Proverbios 15
15
1Mayjina rabyashqa kaptinpis alli shiminpa parlaparmi rabyayninta päsatsin.
Peru mana allikunata qayapänakurmi sïqa mas piñatsinakuyan.
2Yachayyuq runa parlaqta wiyarmi alli yachakuyan.
Peru mana yachayyuq runam sïqa shimin kamakanqanta parlan.
3 Dios Yayam maytsaychö kar alli ruraqta y mana alli ruraqtapis rikan.
4Parlashti runaqa runa majintam kushikatsin.
Peru mana alli parlaq runam sïqa pïmayta jaqayätsin.
5Mana tantiyakuq jövinqa taytan yätsinqanta manam chaskikuntsu.
Peru tantiyakuq jövinmi sïqa yätsinqanta chaskikun.
6Alli runapa wajinchöqa imaykanpis sobranmi.
Peru mana alli runapam sïqa imayka tarinqanpis saslla ushakaskin.
7Yachayyuq runam pïmaytapis parlayninwan imaykatapis alli tantiyatsin.
Mana yachayyuq runam sïqa alli kaqkunata tantiyatsinanpaq ni yarpayllapis yarpantsu.
8Mana alli ruraq runapa ofrendantaqa Dios Yaya manam chaskintsu.#Prov. 21.27.
Peru alli ruraq runa mañakunqantam sïqa kushishqa chaskin.
9Mana alli ruraq runapitam Dios Yaya alläpa rabyakun.
Peru pay munanqannö kawakuq runatam sïqa kuyan.
10Mana allikunata ruraq runataqa castiganqam.
Corrigiptinpis mana arrepentikuq runam jankat ushakanqa.
11 Dios Yayam musyan wañuqpa alman maychö kanqantapis.
Tsaytsuraq mana musyanmantsu runakunapa shonqun imata yarpanqantapis.
12Mana respitakuq runam corrigiyänanta munantsu.
Yachayyuq runawan juntakaytapis manam munantsu.
13Shonqun kushishqa kaptinmi qaqllanpis atsikyan.
Peru llakishqa kaptinmi sïqa qaqllanpis ishkipakashqa.
14Tantiyakuq runaqa imaykanöpa yachayyuq kaytam munan.
Peru mana tantiyakuq runam sïqa manakaqkunata parlar kushikun.
15Jaqayashqa runapaqmi llapan junaqkunapis mana allilla.
Peru kushishqa kawakuq runapaqmi sïqa llapan junaqpis allilla.
16Mas allim kanman riquëzapaq yarpachakur kawanqanpa rantin waktsa karpis Dios Yayapita mantsakur kawakunqan.#Sal. 37.16.
17Mas allim kanman töru aytsata mikurpis chikinakur kawanqanpa rantin imaykallatapis mikurnin kuyanakur kawakunqan.
18Sas rabyakuq runam piwanpis piñanakur purin.
Peru mana rabyakuq runam sïqa piwanpis tranquïlu kawakun.
19Qela runapaqmi imayka ruraypis kasha näninö.
Peru arukuq runapaqmi sïqa ima ruraypis pitsashqa näninö.
20Wamran yachayyuq kaptinmi taytantawan mamanpis kushikuyan.
Peru mana yachayyuq kaptinmi sïqa penqakuyan.#Prov. 10.1.
21Mana yachayyuq runam mana allikunata rurarpis kushikun.
Peru yachayyuq runam sïqa tantiyakuskir corrigikun.
22Yätsikuqkunata mana tapukur imatapis ruraptinmi imapis allitsu kanqa.
Peru yätsikuqkunata tapukur imatapis ruraptinmi sïqa llapanpis allilla kanqa.
23Tapukuyaptin alli tantiyatsirmi kushikun.
Tiempullanchö yätsinqanmi mas alli.
24Yachayyuq runam alli kawayta tarin.
Tsaynöpam wañuypitapis salvakan.
25Allish tukuqkunapa wajintaqa Dios Yayam ushakätsin.
Peru viüdakunapatam sïqa chakrankunatapis cuidan.
26Mana alli ruraq runapa yarpayninpitam Dios Yaya rabyakun.
Peru alli ruraq runa parlanqanpitam sïqa kushikun.
27Ayrajashqa runaqa castankunawan chikinakurmi kawan.
Peru mana chaskipakuq runam sïqa tranquïlu kawakun.
28Alli runam shumaqraq yarpachakun imata contestananpaqpis.
Peru mana alli runam sïqa shimin kamakanqanta imatapis parlan.#Prov. 19.28.
29Mana alli ruraq runa mañakuptin Dios Yaya manam cäsuntsu.
Peru alli runa mañakuptinmi sïqa sas wiyan.
30Kushishqata rikarmi pïmaypis kushikun.
Alli noticiata wiyaptinmi shonqunpis atsikyarkun.
31Yachayyuq runa yätsinqanta chaskiq runam yachayyuq kanqa.
32Corriginqanta mana chaskiq runam mana alli kawayman chanqa.
Peru corriginqanta chaskiq runam sïqa mas yachayyuq kanqa.
33 Dios Yayapita mantsakuq runaqa alli tantiyakuqmi.
Respitashqa kayta munarqa qollmi shonqum kanan.
Currently Selected:
Proverbios 15: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
