Proverbios 7
7
Ollqunta mana respitaq warmi imanö kanqan
1Hïju, ninqaqkunata cäsukuy.
Yätsinqaqkunata mana qonqar yarparay.
2Yätsinqaqkunata chaskikurmi alli kawayta tarinki.
Ñawi ñïñuykitanö llapan yätsinqaqkunata cuiday.
3Imaypis yarparänaykipaq makikiman watay.
Mana qonqanaykipaq shonquykiman qellqay.
4Yachayta niy: <<Panïmi kanki>>.
Tantiyaytapis niy: <<Kuyanqä amïgämi kanki>>.
5Tsaynö paniki y amïgayki karmi ollqunta mana respitaq warmipita tsapäshunki.
Jeqchikachar parlapäkuq mañösa warmipitam cuidashunki.#Prov. 2.16.
6Juk kutim wajïpa ventänanpita rikachakuykarqä.
7Tsaymi mana tantiyakuq jövinkunata rikarqä.
Paykunawanmi aywaykarqan wakin kaqpitapis mas mana tantiyakuq jöven.
8Paymi esquïnaman chaykur cällipa päsarqan.
Tsaypitam mañösa warmipa wajinpa aywarqan.
9Tsay höraqa mana reqinakuy tutapay höranam karqan.
10Illaqpitam mañösa warmi prostitütanö llatapan shukushqa nikachaykacharnin qeptsipar yarqapamurqan.
11Tsay warmiqa uman achachashqa karmi wajinchöpis pärantsu.
12Tsaymi cällikunachö pläzakunachö y esquïnakunachö ichiran pitapis tinkunqan kaqta wajupänanpaq.
13Tsay mana tantiyakuq jövintam abrazarkur mutsarqan.
Mana penqakurmi nirqan:
14<<Alli päsakuy sacrificiuta waykanäpaqmi Dios Yayata änishkä.
Äninqäta kanan junaq cumplir kusinanqä aytsam mikunapaq listu kaykan.
15Tsaymi qamwan tinkuq yarqamushkä.
Rikaynikita munaykarmi ashwan tinkuskintsik.
16Lïnupita rurashqa kuyakuypaq frazädatam qopikushkä.
Tsay frazädam Egiptupita apayämunqan fïnu lïnupita.
17Cämä mushkünanpaqmi mïrrata, áloeta y canëlata wiñashkä.
18Kanan sas yaykushun warat kuyanakur teqllanqantsikyaq kakunapaq.
19Ollqüpis manam kaychötsu.
Karupam aywashqa.
20Atska qellayta aparkurmi aywashqa.
Llena killachöraqmi kutimunqa>>.
21Tsaynö mishki shiminpa parlaparmi tsay jövinta animatsirqan.
22Tsay jövinnam jina höra warmipa qepanta jeqakuykurqan.
Pishtayänanpaq camalman töru aywaqnö,
trampaman lluytsu yaykuqnö
23y wañunanpaq kanqanta mana musyar toqllaman pishqu yaykuqnömi aywarqan.
Lluytsupa shonqunpa flëcha illaqpita päsanqannömi paytapis wañutsiyanqa.
24Hïju, yätsinqaqkunata shumaq tantiyay.
Llapan ninqaqkunata chaskikuy.
25Tsaynö warmiman ama mëtikuytsu.
26Payta qatirarmi wañuyta tarinki.
Atskaqnam tsaynö engañaptin wañuyashqa.
27Paypa wajinman aywaqkunaqam ushakäyanqa.
Currently Selected:
Proverbios 7: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
