Proverbios 1
1
Kay libru imapaq kanqan
1Kaychömi qellqashqa kaykan Israel nacionpa mandakuqnin rey Salomón parlanqan proverbiukuna#1.1 Proverbiuqa wallka palabrallawan yätsikuymi kaykan.#1Rey. 4.32; Prov. 10.1; 25.1.. Paymi rey Davidpa tsurin karqan. 2Kay proverbiukunawanmi runakunata parlaparqan mas alli kawakuyänanpaq, mana allikunata mana rurayänanpaq, yätsikuykunata tantiyayänanpaq,#Stg. 1.5; 3.13-17. 3consejanqankunata chaskiyänanpaq, respitakuyänanpaq, allillata rurayänanpaq y formal runa kayänanpaq. 4Tsaynöllam kay proverbiukunawan parlaparqan mana tantiyaqkuna tantiyakuyänanpaq, jövinkuna y jipashkunapis alli yarpayyuq kawakuyänanpaq.
5Yachayyuq runaqa kay proverbiukunata chaskirmi tantiyakur mas yachayyuq kanqa. 6Tsaynöllam yachayyuq runakuna niyanqanta, iwalatsikuypa yätsikuyanqanta y aja tantiyaypaq niyanqantapis musyanqa.
7Yachayyuq kaytaqa qallaykuntsik Dios Yayapita mantsakurmi. Mana yachayyuq runaqa alli kawakuyta ni alli yachatsikuytapis manam chaskintsu.#Job 28.28; Sal. 111.10; Prov. 9.10; 15.33.
Jutsa ruraq runakuna yätsiyanqanta mana chaskinanpaq ninqan
8Hïju, taytayki yätsishunqaykita cäsukuy.
Mamayki yachatsishunqaykita ama qonqaytsu.
9Paykuna yachatsiyäshunqaykiqa corönanö y wallqanömi kaykan.#Prov. 6.20-21.
10Hïju, jutsa ruraqkuna inkitayäshuptiki ama cäsuytsu.
11Talvezchi niyäshunki:
<<Aku noqakunawan aywashun.
Tranquïlu purikuqkunata shuyaykur wañutsishun.
12Alli kawakuqkunata mana llakipaypa ushakätsishun.
Pïmaypa supayninta apatsishun.
13Imaykankunata suwapur rïcuyäshun.
Wajintsikchöpis manam ni ima faltämäshuntsu.
14Shamuy noqakunaman rïcuyänaykipaq.
Llapan suwakunqantsiktam rakipunakushun>>.
15¡Hïju, tsaynö niyäshuptikipis ama cäsunkitsu!
¡Mana allikunata yätsiyäshuptikiqa witikuy!#Sal. 1.1.
16Paykunaqa mana allita rurayänanpaqmi sas cörriyan.
Runakunata mana llakiparmi wañutsiyan.#Isa. 59.7; Rom. 3.15.
17Toqlla churashqata rikarqa pishqukunapis manam yaykuyantsu.
18Peru tsay runakunam sïqa mana tantiyakurnin kikinkunallapaq trampankuna churayan.
19Tsaynöllam alläpa ambiciösu kar rïcuyayllapaq yarparaykäyaptin supayninkuna apanqa.
Yachayyuq kananpaq yätsinqan
20Alli yachayqa willakuq runanömi cällikunachö y pläzakunachöpis willakun.
21Tsaynöllam markapa yaykunan punkukunachö y runakuna mas puriyänan cällikunachöpis willakur nin:#Prov. 8.1-3.
22<<Mana ni ima musyaq jövinkuna, allikunata rurayänaykipaq ¿imanirtan yarpachakuyankitsu?
Burlakuqkuna, ¿imanirtan runakunata asipäyanki?
Upa runakuna, ¿imayyaqtan mana tantiyakuyankitsu?
23Mana allikunata mana rurayänaykipaq consejayanqaqta shumaq chaskiyämay.
Chaskiyämaptikim yachayyuq kayänaykipaq tantiyatsiyäshayki.
24<<Tantiyatsiyänaqpaq qayayaptiqpis manam cäsuyämashkankitsu.
25Consejayanqaqtapis manam chaskiyämashkankitsu.
Tantiyatsiyaptiqpis manam cäsuyämashkankitsu.
26Tsaymi desgracia päsayäshuptiki llakipäyäshaykitsu.
Asikushaqmi alläpa mantsakaywan upilakashqa puriykäyanqaykita,
27ñakaykuna shamuptin alläpa mantsakäyanqaykita
y ni imanakaytapis mana puëdir llakikuyanqaykita.
Tsay desgraciakunam päsayäshunki shukukuy wayra imaykata apar ushakätsinqannö.
28<<Tsaynö päsayäshunqayki höra yanapayänaqpaq qayayämaptikipis manam cäsuyäshaykitsu.
Mayjina ashirpis manam tariyämankitsu.
29Desgraciam päsayäshunki yachayyuq kayta mana munayanqaykipita y Dios Yayapita mana mantsakuyanqaykipita.
30Qamkunam yätsiyanqaqtapis chaskiyashkankitsu.
Mana allikunata rurayaptiki consejayaptiqpis manam cäsuyämashkankitsu.
31Mana alli ruraq kayanqaykipitam sufriyanki.
Jutsata rurayanqaykitam alläpa pësakuyanki.
32<<Mana tantiyakuqkunam mana wiyakuq kayanqanpita wañuyanqa.
Juiciunnaq kaqkunam mana chaskikuq kayanqanpita ñakayanqa.
33Peru yätsinqäkunata chaskiqkunam sïqa alli kawakuyanqa.
Paykunatam ni ima desgraciapis päsanqatsu>>.
Currently Selected:
Proverbios 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
