Proverbios 5
5
Mañösa warmipita witikunanpaq yätsinqan
1Hïju, yätsinqaqkunata shumaq chaskikuy.
Yachatsinqaqkunata imaypis yarparay.
2Tsaynöpam shumaq tantiyakur imatapis parlanki.
3Mañösa warmiqa mishki shiminwan parlaparmi pitapis sas inkitan.
4Peru tsay warmiwan kakurqa alläpa desgraciamanmi shikwanki.
Ishkanläpa afilashqa espädawan tuksishqanömi kanki.
5Manaraq unaytam ushakanki.
Wañuymi shuyaykäshunki.
6Tsay warmiqa alli kawakunanpaq manam yarpachakuntsu.
Imanö kawanqantapis manam tantiyakuntsu.
7Hïju, yätsinqaqkunata shumaq cäsumay.
Tantiyatsinqaqkunata mana qonqar yarparay.
8Mañösa warmipita witikuy.
Ama waji punkullanmanpis witiytsu.
9Mañösa warmiwan kakuptikiqa llapan tarinqaykipis jukpaqmi kanqa.
Mana alli runakunapa makinchömi wañunqaykiyaq sufrinki.
10Sufrir arunqaykipis mana reqinqayki runakuna rïcuyänanpaqmi kanqa.
Arupukur gänanqaykipis jukllapaqmi kanqa.
11Tsaymi waray warantin awkinyarnin sufrir waqanki.
12Pësakurmi ninki: <<¿Imanirraq corrigimaptin cäsurqätsu?
¿Wañushqatsuraq karqä yätsimanqanta mana chaskinäpaq?
13Yätsimaqnïkunatapis manam cäsurqätsu.
Consejamaqkunatapis manam wiyayta munarqätsu.
14Llapan runakunam rikäyäman desgraciakuna päsamanqanta.
Llapan imaykätam ichikpa jankat oqrashkätsu>>.#Prov. 7.6-27; 23.27.
15Warmillaykiwan contentakuy.
Payqa chuya pukyuykinömi kaykan.
Tsay pukyuykillapita upyakunki.
16Cällikunapa y pläzakunapa aywaq yakuta mana upyaqnö juk warmiwan ama kakuytsu.
17Tsaypa rantin warmillaykiwan kakuy.
18Dios Yaya churashunqayki warmim qampaq bendición.
Tsaymi jöven kaykar churakanqayki warmillaykiwan contentakunki.
19Paymi kuyakuypaq lluytsunö.
Kuyakuq kar cuidashunqaykiwan imaypis contentakuy.
20Hïju, warmiyuq kaykarqa ¿imanirtan juk warmiwan mëtikunkiman?
¿Imanirtan warmiki mana kaykar abrazaräshunaykita dëjankiman?
21 Dios Yayam imanö kawanqantsiktapis rikan.
Paymi imayka ruranqantsiktapis musyan.
22Mana alli ruraqkunam jutsankunapita sufriyan.
Mana alli rurayninkunawanmi waskawan watashqanö kayan.
23Mana cäsukuq kayanqanpitam wañuyanqa.
Mana tantiyakuq kayanqanpitam ushakäyanqa.
Currently Selected:
Proverbios 5: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
