Proverbios 14
14
1Yachayyuq warmiqa wajinchö alli kawakuyänanpaqmi imaykatapis allillata ruran.
Peru mana yachayyuq warmim sïqa wajinchö täkuqkunawanpis jaqayätsinakuyan.
2Cäsukuq runaqa Dios Yayapitam mantsakun.
Peru mana cäsukuq runam sïqa Dios Yayatapis manakaqman churan.
3Mana yachayyuq runaqa imaykatapis allish tukurmi parlan.
Peru yachayyuq runam sïqa imaypis allillata parlan.
4Murukunanpaq yunta mana kaptinqa churakunanchö manam mikuypis kanqatsu.
Peru arukunanpaq yunta kaptinmi sïqa sobrat sobrat mikuypis kanqa.
5Mana llullakuq testïgum rasun kaqllata parlan.
Peru mana alli testïgum sïqa llullakur manakaqllata parlan.
6Yaqa runaqa tantiyakuq kayta munarpis manam puëdintsu.
Peru respitösu runam sïqa shumaq tantiyakun.
7Mana alli runawan purirmi imatapis allitaqa yachakunkitsu.
Payta qatiranqaykipa rantin witikuy.
8Tantiyakuq runam jutsata rurarpis tantiyakun.
Peru mana tantiyakuq runam sïqa jutsa ruranqantapis musyantsu.
9Mana tantiyakuq runam jutsata rurarpis aläbakun.
Peru tantiyakuq runam sïqa jutsata rurarpis Dios Yayata perdonta mañakun.
10Runaqa shonqun llakishqa kanqanta kikillanmi musyan.
Manam pipis musyantsu jukpa shonqun imanö kushishqa kanqanta.
11Mana alli ruraq runapa wajinchö täkuqkunam wakpa kaypa aywakuyanqa.
Peru alli ruraq runapa wajinchömi sïqa yanapanakur shumaq kawakuyanqa.
12Wakin kaq runakunam mana allikunata rurarpis allita ruraykäyanqanta yarpäyan.
Peru tsaynö kawaykarmi wañur ushakäyanqa.#Prov. 16.25.
13Wakinmi asikurpis shonqunkunachö llakishqa kayan.
Tsaymi kushikuykarpis waqayman churakäyan.#Ecl. 2.2.
14Mana alli ruraq runam mana allikunata rurarpis kushikun.
Peru alli ruraq runam sïqa allita ruranqanpita kushikun.
15Mana tantiyakuq runam pï ima ninqantapis sas creyin.
Peru alli tantiyakuq runam sïqa pitapis saslla creyintsu.
16Yachayyuq runam Dios Yayapita mantsakur jutsanta dëjan.
Peru mana yachayyuq runam sïqa ni imapita mana mantsakur jutsata ruran.
17Imallapitapis rabyaq runaqa mana allikunatam ruran.
Peru tantiyakuq runam sïqa imata niyaptinpis awantakun.
18Mana tantiyakuq runam imaypis mana alli rurayllachö kaykan.
Alli tantiyakuq runam sïqa mas yachayyuq tikran.
19Mana allita ruranqanta tantiyakurmi mana alli ruraq runapis alli runakunapa makinta mutsanqa.
Ni imanakayta mana puëdirmi puntanman qonqurikunqa.
20Waktsataqa imanpis mana kaptinmi kuyay amïgunkunapis ajayaskiyan.
Peru rïcukunatam sïqa riquëzan rayku pïmaypis kuyar qatiran.
21Runa majinta chikiq kaqmi jutsata ruran.
Peru waktsakunata yanapaq runatam sïqa Dios Yaya yanapan.#Sal. 41.1.
22Mana allikunata rurananpaq yarpaq runam allitsu kawakun.
Peru allillata rurananpaq yarpaq runatam sïqa pïmaypis kuyar yanapan.
23Arukuq runapam imaykanpis kan.
Parlakurlla shuyaraq runam waktsayan.
24Yachayyuq runakunapam yachayyuq kaynin corönan.
Mana yachayyuq runakunapam sïqa upa kaylla corönan.
25Rasun kaqllata parlaq testïgum pitapis salvan.
Peru mana alli testïgum sïqa pitapis wañuyman qarpun.
26Paypita mantsakuq runatam kikintawan wamrankunata Dios Yaya yanapan.
27 Dios Yayapita mantsakuq runam alli kawayta tarin.
Tsaynöpam wañuypitapis qeshpin.#Prov. 13.14.
28Mandakunqan nacionchö atskaq runakuna kaptinmi rey kushikun.
Peru wallkaqlla kayaptinmi sïqa llakikun.
29Tantiyakuq runaqa saslla manam rabyakuntsu.
Peru mana tantiyakuq runam sïqa imallapitapis rabyan.
30Alli shonqu runaqa sänum kawakun.
Peru chiki runam sïqa qeshyapäkurlla kawan.
31Waktsata sufritsiq runam kamakuq Dios Yayata rabyatsin.
Peru waktsata yanapaq runam sïqa Dios Yayata respitan.
32Yaqa runam mana allikunata ruranqanpita mana alli kawan.
Peru alli ruraq runam sïqa allillata ruranqanpita tranquïlu kawakun.
33Yachayyuq runam shumaq tantiyakun.
Peru mana tantiyakuq runam sïqa imatapis tantiyantsu.
34Juk nacionchö respitanakur shumaq kawakurmi pïmaypis kushikun.
Peru jutsata rurar kayaptinmi sïqa tsay nacionta manakaqman churayan.
35Serviqnin cäsuptinmi rey kuyan.
Peru mana cäsukuptinmi sïqa rabyakun.
Currently Selected:
Proverbios 14: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
