Popular Bible Verses from Proverbios 2

Share

Yachayyuq kanaykipaqmi DIOS YAYA yachayniki qarashunki. Paypitaraqmi tantiyaytawan yachaytapis chaskinki.

Hïju, mandakunqäkunata shumaq cäsukuy. Mandamientükunata imaypis yarparay. Yachayyuq kanaykipaq cäsukuy. Alli yarpayyuq kanaykipaq imaypis yarparay. Cäsukuq kanaykipaq llapan shonquykiwan mañakuy. Yuraq qellayta y qorita ashinqaykinö yachayyuq kayta ashiy. Tsaynöpam DIOS YAYATA reqir paypita mantsakunaykipaq tantiyakunki.

Pay munanqannö kawaqkunatam imaykapitapis tsapar cuidan. Allillata rurar kawakuqkunatam yanapan. Payta cäsukuqkunatam imaypis cuidan. Payllaman confiakuqkunatam imaypis rikan.

Jutsata mana ruraq runakunam Dios Yaya entreganqan nacionchö atska wata kushishqa kawakuyanqa. Peru mana alli runakunawan Diosta äniskir mana cumpliqkunam sïqa illaqpita wañuyanqa.

Yachayyuq karmi ollqunta mana respitaq warmipitapis witikunki. Jichkallyaykachar parlapäshuptikipis cäsunkitsu. Tsay warmim jipashllaraq churakanqan ollqunta dëjaskir munanqanwan purikun. Tsaynö purikurmi ollqunta imaypis respitananpaq Dios Yayapa puntanchö äninqantapis qonqaskin.