Marcos 16

Wañunqanpita Jesús kawamunqan

Mateo 28.1-8; Lucas 24.1-12; Juan 20.1-10

1Jamay junaq päsaskiptinnam María Magdalena, Santiagupa maman María y Salomépis mushkuq jachakunata rantiyarqan Jesúspa ayanman wiñäyänanpaq. 2Tsaymi domingu alliq rupay yarqaykämuptin Jesús pamparanqanman aywayarqan. 3Nänita aywaykarmi niyarqan: <<¿Piraq sepultüra tsaparaq rumita kichapamäshun?>>

4Chaykurnam tariyarqan sepultüra tsaparaq jatun rumi wititsishqana kaykaqta. 5Sepultüra rurinman yaykuskirnam rikäyarqan juk jöven yuraq llatapashqa derëcha kaqlächö jamaykaqta. Payta rikaykurmi alläpa mantsakäyarqan. 6Tsay jövinnam nirqan: <<Ama mantsakäyaytsu. Musyämi crucificar wañutsiyanqan Jesústa rikaq shayämunqaykita. Payqa manam kaychönatsu. ¡Kawamushqanam! Maski rikäyay mayman churayanqantapis.

7<<Kanan aywar Pedruta y wakin discïpulukunata willayay Galileaman puntaykanqanta. Puntata ninqannöllam tsaychö paykunawan tinkuyanqa>>.#Mat. 26.32; Mar. 14.28.

8Tsaynö niptinmi warmikuna mantsakaywan tsuktsukyarraq saslla aywayarqan. Mantsakashqa karmi rikäyanqanta ni pitapis willayarqantsu.

María Magdalenata Jesús yuripunqan

Mateo 28.9-10; Juan 20.11-18

9[Domingu alliq Jesús kawaskamurmi María Magdalenata puntata yuripurqan. Paypitam qanchis supaykunata qarqushqa karqan. 10Yuripuskiptinmi Jesúswan puriqkunata willananpaq María Magdalena aywarqan. Chaykurmi llakikur waqaykäyaqta tarirqan. 11<<Jesústa kawaykaqtam rikashkä>> nir willakuptinpis manam creyiyarqantsu.

Ishkay discïpulunkunata Jesús yuripunqan

Lucas 24.13-35

12Tsaypitanam markapita aywaykäyaptin ishkay discïpulunkunata Jesús yuripurqan. Payqa manam puntata kanqannönatsu karqan. 13Tsaypita kutiykurnam discïpulu majinkunata Jesús yuripunqanta willayarqan. Willakuyaptinpis manam creyiyarqantsu.

Discïpulunkuna willakuyänanpaq Jesús kachanqan

Mateo 28.16-20; Lucas 24.36-49; Juan 20.19-23; Hechos 1.6-8

14Tsaypitam chunka juk discïpulunkuna mikuykäyaptin Jesús yuripuskir nirqan: <<Mana creyikuq chukru shonqu runakuna, kawamunqäta willayäshuptikipis ¿imanirtan creyiyashkankitsu?>>

15Mastam nirqan: <<Maytsaypa aywar llapan runakunata alli willakuynïta willakuyanki.#Mat. 28.19-20; Hech. 1.8. 16Mayqanpis creyikur bautizakuq kaqqa salvakanqam. Peru mana creyikuq kaqmi sïqa infiernuman jitarpushqa kayanqa. 17Creyikuqkunam milagrukunatapis rurayanqa. Shutïchömi supaykunatapis qarquyanqa y mana yachayanqan idiömakunatapis parlayanqa. 18Culebra kaniptinpis, venënuta qarayaptinpis manam wañuyanqatsu. Tsaynöllam qeshyaqyashakunata yataykur Dios Yayata mañakuyaptin kutikäyanqa>>.

Ciëluman Jesús kutinqan

Lucas 24.50-53; Hechos 1.9-11

19Discïpulunkunata parlapar ushaskiptinmi Señor Jesústa gloriaman Dios Yaya aparqan.#Hech. 1.9. Tsaychömi Dios Yayapa derëcha kaq lädunman jamaykurqan. 20Tsaypitam discïpulunkuna maytsaychö willakuyarqan. Kikin Señornintsikmi yanaparqan milagrukunata rurayänanpaq. Tsayta rikarmi runakuna tantiyayarqan tsay willakuyanqan rasunpa kanqanta. Amén.]#16.20 Unay kaq griego copiakunachöqa versïculu 9-pita ushananyaq manam kantsu.

Currently Selected:

Marcos 16: qxn

Highlight

Copy

Compare