Filipenses 2
2
Wakinkunata alli rikänapaq yätsinqan
1Jesucristupa poderninchö karmi alli kawakuntsik. Pay kuyamashqam kushishqa kawakuykantsik. Espíritu Santum imaypis noqantsikwan kaykan. Juknin jukninwanpis llakipänakur y kuyanakur kawakunapaqmi Dios Yaya tantiyatsimantsik. 2Tsaynö kaykaptinqa llapaykipis juk yarpaylla y juk shonqulla imaypis kuyanakur kawakuyay. Tsaynö kawakuyanqaykita musyarmi alläpa kushikü.
3Ama runa majikiwan chikinakuyaytsu ni musyaq tukuyaytsu, sinöqa pïmaytapis respëtuwan rikäyay. 4Kikillaykikuna alli kawayänaykipaq yarpachakuyanqaykipa rantin wakin kaqkunapis alli kawayänanpaq yarpachakuyay. 5Jesucristo kawanqannö qamkunapis kawakuyay.
6Payqa Dios kaykarpis#Juan 1.1-3; Col. 1.15. manam ciëlullachötsu täkurqan.
7Poderösu kayninta dëjaskirmi imayka servikuq runanölla kananpaq noqantsiknö yurirqan.
8Runa karmi Dios Yaya munanqanta rurar cruzchö wañurqan.#Mat. 26.39; Juan 10.18; Heb. 5.8.
9Tsaynöpam Dios Yaya payta churashqa llapanpita mas poderösu kananpaq.
Paypam shutin churarqan llapanpitapis mas poderyuq kaqta.#Heb. 2.9; 12.2.
10Tsaymi ciëluchö kaqkuna, kay patsachö kaqkuna y infiernuchö kaqkunapis Jesucristuman qonqurpakuyanqa.
11Tsaychömi pïmaypis niyanqa Jesucristo Señornintsik kanqanta.
Tsaynö nirmi Dios Yayata llapanpis alabayanqa.#Isa. 45.23.
Dios Yaya munanqannö kawakunapaq ninqan
12Kuyashqa wawqikuna y panikuna, tsaynö kaykaptinqa qamkunawan kaykar yachatsiyanqaqta cäsuyämanqaykinölla mana rikäyaptiqpis cäsuyämay. Salvashqana kayanqayki musyakänanpaqqa Dios Yayapita mantsakur llapan shonquykikunawan pay munanqannö kawakuyay. 13Pay munanqannö kawakuyänaykipaqmi kikin animatsiyäshunki y poderta qarayäshunki.
14Mana piñanakur y mana rimanakur imaypis kawakuyay. 15Tsaynö kawakuyaptikim Dios Yayapa wamrankuna kayanqaykita tantiyar ni pipis rimaykäyäshunkitsu. Tsaymi mana cäsukuqkunapa markanchö täkurpis#Deut. 32.5. tutapaychö aktsinö kayanki.
16Salvakunapaq willakuyta imaypis cäsuyay. Tsaymi Jesucristo kutimuptin willakuyninta allipaq willakunqäpita alläpa kushikushaq.
17Tsaynö kaptinmi wañutsiyämänan kaptinpis kushikü. Wañutsiyämaptinmi sacrificiu jananman vïnuta wiñayanqannö kashaq. Dios Yayata firmi serviyanqaykipis sacrificiunö kaptin qamkunapis kushikuyay. 18Noqa kushikunqänölla qamkunapis kushikuyay.
Timoteuta Filipos markaman Pablo mandananpaq ninqan
19Señor Jesucristo permïtiptinqa Timoteutam#Hech. 16.1-3. prontu kachamushaq. Qamkuna kaqpita kutiskamur imanö kaykäyanqaykita willamaptinmi kushikushaq. 20Timoteunöqa manam pipis kantsu. Payllam qamkunapaq noqanö yarpachakun. 21Wakin kaqkunaqa Jesucristo munanqanta rurayanqanpa rantinmi kikinkuna yarpayllankunata rurayan.
22Qamkuna musyayankim Dios Yaya munanqannö Timoteo kawakunqanta. Paymi imayka tsurïnö Jesucristupa alli willakuyninta willakunäpaq yanapaykäman. 23Tsaymi prësu kanqäpita yarqamunä o mana yarqamunä kanqantapis musyaskirraq kachamushaq. 24Dios Yayamanmi confiakü qaykuranqäpita yarqaskamur kikïpis watukaqnikikuna shamunäpaq kanqanta.
Filipos markaman Epafrodituta mandananpaq ninqan
25Wawqintsik Epafroditutam qamkuna kaqman kachamushaq. Alläpa allim payta kachayämushkanki. Dios Yayapa soldädunnö karmi imaykata sufrirpis yanapamashqa. 26Qeshyaptin llakikuyanqaykita musyaskirmi qamkuna kaqpa kutimuyta munaykan. 27Rasunpam alläpa qeshyar cäsi wañushqa. Wañuykaqtanam Dios Yaya llakipar kutikätsishqa. Tsaynöpam paypaq mana llakikunäpaq Dios Yaya llakipämashqa.
28Tsaymi payta rikaykurnin kushikuyänaykipaq sasllana kachamushaq. Tinkuskir kushikuyaptikim llakikushaqnatsu. 29Chämuptin Señor Jesucristupa shutinchö kushishqa chaskiykuyällanki. Paynö alli yanapakuqkunataqa llapantapis respitayanki. 30Jesucristuta servir qamkunapa rantikikuna yanapamanqanchömi cäsi wañushqa.
Currently Selected:
Filipenses 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.