Filipenses 3
3
Jesucristuman confiakur salvakunapaq ninqan
1Wawqikuna y panikuna, Dios Yayapa poderninchö kawakuykarqa kushikuyay. Alli kawakuyänaykipaq yapay yapay qellqamuyta manam ajayätsu. Tsaynö qellqamunqämi qamkunapaq alli kaykan.
2Mana alli yachatsikuqkunapita cuidakuyay. Tsay allqukunam niyan: <<Dios Yaya salvayäshunaykipaqqa cuerpuykikunataraq roqur señalakuyay>>.
3Cuerpuntsikchö mana señalashqa karpis Espíritu Santu yanapamashqam Dios Yaya serviqkuna shonquntsikchö señalashqana kaykantsik.#3.3 Cuerpunta señalarmi penqayninpa punta qaranta roqur jipiyaq. Tsaynöllam shonqunkunata señalarqa jutsankunata dëjayan.#Jer. 4.4; Rom. 2.28-29; Gál. 6.15; Col. 2.11-13. Tsaynöllam leykunata cumplirraqtsu salvakantsik, sinöqa Jesucristuman creyikurmi.
4Leykunata cumplir salvakäna kaptinqa tsayllawannam salvakäman karqan. Noqanöqa manam ni pipis leykunata cumplishqatsu. 5Leykuna mandakunqannömi yurinqäpita pusaq junaqyuq kaykaptï señalatsiyämarqan.#Lev. 12.3. Tsaynöllam Benjamín trïbupita Israel runa kä.#Rom. 11.1. Manam ni mayqan hebreo runa majïpis noqanöqa cumplishqatsu. Fariseo karmi Dios Yayapa leyninkunata imaypis cumplishkä.#Hech. 23.6; 26.5. 6Dios Yaya munanqannö ruraykanqäta yarparmi Jesucristuman creyikuqkunata chikirnin qatikacharqä.#Hech. 8.3; 9.1-2; 22.4; 26.9-11. Tsay leykuna mandakunqankunatam mana juk pantar cumplirqä.
7Tsaynö cumplinqä llapanpitapis mas alli kanqantam yarparqä. Peru kananmi sïqa noqantsik rayku Jesucristo wañunqanta musyar tsay cumplinqäkuna imapaqpis mana välinqanta tantiyä. 8Rasun kaqtaqa Señornï Jesucristuta reqinqämanqa manam ni imapis iwalantsu. Tsaymi ñawpata ruranqäkunaman confiakunqäpa rantin Jesucristullamanna confiakü. Ñawpata ruranqäkunaqa manam imapaqpis servimantsu. 9Manam leyninkunata cumplinqäpitatsu munanqanta ruraqtanö Dios Yaya chaskimashqa, sinöqa Jesucristuman creyikunqäpitam.
10Jesucristutam mas reqiyta munä. Payta Dios Yaya poderninwan kawatsimunqannö noqatapis tsay poderninwan yanapamänantam munä. Tsaymi Jesucristo ñakanqannö ñakarpis y payta wañutsiyanqannö wañutsiyämaptinpis pay cäsukunqannö cäsukushaq. 11Tsaymi shuyaykä Jesucristuta Dios Yaya kawatsimunqannö noqatapis wañuptï kawatsimänanta.
Dios Yaya munanqannö kawakunapaq ninqan
12Manam jutsannaq santu kanqätatsu nikä, sinöqa Jesucristo munanqannö kawakunäpaqmi waran waran sïguiykä. Tsaynö kawakunäpaqmi Jesucristo salvamashqa.
13Wawqikuna y panikuna, manam Dios Yaya munanqannötsu llapanta ruraykä. Peru unay kawanqäta yarparanqäpa rantinmi waran waran Dios Yaya munanqannö kawakunäpaq yarparaykä. 14Premiuta chaskinanpaq llallinakur cörriqnömi noqapis Dios Yayapa ñawpanman chänäpaq pay munanqannö kawaykä. Tsayman chänäpaqmi Jesucristo rayku Dios Yaya qayamashqa.
15Jesucristuman firmi creyikuqkuna, ninqäkunata tantiyakuyay. Tantiyayta mana puëdiyaptikim Dios Yaya tantiyatsiyäshunki. 16Peru imanö kaptinpis Jesucristo munanqannölla kawakushun [y tsay yarpaylla kashun.]
17Wawqikuna y panikuna, imanö kawakunqäta rikäyämay.#1Cor. 4.16; 11.1. Noqakuna kawayanqänö kawaqkunapitapis yachakuyay. 18Wakin kaq runakunaqa mana allita rurarmi Jesucristo cruzchö wañunqantapis manakaqman churayan. Tsaynö kayanqantam atska kutina niyashkaq. Tsaynöllam kananpis waqar willayaq. 19Tsay mana alli yachatsikuqkunam Jesucristo munanqannö kawayanqanpa rantin shonqunkuna yarpanqannölla kawayan. Mana allikunata rurayanqanpita penqakuyanqanpa rantinmi aläbakuyan. Kay patsachö ushakaqkunallapaqmi yarpachakuyan. Tsay runakunaqa infiernuman jitarpushqam kayanqa.
20Peru noqantsikpa markantsikmi sïqa gloria kaykan. Tsaymi salvamaqnintsik Señor Jesucristo gloriapita kutimunanta shuyaraykantsik. 21Paymi poderösu kayninwan ushakaq cuerpuntsikta mushuq cuerpuman tikratsinqa. Tsay mushuq cuerpuntsikmi kikinpa cuerpunnö imaypis mana ushakaq kanqa.#1Juan 3.2.
Currently Selected:
Filipenses 3: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.