Filipenses 4

Kushishqa kawanapaq ninqan

1Kuyashqa wawqikuna y panikuna, alläpa kuyayarnikim watukaqnikikuna shamuyta munaykä. Qamkunam premiuta chaskinqä corönänö kaykäyanki. Yätsiyanqaqnö kawakuyaptikim alläpa kushikü. Señor Jesucristo munanqannö imaypis kawakuyay.

2Evodiata y Síntiquitam alläpa rugamü Señor Jesucristuman creyikuykarqa juk shonqulla kawakuyänanpaq. 3Willakuq majï, qamtapis alläpam rugamuq tsay warmikunata shumaq tantiyaykatsinaykipaq. Jesucristupa willakuyninta Clementiwan y wakin willakuq majïkunawan willakuyaptïmi tsay warmikuna allish yanapayämashqa. Paykunapa shutinkunam Libru de la Vïdachö apuntashqana kaykan.

4Jesucristupa poderninchö kawaykarqa imaypis kushikuyay. Yapaymi niyaq: ¡Kushikuyay!#1Tes. 5.16. 5Alli runa kayanqaykita pïmaypis musyayätsun. Señor Jesucristo kutimunanpaq ichikllanam faltaykan.

6Ama imapaqpis yarpachakuyaytsu, sinöqa Dios Yayata agradëcikur llapanchöpis yanapayäshunaykipaq mañakuyay.#Col. 4.2-4; 1Tes. 5.17-18. 7Tsaynö mañakuyaptikim Dios Yaya alli kawayta qarayäshunki. Paymi shonquykikunata y yarpaynikikunata cuidanqa Jesucristuman confiakur mana llakikuyänaykipaq. Tsaymi imanir kushishqa kawayanqaykita pipis tantiyanqatsu.

8Wawqikuna y panikuna, rasun kaqkunapaq, alli ruraykunapaq y alli kawaypaq imaypis yarpachakuyay. Imapis alli kaptin o alabanapaq kaptinqa tsaykunapaqpis yarpachakuyay. 9Yachatsiyanqaqnölla tantiyatsiyanqaqnölla, wiyayämanqaykinölla y imanö kawanqäta rikäyämanqaykinölla qamkunapis kawakuyay. Tsaynö kawakuyaptikim Dios Yaya yanapayäshunki alli kawakuyänaykipaq.

Pablo agradëcikunqan

10Wawqikuna y panikuna, apatsikayämunqaykita chaskiskirmi Dios Yayata alläpa agradëcikü. Manaraq chaskirpis musyashkämi mana qonqayämanqaykita. Yanapayämayta munarpis karuchö karmi puëdiyämushkankitsu. 11Manam faltapukurtsu tsaynö niyaq. Imaykata päsarpis kapamanqallanwanmi kushishqa kawakuyta yachakushkä. 12Musyämi rïcu kay y waktsa kay imanö kanqantapis. Imanö kawarpis contentakuytam yachakushkä. Tsaymi kushishqalla kawakü pacha juntapis, mallaqarpis, rïcu o waktsa karpis. 13Imanö karpis Jesucristo yanapamaptinmi alli kawakuykä. 14Tsaynö kaptinpis wananqä höra apatsikayämunqaykita chaskiskirmi alläpa kushikushkä.

15Filipos markachö wawqikuna y panikuna, musyayanqaykinöpis Jesucristupa alli willakuyninta willakuq Macedonia provinciapita aywaptï wakin iglesiakuna mana yanapayämaptinpis qamkunallam imayka wananqäkunachö yanapayämashkanki. 16Tesalónica#Hech. 17.1. markachö kaptïpis yapay yapaymi wananqäkunapaq apatsikayämushkanki.#2Cor. 11.9. 17Manam yapay apatsikayämunaykita munartsu tsaynö niyaq, sinöqa yanapakuq kayanqaykipita mas bendicionta chaskiyänaykita munarmi.

18Epafrodituwan apatsikayämunqayki llapan wananqäkunapaq paqtaptinmi imäpis faltämantsu. Tsay apatsikayämunqaykim Dios Yayapaq mushkuq sacrificiunö kashqa.#Éxo. 29.18. 19Jesucristo noqantsik rayku wañunqanpitam gloriachö riquëzankunapita Dios Yaya qamkunatapis llapan wanayanqaykita qarayäshunki. 20¡Taytantsik Dios Yaya imaypis alabashqa kaykullätsun! Amén.

Cartapa ushanan

21Qamkuna kaqchö llapan wawqikunata y panikunata saludaykuyällay. Kaychö paqtä kaykaq wawqintsikkuna y panintsikkunam saludayämushunki. 22Tsaynöllam kay markachö creyikuq majintsikkunapis alläpa kushishqa saludayämushunki. Mas mandakuq Césarpa wajinchö aruq wawqintsikkuna y panintsikkunam saludayämushunki.

23Señornintsik Jesucristo llapaykita llakipaykuyälläshuy. [Amén.]

Currently Selected:

Filipenses 4: qxn

Highlight

Copy

Compare