Marcos 4

Murukuq runaman Jesús iwalatsinqan

Mateo 13.1-9; Lucas 8.4-8

1Tsaypitanam qocha kuchunchö yapay Jesús yachatsikur qallaykurqan. Tsayman atskaq runakuna qorikäyaptinmi qocha kuchunchö kaykaq büquiman lätarkur jamaykurqan.#Luc. 5.1-3. 2Tsaypitanam imamanpis iwalatsiypa atska yachatsikuykunata yachatsikur nirqan: 3<<Shumaq wiyayämay. Juk runash trïgu muruq aywanaq. 4Muruta maqtsiptinshi näniman wakin shikwanaq. Tsaytash pishqukuna shamur upshaskiyänaq. 5Wakin kaq murunash shallamaman shikwanaq. Tsaychö allpa mana kaptinshi sas jeqamurpis 6jawan mana kaptin achaywan tsakiskinaq. 7Wakin murunash kashakuna rurinman shikwanaq. Jeqamurpis kashakuna wiñar qopiptinshi wayunaqtsu. 8Peru wakin murunash sïqa alli allpaman shikwanaq. Tsaychö alli wiñämurshi alli espïgayuq kayänaq. Wakin espïgash kimsa chunka (30) trïguta wayunaq, wakin espïgash soqta chunka (60) trïguta wayunaq y wakinnash pachak (100) trïguta wayunaq>>.

9Tsaynö yachaskatsirmi Jesús nirqan: <<Rinriyuq kaqkunaqa ninqäkunata wiyakuyätsun>>.

Iwalatsiypa imanir yachatsinqanta Jesús tantiyatsinqan

Mateo 13.10-17; Lucas 8.9-10

10Tsaypita runakuna aywakuyaptinnam Jesús quëdarqan chunka ishkay discïpulunkunawan y tsaychö kaykaq wakin runakunawan. Paykunam tsay yachatsinqanta tantiyatsinanpaq Jesústa mañakuyarqan.

11Jesúsnam nirqan: <<Qamkunatam Dios Yayapa mandakuynin imanö kanqanta shumaq tantiyatsiyäshayki. Peru wakintam sïqa imamanpis iwalatsir tantiyatsï. 12Tsaymi rikarpis cuentata qokuyantsu y wiyaykarpis tantiyayantsu. Tantiyakurqa jutsankunapita arrepentikurmi perdonashqa kayanman>>.#Isa. 6.9-10.

Murukuqman iwalatsinqanta Jesús tantiyatsinqan

Mateo 13.18-23; Lucas 8.11-15

13Tsaymi Jesús nirqan: <<Tsay yachatsiyanqaqta ¿manaku tantiyayanki? Tsaykunallatapis mana tantiyaykarqa ¿imanöraq wakin kaqkunata tantiyayankiman?

14<<Murukuq runaqa Dios Yayapa willakuyninta willakuqmi kaykan. 15Wakin runakunaqa chukru näninömi kayan. Tsaymi Dios Yayapa willakuyninta wiyaptinpis Satanás shamur wiyayanqantapis qonqaskatsin.

16<<Wakin runakunaqa shallama chakranömi kayan. Paykunam Diospa willakuyninta wiyar kushishqa chaskiyan. 17Peru kushishqa chaskirpis Dios Yayaman shumaq mana creyikurmi jawäkuyta mana puëdiq trïgunö kayan. Tsaymi Diospa palabranta chaskiyanqanpita runakuna chikiyaptin o ñakaykuna shamuptin creyikuyninta dëjaskiyan.

18<<Wakin runakunaqa kasha chakranömi kayan. Paykunaqa Diospa willakuyninta wiyarpis 19kay vïdachö imaykapaq llakikur y rïcu kayllapaq yarpachakurmi Diospa willakuyninta qonqaskir mana wayuq trïgunö kayan.

20<<Peru wakin runakunam sïqa alli allpanö kayan. Paykunam Dios Yayapa willakuyninta chaskir Dios Yaya munanqannö kawakuyan. Tsaymi alli allpachö juk murullapita kimsa chunka (30) trïgu o soqta chunka (60) trïgu o pachak (100) trïgu wayunqannö kayan>>.

Willakuyninta aktsiman Jesús iwalatsinqan

Lucas 8.16-18

21Tsaypitanam Jesús nirqan: <<Pipis aktsita tsarirkatsir ¿cajón rurinman o kawitu qopinman pakanmantsuraq? ¿Manaku llapanta atsikyänanpaq alayriman churan?#Mat. 5.15; Luc. 11.33. 22Tsaynömi yachatsikunqäkuna kanan pakaraqnö karpis musyakanqa. Kanan mana tantiyakarpis waraykunam tantiyakanqa. 23Rinriyuq kaqkunaqa ninqäkunata wiyakuyätsun>>.

24Jesús mastam nirqan: <<Ninqäkunata shumaq cäsukuyay. Cäsuyanqaykimanmi masta yachakuyänaykipaq Dios Yaya yanapayäshunki. [Shumaq wiyakuyaptikiqa] mastaraqmi tantiyatsiyäshunki. 25Yachatsinqäta cäsuqkunaqa masmi tantiyayanqa. Peru mana cäsuqkunam sïqa ichiklla tantiyayanqantapis qonqaskiyanqa>>.#Mat. 13.12; 25.29; Luc. 19.26.

Trïgu muruman Jesús iwalatsinqan

26Tsaypitanam Jesús nirqan: <<Dios Yayapa mandakuyninqa juk runa trïguta murunqannömi kaykan. 27Muruskir puñuptin rikchaptinpis paqaspa junaqpapis murunqan wiñanmi. Imanö wiñanqanta tsay runa mana tantiyaptinpis 28tsay trïgu puntata qewanölla jeqamun. Wiñarkurnam espigar poqun. 29Poquskiptinnam cosechar ösiwan qorin>>.#Joel 3.13.

Mostäza muruman Jesús iwalatsinqan

Mateo 13.31-32; Lucas 13.18-19

30Jesús mastam nirqan: <<Dios Yayapa mandakuyninta ¿imamanraq iwalatsïman? ¿Ima iwalatsikuywanraq tantiyatsïman? 31Dios Yayapa mandakuyninqa mostäza muruta juk runa chakranman murunqannömi. Llapan murupitapis mas ichikllam kaykan. 32Peru ichiklla kaykarpis wiñämurmi wakin qorakunapitapis mas jatun kaykan. Tsaymi rämankunachö pishqukunapis qeshunkuna rurayan>>.#4.32 Tsaynö nirmi Jesús nirqan: Ichik murullapita mostäza jeqarkamur wiñanqannömi Dios Yayapa willakuynin maytsaymanpis chanqa.

Imapaq iwalatsiypa Jesús yachatsikunqan

Mateo 13.34-35

33Tsaynöpam runakuna tantiyayanqanmannö Dios Yayapa willakuyninta imamanpis iwalatsiypa Jesús yachatsikurqan. 34Imamanpis mana iwalatsiypaqa imaypis manam yachatsikurqantsu. Peru discïpulunkunatam sïqa kikillankuna kayanqan höra llapanta tantiyatsiq.

Wayrapaqwan yakupaqqa Jesús poderyuq kanqan

Mateo 8.23-27; Lucas 8.22-25

35Tsay junaq patsa qoyaykaptinnam#4.35 Wakin runakunaqa patsa tsakaykaptinnam niyan. discïpulunkunata Jesús nirqan: <<Wak tsimpaman päsashun>>.

36Tsaynö nirmi tsaychö kaykaq runakunata jaqiskir büquiwan wak tsimpaman aywayarqan. Wakin runakunapis büquinkunawanmi aywayarqan. 37Qochata tsimpaykäyaptinmi alläpa wayra qallaykurqan. Yakupis laqchikarmi büquita tallpukaykätsirqanna. 38Jesúsnam büquipa qepa kuchuchö jawnata jawnakurkur puñukashqa kaykarqan. Tsaymi discïpulunkuna alläpa mantsakashqa Jesústa rikchatsir niyarqan: <<¡Rabí, tallpukaykantsiknam! ¿Imanirtan puñukunki?>>

39Tsaymi Jesús sharkur wayratawan yakuta piñapar nirqan: <<¡Upälla kay!>> Tsaynö piñapaptinmi jina höra wayrapis yakupis päraskirqan. 40Tsaypitanam discïpulunkunata nirqan: <<¿Imanirtan mantsakashqa kaykäyanki? ¿Manaku noqaman confiakayämunki?>>

41Tsaymi kikinkunapura mantsakashqa ninakuyarqan: <<Yakupis wayrapis tsaynö cäsunanpaqqa ¡pitan kay runaqa!>>

Currently Selected:

Marcos 4: qxn

Highlight

Copy

Compare