Proverbios 8
8
Tantiyakuq kananpaq yätsinqan
1Tantiyakuymi qayaykäshunki.
Yachaymi wiyanaykita munaykan.#Prov. 1.20-21.
2Lömakunachö y cruzaq nänikunachömi shuyaykäshunki.
3Markaman yaykuna jatun punkuchömi shuyaykäshunki.
Tsaypitam jinchi qayakamur nishunki:
4<<Taytakuna, llapayki wiyayämänaykipaqmi qayakaykämü.
5Mana tantiyakuq jövinkuna y jipashkuna, tantiyakuyänaykipaq noqapita yachakuyay.
6Shumaq wiyayämay.
Mas väliq kaqkunatam tantiyatsiyäshayki.
Yätsiyanqaqkunam llapanpis alli.
7Rasun kaqllatam yachatsiyäshayki.
Manam ni imaypis llullakütsu.
8Llapan yätsiyanqaqkunam Dios Yaya munanqannö.
Manam ni pitapis engañätsu.
9<<Yachayyuq runaqa parlanqäkunatam fácil tantiyan.
Paykunam tantiyayan yätsinqäkuna allish kanqanta.
10Yuraq qellaypaq y qoripaq yarparäyanqaykipa rantin tantiyakuq y yachayyuq kayänaykipaq yarpachakuyay.
11Yachayyuq kayqa kuyakuypaq perlaskunapitapis masmi välin.
Yachatsiyanqaqmanqa manam ni imapis iwalantsu.
12<<Noqaqa yachaywan paqtam kaykä.
Yätsinqaqmi llapan imaykapitapis mas alli.
13 Dios Yayapita mantsakuqkunam jutsa rurayta dëjayan.
Allish tukuqkunata y aläbakuqkunatam rabyapä.
Jutsata rurar llullakuqkunatam rikaytapis munätsu.
14<<Yätsinqäkunata chaskiq runam imaykatapis allillata ruran.
Noqapitaraqmi yachayyuq y poderyuq tikran.
15Yanapaptïraqmi reypis shumaq mandakun y autoridäkunapis alli justiciata rurayan.
16Tsaynöllam yanapaptïraq mayor runakuna y yanapaqninkunapis alli mandakuyan.
17<<Kuyamaq kaqkunatam noqapis kuyä.
Ashimaq kaqkunam tariyäman.
18Noqa yanapaptïmi rïcuyäyan y respitashqapis kayan.
19Musyatsinqämi alli kaq qoripitapis mas välin.
Yätsinqämi yuraq qellaypitapis mas alli.
20Imaykatapis alli kaqkunallatam rurä.
Manam ni imatapis mana alli kaqtaqa rurätsu.
21Kuyamaq kaqkunatam rïcuyäyänanpaq yanapä.
Wajinkunachöpis manam ni imankuna faltantsu.
22<<Imatapis manaraq kamarmi Dios Yaya noqataraq puntata kamamarqan.#Apoc. 3.14.
23Kay patsapis manaraq kaptinmi noqaqa kaykarqäna.
24Lamarkunatapis manaraq kamarmi noqata kamamarqan.
Mayukuna y pashtaq yakukunapis manaraqmi karqanraqtsu.
25Jirkakunata manaraq kamarmi puntata kamamarqan.
26Patsata, chakrata y allpata manaraq kamarmi noqataraq kamamarqan.
27Lamar jananman ciëluta kamaptinpis tsaychömi kaykarqä.
28Ciëluchö pukutayta kamaptinpis y lamarman yakuta juntätsiptinpis tsaychömi kaykarqä.
29Kuchunpita lamar mana yarqunanpaq mandaptinpis y patsapa cimientunta churaptinpis#Job 38.8-11; Sal. 104.6-9; Jer. 5.22. 30payta yanaparmi tsaychö kaykarqä.
Noqata rikämarmi kushikurqan.
Paypa puntanchömi waran waran kushikurqä.
31Kamanqan patsachömi alläpa kushikurqä.
Runakunata rikarmi kushikurqä.
32<<Kuyay wamräkuna, llapayki wiyayämay.
Cäsuyämarqa kushishqam kawakuyanki.
33Yätsiyanqaqta shumaq chaskikuyay.
Manakaqman ama churayaytsu.
34Yätsinqäta cäsuqkunam kushishqa kawakuyanqa.
Paykunam yätsinqäta wiyayänanpaq waran waran wajï punküchö shuyäyäman.
35Chaskimaqkunaqa alli kawaytam tariyanqa.
Paykunataqa Dios Yayam yanapanqa.
36Peru noqapita witikuqkunataqa imapis päsanqam.
Mana cäsumaqkunam wañuyman chäyanqa>>.
Currently Selected:
Proverbios 8: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
