Mateo 16

Milagrutaraq rikayta mañayanqan

Marcos 8.11-13; Lucas 12.54-56

1Juk kutim Jesústa ishkitsiyta munar fariseukuna y saduceukuna aywaykur niyarqan: <<Taytay, Dios Yaya rasunpa kachamushunqaykita musyayänäpaq ima milagrullatapis ruramuy>>.#Mat. 12.38; Luc. 11.16.

2Jesúsnam nirqan: <<Rupay jeqaskiptin qarwaylluptinmi niyanki: <Waraymi usyanqa>. 3Tsaynöllam pukutar warämuptin niyanki: <Kanan junaqqa tamyamunqam>. [¡Allish tukuq runakuna!] Tsaykunata tantiyaykarqa ¿imanirtan ruranqäkunata rikaykar Dios Yaya kachamanqanta tantiyayankitsu? 4¡Mana cäsukuq jutsasapa runakuna! Milagruta ruranäta munayaptikipis#Mat. 12.39; Mar. 8.12; Luc. 11.29. manam ima milagrutapis rurashaqtsu. Tsaypa rantinmi profëta Jonásta salvar milagruta ruranqannö Dios Yaya juk milagruta ruranqa>>.

Tsaynö niskirmi Jesús aywakurqan.

Fariseukunapa yachatsikuyninta levadüraman Jesús iwalatsinqan

Marcos 8.14-21

5Qochata tsimpaskirmi Jesúspa discïpulunkuna tantata qonqayanqanta yarpaskiyarqan. 6Tsaymi Jesús nirqan: <<Cuidädu fariseukunapa y saduceukunapa levadürantataq chaskiyankiman>>.#Luc. 12.1.

7Tsaynö niptinmi discïpulunkuna kikinkunapura ninakuyarqan: <<Tantata mana apamunqantsikpitam tsaynö nikämantsik>>.

8Tsaynö parlayanqanta tantiyaskirmi Jesús nirqan: <<¡Mana creyikuq janan shonqu runakuna! ¿Imanirtan parlaykäyanki tantata mana apayämunqaykita? 9¿Imanirtan tantiyayankitsu imapaq parlaykanqäta? ¿Manaku yarpäyanki pitsqa tantallapita pitsqa waranqa (5,000) runakuna mikuyänanpaq milagru ruranqäta? ¿Manaku yarpäyanki sobraq tantata ayka canastata qoriyanqaykita?#Mat. 14.17-21. 10Tsaynölla ¿manaku yarpäyanki qanchis tantallapita chusku waranqa (4,000) runakuna mikuyänanpaq milagru ruranqäta y sobraq tantata ayka canastata qoriyanqaykita?#Mat. 15.34-38. 11¿Imanirtan tantiyayankitsu tantapaq mana parlanqäta? Tantapaq parlanqäpa rantinmi fariseukunapawan saduceukunapa levadüranta mana chaskiyänaykipaq niyaq>>.

12Tsaynö niptinraqmi tantiyayarqan levadürapaq mana parlanqanta, sinöqa fariseukunapa y saduceukunapa yachatsikuyninta mana chaskiyänanpaq ninqanta.

Jesús Cristo kanqanta Pedro ninqan

Marcos 8.27-30; Lucas 9.18-21

13Cesarea de Filipos partiman chaykurmi discïpulunkunata Jesús tapurqan: <<Runapa Tsurin ¿pï kanqantatan runakuna niyan?>>

14Discïpulunkunanam niyarqan: <<Wakinmi niyan Bautizaq Juan kanqaykita. Wakinnam niyan profëta Elías kanqaykita. Wakinnam niyan profëta Jeremías o mayqan profëtapis kanqaykita>>.#Mat. 14.1-2; Mar. 6.14-15; Luc. 9.7-8.

15Jesúsnam tapurqan: <<Qamkunaqa ¿pï kanqätatan yarpäyanki?>>

16Tsaymi Simón Pedro nirqan: <<Qamqa imayyaqpis kawaq Dios Yayapa Tsurinmi kanki. Pay kachamunqan Cristum kanki>>.#Juan 6.68-69.

17Jesúsnam nirqan: <<Jonáspa tsurin Simón, rasun kaqtam nishkanki. Tsaynö ninaykipaq manam runatsu tantiyatsishushkanki, sinöqa ciëluchö Taytämi. 18Qamtam niq Pedro#16.18 Pedro ninanqa rumi ninanmi. kanqaykita. Kay rumi jananchömi iglesiäta shäritsishaq. Tsay iglesiataqa Satanáspis manam vencinqatsu. 19Qamtam entregashayki Dios Yayapa mandakuyninman yaykuna llävipa wawankunata. Tsaymi kay patsachö watanqayki ciëluchöpis watashqa kanqa. Kay patsachö paskanqaykim ciëluchöpis paskashqa kanqa>>.#16.19 Tsaynöpam Jesucristo nirqan paypa shutinchö yachatsinanpaq apóstol Pedro poderyuq kanqanta.#Mat. 18.18; Juan 20.23.

20Tsaynö niskirmi discïpulunkunata nirqan: <<Dios Yaya kachamunqan Cristo kanqäta ama pitapis willayankitsu>>.#16.20 Tsay witsay Israel runakunam yarpäyarqan Cristuta Dios Yaya kachamuptin Roma runakunata guërrachö vencinanpaq kanqanta. Tsaynö yarpäyaptinpis Jesucristo manam guërrata ruraqtsu shamushqa, sinöqa noqantsik rayku cruzchö wañunanpaqmi. Tsaymi discïpulunkunata nirqan Cristo kanqanta pitapis mana willayänanpaq. Peru wañunqanpita kawaskamurmi sïqa pïmaytapis willayänanpaq nirqan (Mat. 17.9; 28.19).

Wañunanpaq Jesús willakunqan

Marcos 8.31—9.1; Lucas 9.22-27

21Tsaypitanam discïpulunkunata Jesús willarqan: <<Jerusalénmanmi aywanä. Tsaychömi Israel mayor runakuna, mandakuq sacerdötikuna y ley yachatsikuqkuna alläpa ñakatsiyämar wañutsiyämanqa. Peru kimsa junaqtam kawamushaq>>.

22Tsaynö niptinmi jukläman qayaskir Pedro piñapar nirqan: <<Taytay, tsaytaqa Dios Yaya ama munaykullätsuntsu. ¡Tsaynö ama päsaykulläshuytsu!>>

23Tsaynö niptinmi Pedruman tumaykur Jesús nirqan: <<¡Puntäpita witiy, Satanás! ¡Ama tsapata churamuytsu! Qam manam munankitsu Dios Yaya munanqanta ruranäta, sinöqa runa munanqanta ruranätam munanki>>.

24Tsaypitanam discïpulunkunata Jesús nirqan: <<Pipis discïpulü kayta munarqa kikin munanqannö ama kawatsuntsu, sinöqa cruzninta apaqnö noqata qatimätsun.#16.24 Jesucristo kawanqan witsaymi pipis cruzninta aparqan wañutsishqa kananpaq. Tsaymi cruzninta apaqnö noqata qatimätsun nirqa jutsa ruraypaq wañushqanö kar Jesucristuta qatinanpaq kanqanta nin.#Mat. 10.38; Mar. 8.34; Luc. 9.23; 14.27; Juan 12.25. 25Kawayninta salvayta munaqkunam kawayninta oqrayanqa. Kawayninta noqa rayku oqraqkunam sïqa kawayninta salvayanqa.#16.25 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; Luc. 17.33; Juan 12.25. 26Infiernuman jitarpushqa kananpaq kaptinqa ¿imapaqtan välin entëru mundupa ämun kanqanpis? Mayjina rïcu karpis manam rïcu kayninwan salvacionta rantinqatsu.

27<<Runapa Tsurin angelninkunawan y Taytanpa poderninwan shamurmi#Mat. 25.31. imanö kawayanqanman pitapis juzganqa.#Sal. 62.11-12; Prov. 24.12; Jer. 17.10; Eze. 18.30; 33.20; Rom. 2.6. 28Rasun kaqtam niyaq: Manaraq wañurmi wakiki rikäyanki Runapa Tsurin poderösu mandakuq kayninwan shamuykaqta>>.

Currently Selected:

Mateo 16: qxn

Highlight

Copy

Compare