Proverbios 21
21
1Maypa mayu aywananpaq Dios Yaya permïtinqannömi reypa yarpayninkunatapis permïtin.
2Runaqa llapan ruranqankuna alli kanqantam yarpan.
Peru Dios Yayam musyan alli o mana alli yarpaywan imatapis ruranqanta.#Prov. 16.2.
3Mas allim kanman sacrificiuta waykanqaykipa rantin Dios Yaya munanqannö runa majikiwan alli kawakunqayki.#1Sam. 15.22; Amós 5.22-24; Ose. 6.6; Mat. 9.13; 12.7.
4Runa majinta feyu ñawinpa rikapanqan, yachaq tukunqan y mana allikunata yarpanqanmi jutsa.
5Imatapis shumaq yarpachakuskir ruraptinmi alli kanqa.
Peru mana shumaq yarpachakur llutalla imatapis ruraptinqa manam allitsu kanqa.
6Runa majinta engañar rïcuyanqanmi qoshni ushakaqnö ushakanqa.
Tsaynö rïcuyanqanpitam wañuyman sas chanqa.
7Mana alli runam mana llakipäkuq kayninwan ushakanqa.
Runa majinta sufritsinqanpitam kikinpis sufrinqa.
8Wiksu qerunömi mana alli runapa kawaynin.
Peru alli runapa kawayninmi sïqa llillqu qerunö.
9Mas allim kanman piñaykachaq warmiwan alli wajichö täkunqanpa rantin tsukllallachöpis tranquïlu täkunqan.#Prov. 25.24.
10Mana alli runam imaypis mana allikunata ruranallanpaq yarparan.
Tsaymi imaypis runa majinta llakipantsu.
11Mana yachayyuq runaqa llutalla parlaq runata maqayanqanta rikarraqmi tantiyakun.
Peru yachayyuq runam sïqa consejayaptinlla tantiyakun.#Prov. 19.25.
12Dios Yayam rikan mana alli ruraq runa wajinchö imanö kanqanta.
Tsaymi imayka desgracia päsananpaq dëjaskin.
13Waktsakuna mañakuptin mana qaraqtam Dios Yayapis yapanqatsu.
14Alläpa rabyashqa kaykaqta pakayllapa imallatapis qararmi rabyayninta chawätsin.
15Alli ruraq runam autoridäkuna alli justiciata rurayaptin kushikun.
Peru mana alli ruraqmi sïqa alläpa mantsakan.
16Yachayyuq kanqanpa rantin mana allikunata ruraq runam manaraq unayta ushakan.
17Fiestallachö, upyallachö y perfümillachö imaykantapis ushaq runam ni imaypis rïcuyanqatsu.
18Llullakuq y cuentustëru runatam alli runapa contran shärinqanpita kikinta ima desgraciapis päsan.
19Mas allim kanman malgeniu y mana alli warmiwan churakanqanpa rantin japallan täkunqan.
20Yachayyuq runapa wajinchömi imayka riquëza y perfümikunapis kan.
Peru mana yachayyuq runam sïqa imayka tarinqantapis jankat ushan.
21Alli yachayyuq y kuyakuq runam alli kawayta tarin.
Tsaymi pïmaypis payta respitayan.
22Alli yachayyuq runam atska soldäduyuq markata venciskir poderninchö katsin.
Tsaynö katsin pipis mana vencinanpaq kanqanta confiakuykäyaptinmi.
23Allillata parlaq runataqa manam imapis päsantsu.
24Runa majinta manakaqman churaq y yachaq tukuq, orgullösu runapaqmi mana respitakuq niyan.
25Qela runam arukuyta mana munar mallaqaypita wañun.
Qela karmi arukuyta mantsan.
26Tsay runam kikillanpaq qoyat yarparan.
Peru alli runam sïqa runa majinta imallatapis kushishqa qaraykun.
27Mana alli runakunapa ofrendantaqa Dios Yaya manam chaskintsu.
Paykunaqa Dios Yaya yanapananta munarllam ofrendata apayan.#Prov. 15.8.
28Manakaqta parlaq testïgutaqa manam parlanqantapis creyiyantsu.
Peru alli testïgu parlanqantam sïqa imaypis creyiyan.
29Mana alli runaqa runakuna rikäyänallanpaqmi alli tukun.
Peru alli runam sïqa rasunpa allillata ruran.
30 Dios Yayata mana cäsuptinqa yachayyuq, tantiyakuq ni yätsikuq kanqanpis manam välintsu.
31Guërraman aywaq runam bestianta alli alistan.
Peru Dios Yaya yanapaptinraqmi contrankunata vencin.#Sal. 20.7.
Currently Selected:
Proverbios 21: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
