Proverbios 2
2
Yachayyuq kar alli kawakunapaq ninqan
1Hïju, mandakunqäkunata shumaq cäsukuy.
Mandamientükunata imaypis yarparay.
2Yachayyuq kanaykipaq cäsukuy.
Alli yarpayyuq kanaykipaq imaypis yarparay.
3Cäsukuq kanaykipaq llapan shonquykiwan mañakuy.
4Yuraq qellayta y qorita ashinqaykinö yachayyuq kayta ashiy.
5Tsaynöpam Dios Yayata reqir paypita mantsakunaykipaq tantiyakunki.
6Yachayyuq kanaykipaqmi Dios Yaya yachayniki qarashunki.
Paypitaraqmi tantiyaytawan yachaytapis chaskinki.
7Pay munanqannö kawaqkunatam imaykapitapis tsapar cuidan.
Allillata rurar kawakuqkunatam yanapan.
8Payta cäsukuqkunatam imaypis cuidan.
Payllaman confiakuqkunatam imaypis rikan.
9Tsaynöpam allita y mana allitapis tantiyanki.
Tsaynöllam alli kaqkunata ruranaykipaqpis alcäbu kanki.
10Shonquykichö yachay kaptinmi kushishqa kawakunki.
11Yachayyuq karmi mana alli ruraykunaman mëtikunkitsu.
Tantiyakuq kaynikim mana allikunapita tsapäshunki.
12Yachayyuq karmi jutsata rurankitsu ni engañakuq runakunapis creyitsiyäshunkitsu.
13Tsay runakunam allita rurayanqanpa rantin mana alli ruraykunallaman umankuna churashqa kayan.
14Jutsata ruraskirmi alläpa kushikuyan.
Mana allikunata ruraskirmi makinkunatapis taqllarraq kushikuyan.
15Imaypis mana allikunata rurarllam puriykäyan.
Allikunata rurayanqanpa rantinmi mana allikunallata rurar kawayan.
16Yachayyuq karmi ollqunta mana respitaq warmipitapis witikunki.
Jichkallyaykachar parlapäshuptikipis cäsunkitsu.#Prov. 7.5.
17Tsay warmim jipashllaraq churakanqan ollqunta dëjaskir munanqanwan purikun.
Tsaynö purikurmi ollqunta imaypis respitananpaq Dios Yayapa puntanchö äninqantapis qonqaskin.
18Tsay warmiwanqa wañuyta ashiqnömi mëtikunki.
19Tsay warmiwan kakuqkunaqa imaypis alli kawayta manam tariyanqatsu.
20Hïju, Dios Yaya munanqannö kawakuqkunata rikar paykunanö kawakuy.
21Jutsata mana ruraq runakunam Dios Yaya entreganqan nacionchö atska wata kushishqa kawakuyanqa.
22Peru mana alli runakunawan Diosta äniskir mana cumpliqkunam sïqa illaqpita wañuyanqa.#Sal. 37.9.
Currently Selected:
Proverbios 2: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
