Proverbios 20
20
1Vïnuwan machakurkurmi pipis llutalla wajukun.
Machashqa runaqa pelyatam ashin.
Tsay runaqa mana yachayyuq karmi mana allikunata ruran.
2Rey rabyanqanmi león qayaraykachaqnö mantsaypaq.
Tsaymi pipis wañuyta ashir wajupan.
3Piwanpis mana piñanakuq runatam respitayan.
Mana tantiyakuq runam sïqa pïmaywan piñanakun.
4Qela runam murukuy witsaypis tiempullanchö murukuntsu.
Tsaymi cosëcha witsay chämuptin mayjina ashirpis tarintsu.
5Jundu mayuchö imapis mana rikakanqannömi runa imata yarpanqanpis musyakantsu.
Peru yachayyuq runam sïqa runa imata yarpanqantapis tantiyan.
6Atskaq runakunam yarpäyan alli runa kayanqanta.
Peru rasunpa confiakuypaq runata ¿piraq tarinman?
7Taytan alli runa kaptinqa tsurinkunapis kushishqam kawakuyan.
8Rey juzgananpaq trönunman jamaykurmi mayqan jutsayuq kanqantapis ñawillanchö sas tantiyaskin.
9Manam ni pipis ninmantsu: <<Noqaqa jutsannaqmi kä.
Shonqüpis manam ni ima mana allikunata yarpantsu>>.#Sal. 51.3-5; 1Juan 1.8.
10Pësuwan y tupuwan engañakuyaptinmi Dios Yaya alläpa rabyakun.#Lev. 19.35-36; Deut. 25.13-16; Prov. 11.1; Amós 8.5.
11Alli jövintam respitösu y yanapakuq kanqanpita reqintsik.
12Ñawitam rikänanpaq y rinritam wiyananpaq Dios Yaya kamashqa.
13Paqasta junaqta puñurmi alläpa waktsayanki.
Arukuptikiqa mikuynikipis sobrat sobratmi kanqa.
14Rantinanpaq kaykar barätullachö munarmi nin: <<Kayqa manam allitsu>>.
Peru barätullachö rantiskirmi kushikun.
15Yachayyuq runa parlanqanmi qoripita y maytsika alhäjakunapitapis mas alli.
16Juklä runata garantizaqtaqa dëbikunqanta pägakunqanyaq llatapantapis qechuskir prenda quëdatsiy.#Prov. 6.1-5; 27.13.
17Llullakur engañanakuq runam jina höra kushishqa karpis waray warantinqa problëmachö kanqa.
18Yätsikuqkuna tantiyatsiptinmi chaskikuqkuna imatapis shumaq rurayan.
Guërrachöpis shumaq yarpachakuykur pelyarraqmi venciyan.
19Cuentustëru runaqa imatapis manam upällantsu.
Tsaynökunawan ama juntakäyaytsu.
20Mamanta y taytanta maldicionaqmi alläpa ñakar wañunqa.#Éxo. 21.17; Prov. 19.26.
21Mana sufriyllapa rïcuyanqanmi saslla ushakanqa.
Ushakäpukuskirqa llakishqam purinqa.
22Ama venganzata ruranaykipaq yarpaytsu.
Tsaypa rantin Dios Yayaman confiakuy.
Paymi imaykapitapis tsapäshunki.#Rom. 12.19.
23Pësuwan y tupuwan engañakuyaptinmi Dios Yaya alläpa rabyakun.
24 Dios Yayam permïtin runa imanö kawananpaqpis.#Sal. 37.23; Prov. 16.9.
Pipis manam musyantsu waray warantin imanö kawananpaq kanqanta.#Jer. 10.23.
25Dios Yayata äniskir cuidädutaq cumplinkimantsu.
Mana cumpliptikim juzgashunki.
26Yachayyuq reyqa mana alli ruraqkunatam qarqun.
Paykunataqa chipyatmi ushakätsin.
27 Dios Yayam musyan runapa shonqun allita o mana allita yarpanqantapis.
28Rey llakipäkuq y rasun kaqllata parlaptinmi pipis trukatsiyta munantsu.
29Jövinkunam kallpasapa kar kushikuyan.
Awkinkunanam kushikuyan yachayyuq kar.
30Jutsa ruraq runam astayaptinraq jutsa rurayta dëjan.
Castigayaptinraqmi mana alli ruraykanqanta musyan.
Currently Selected:
Proverbios 20: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
