Proverbios 6
6
Pitapis mana garantizänanpaq yätsinqan
1Hïju, reqishaykita o juklä runata garantizarmi 2trampaman shikwaqnö kaykanki.
3Garantizashqa karqa salvakunaykipaq penqakuytapis jitaskir runata ninki manana garantian kanaykipaq.
4Tiempu päsananta ama shuyaytsu, sinöqa sas pägakunanpaq ninki.
5Runapita lluytsu qeshpiqnö y trampapita pishqu salvakaqnö garantizanqaykipita salvakunki.
Qela runata yätsinqan
6Qela runa, ñuyäshukuna aruyanqanta rikay.
Imanö aruyanqanta rikar yachakuy.
7Ñuyäshupaqa manam mandaqninkuna ni patronninkuna ni capatazninkuna kantsu.
8Tsaynö kaykarmi usya killachö cosëcha kanqanyaq mikuyninkuna qorir churakuyan.
9Qela runa, ¿imay hörayaqtan puñukunki?
¿Imay hörayaqtan jitaräkunki?
10Junaqyaq puñukur makiki cruzashqa jamakuyllata munarqa 11jankatmi waktsayanki.
Armanwan suwa shamuykur suwapushuptiki mana imannaq quëdaqnömi kanki.#Prov. 24.33-34.
Mana alli ruraqkuna imanö kayanqan
12Mana alli ruraqwan mana penqakuq runam pïmaytapis llullatsir purin.
13Tsay runaqa ñawinwan, chakinwan, dëdunwan señalapaytam yachan.
14Mana allikunata yarparmi pïmaytapis piñanakatsir purin.
15Tsaymi paytaqa ima desgraciapis illaqpita päsanqa.
Mana yarpashqatam ushakanqa.
Dios Yayata imakuna rabyatsinqan
16Qanchis mana alli ruraykunapitam Dios Yaya alläpa rabyakun:
17runa majinta manakaqman churayaptin,
llullakuyaptin,
jutsannaq runakunata wañutsiyaptin,
18mana allita rurayänanpaq yarpäyaptin,
jutsa rurayman umankuna churashqa kayaptin,
19llullakuq testïgukuna kayaptin
y wawqinkunatawan chikinakatsiyaptinmi.
Jukpa warminwan mana kakunanpaq yätsinqan
20Hïju, taytayki yätsishunqaykita imaypis yarparay.
Mamayki yachatsishunqaykitapis ama qonqaytsu.
21Nishunqaykita imaypis shonquykichö yarparay.
Kunkaykiman wallqarkur imaypis katsiy.#Prov. 1.8-9.
22Maypa aywaptikipis allita ruranaykipaqmi yätsiyäshunki.
Puñuptikipis cuidashunkim.
Rikchaptikipis allitam yarpätsishunki.
23Yätsikuymi chiwchinö y yachatsikuynam aktsinö.
Tantiyatsikuykuna y consejakuykunam alli kawayman apakun.#Sal. 119.105.
24Yätsikuykunata cäsurmi ollqunta mana respitaq warmipitapis witikunki.
Tsay warmi kushitsishurniki inkitashuptikipis ama cäsunkitsu.
25Kuyakuypaq kaptinpis ama rikapankitsu.
Qeptsipäshuptikipis ama cäsunkitsu.
26 Prostitütaqa qellay raykullam ollquta qatiran.
Peru ollqunta mana respitaq warmim sïqa runata wañuyman apan.
27Pipis shanshata oqllaraptin ¿manatsuraq llatapan rupanman?
28Shanshata jaruptin ¿manatsuraq chakinta rupanman?
29Tsaynöllam jukpa warminwan kakuq runapis mana alliman chanqa.
30Juk suwa alläpa mallaqar suwakuptinqa imanir suwakuyanqantapis runakuna tantiyayanmi.
31Peru suwakuykaqta tariykurqa qanchis kuti mastam pägakatsiyanqa.
Tsaymi llapan imaykantapis rantikuskir pägakunqa.
32Mallaqaypita suwakuqta mana llakipaykarqa mas peormi jukpa warminwan kakuq runata llakipäyanqatsu.
Tsaynö runaqa mana tantiyakuq karmi kikillan wañuyta ashin.
33Tsay runataqa asharmi maqayanqa.
Wañunqanyaqmi pïmay musyapäyanqa.
34Warmipa ollqun musyaykurqa alläpa rabyarmi perdonanqatsu.
Mana llakipaypam imay hörapis maqanqa.
35Aykata pägaptin ni imata qaraptinpis manam rabyaynin päsanqatsu.
Currently Selected:
Proverbios 6: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
