äninqayki nacionman paykuna yaykur markakunata ushakätsiyänanpaq mandaptikipis manam ushakätsiyarqantsu.
35Ushakätsiyanqanpa rantinmi tsaychö täkuq runakunawan juntakar mana alli costumbrinkunata yachakuyarqan.
36Tsaymi tsay runakunapa ïdulunkunata adorar serviyarqan.
Tsaynö adorayanqanpitam alläpa desgraciakuna päsarqan.#Jue. 2.1-3; 3.5-6.
37 Supaykunata adorarmi ollqu tsurinkunata y warmi tsurinkunatapis rupatsiyarqan.#2Rey. 17.17.
38Jutsannaq kaykäyaptinmi tsaynö wañutsiyarqan.
Tsaynö wañutsiyarqan cananeo runakuna adorayanqan ïdulukunapaq sacrificiuta waykarmi.
Tsaynöpam nacionninkuna maldicionashqa karqan.#Núm. 35.33.
39Tsaynö mana allikunata rurarmi alläpa melanaypaq impüru tikrayarqan.
40Tsaymi kuyanqayki runakunapita alläpa rabyakurqayki.
Paykunata rikaytapis manam munarqaykitsu.
41Contran nacionkunapa poderninmanmi dëjarqayki.
Chikiqninkunam munayanqanta ruratsiyarqan.
42Poderninkunachö katsirmi contrankuna penqakuyman churar sufritsiyarqan.
43Kuyanqayki runakunatam yapay yapay salvarqayki.
Tsaynö salvaykaptikipis yapay yapaymi contrayki shäriyarqan.
Mana allikunata rurarmi imaypis jutsata rurayarqan.
44Tsaynö kayaptinpis sufriyanqanta rikar y mañakuyäshunqaykita wiyarmi llakiparqayki.
45Paykunawan pactu ruranqaykitam yarparqayki.
Alläpa kuyakuq karmi castigarqaykitsu.
46Tsaymi chikiqninkuna llakipäyänanpaq tantiyatsirqayki.#Jue. 2.14-18.
47Dios Yayallä, salvaykayällämay.
Karu nacionkunachö witsikashqa kayanqäpita qoriykayällämay.
Tsaynöpam santu shutikichö kushishqa alabayäshayki.
Alläpa kushikurmi qamta alabayäshayki.
48¡Israel runakunata kuyaq Dios Yaya imayyaqpis alabashqa kaykullätsun!
Pïmay runakunapis <<¡amén!>> niyätsun.
¡Aleluya!#1Crón. 16.35-36.
Currently Selected:
Salmo 106: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
