Marcos 3

Makin wañushqa runata jamay junaqchö Jesús kutikätsinqan

Mateo 12.9-14; Lucas 6.6-11

1Juk kutim sinagögaman Jesús yapay yaykurqan. Tsaychömi makin tsakishqa runapis kaykarqan. 2Tsaymi Jesústa rikaraykäyarqan jamay junaqchö kutikätsiptin tsay achäquilla contran shäriyänanpaq.

3Jesúsnam makin tsakishqa runata nirqan: <<Runakunapa puntanman ichiy>>.

4Tsaypitanam runakunata tapurqan: <<Jamay junaqchö ¿allitaku o mana allitaku rurashwan? Runa majintsikta ¿salvashwanku o <wañutsunpis> nishwanku?>>

Tsaynö niptin manam ni ima niyarqantsu. 5Tsaymi paykunata Jesús rabyashqa rikaskirqan. Mana llakipäkuq kayanqanta musyarmi alläpa llakikur makin wañushqa runata nirqan: <<¡Makikita lamkamuy!>>

Lamkarkuptinmi makin kutikaskirqan. 6Tsaymi fariseukuna yarquskir Herodespa favornin shäriqkunawan Jesústa wañutsiyänanpaq willanakuyarqan.

Atskaq runakuna qocha kuchunman qorikäyanqan

7Tsaypitanam qocha kuchunman discïpulunkunawan Jesús aywarqan. Qepantanam maytsikaq runakuna Galileapita y Judeapita aywayarqan. 8Tsaynöllam Jesús ruranqankunata musyaskir Jerusalénpita, Idumeapita, Jordán mayu wak tsimpanpita, Tiro markapita y Sidón markakunapitapis maytsikaq runakuna aywayarqan. 9Tsaymi discïpulunkunata Jesús nirqan: <<Runakuna juntäyämuptin lätanäpaq büquita listullana kaykätsiyay>>.

10Atskaq runakunata kutikätsishqa kaptinmi llapan qeshyaqyashakuna imaykanöpapis Jesústa yataykuyta munayarqan.#Mar. 4.1; Luc. 5.1-3.

11Jesústa rikaykurmi supaykuna löcuyätsinqan runakunapis puntanman pelatakuykur jinchi niyarqan: <<¡Qamqa Diospa Tsurinmi kanki!>>

12Tsaynö niyaptinmi paykunata Jesús ollqutuparqan pï kanqantapis mana willakuyänanpaq.

Chunka ishkay apostolninkunata Jesús akranqan

Lucas 6.12-16

13Tsaypita jirkaman Jesús witsarkurmi wakin discïpulunkunata shutinkunapa qayarqan. 14Tsay qayanqan discïpulunkunam chunka ishkay apostolninkuna kayarqan. Paykunatam qayarqan paqtan puriyänanpaq, Dios Yayapa willakuyninta willakuyänanpaq, 15[qeshyaqyashakunata kutikätsiyänanpaq] y runakunapita supaykunata qarquyänanpaq. 16Paykunam kayarqan Simón (paypa shutintam cambiatsirqan Pedro kananpaq) 17y Zebedeupa tsurinkuna Santiaguwan Juan. Santiagutawan Juantam kuyay shutin churarqan Boanergesta. Boanerges ninqanqa <<maqakuypa tsurinkuna>> ninanmi. 18Wakin kaqkunam kayarqan Andrés, Felipe, Bartolomé, Mateo, Tomás, Alfeupa tsurin Santiago, Tadeo, Zelote niyanqan Simón 19y Jesústa rantikuq Judas Iscariote.

Jesúspa contran parlayanqan

Mateo 12.22-32; Lucas 11.14-23; 12.10

20Tsaypita juk wajiman Jesús yaykuptinmi tsaymanpis atskaq runakuna qorikäyarqan. Tsaymi discïpulunkunawan mikuyänanpaqpis tiempun karqantsu. 21Jesús tsaynö kanqanta ayllunkuna musyaskirmi löcuyashqa kanqanta yarpar qoriq aywayarqan.

22Tsay junaqkunam ley yachatsikuqkuna Jerusalénpita chaykur niyarqan: <<Kay runaqa supaykunapa mandaqnin Beelzebúpa#3.22 Beelzebúqa Satanáspa jukaq shutinmi. poderninwanmi supaykunata qarqun>>.#Mat. 9.34; 10.25.

23Tsaynö niyaptinmi tsay runakunata qayaskir Jesús iwalatsiypa nirqan: <<¿Imanöpatan Satanás kikinta qarqukunman? 24Juk nacionchö runakuna kikinkunapura chikinakurqa ¿manatsuraq wañutsinakur ushakäyanman? 25Juk wajichö täkuqkunapis chikinakurqa ¿manatsuraq wakpa kaypa aywakur ushakäyanman? 26Tsaynöllam Satanáspis kikinpa contran shärirqa ushakäyanqa. 27Kallpasapa runata manaraq pankirqa manam ni pipis wajinman yaykur imantapis apanmantsu. Peru pankiskirmi sïqa imantapis apanman.#3.27 Kallpasapa runamanmi Satanásta iwalatsin. Imankunamanmi poderninchö katsinqan runakunata iwalatsin. Satanásta pankiq runamanmi Jesucristo kikinta iwalatsikun. Tsaynömi tantiyatsikurqan Satanáspita mas poderyuq kanqanta.

28<<Rasun kaqtam niyaq: Runakuna jutsata rurayanqanta y Diospa contran parlayanqantam Dios Yaya perdonanqa. 29Peru Espíritu Santupa contran parlayanqantam sïqa imaypis perdonanqatsu>>.#3.29 Espíritu Santuqa jutsantsikta dëjaskir Jesucristuta chaskikunapaqmi tantiyatsimantsik (Juan 16.8-11). Tsaymi Espíritu Santupa contran parlarqa pay tantiyatsinqanta mana chaskikur Jesucristuman imaypis creyintsu (Hech. 7.51). Peru Jesucristuman creyiq kaqmi sïqa perdonashqa kanqa.#Luc. 12.10.

30Tsaynömi Jesús nirqan: <<Supaymi yanapan>> niyaptin.

Jesúspa maman y wawqinkuna pikuna kayanqan

Mateo 12.46-50; Lucas 8.19-21

31Tsaypitanam Jesúspa mamanwan wawqinkuna wajiman chaykur waqtallapita Jesústa qayatsiyarqan. 32Tsaymi Jesúswan jamaykaqkuna willayarqan: <<Mamaykiwan wawqikikunam waqtachö shuyaykäyäshunki>>.

33Jesúsnam nirqan: <<Mamä y wawqïkuna ¿pikuna kayanqanta musyayankiku?>>

34Tsaynö nirmi paywan jamaykaqkunata rikaskir nirqan: <<Kaychömi mamäwan wawqïkuna kayan. 35Pipis Dios Yaya munanqannö kawaq kaqmi wawqï, panï y mamä kayan>>.

Currently Selected:

Marcos 3: qxn

Highlight

Copy

Compare