Mateo 15

Runakuna mana allikunata yarpar impüru tikrayanqan

Marcos 7.1-23

1Tsaypitam fariseukunawan ley yachatsikuqkuna Jerusalénpita shamur Jesústa tapuyarqan: 2<<¿Imanirtan discïpuluykikuna unay aylluntsikkunapa costumbrinkunata mana cäsur mikuyänanpaq makinkunata mayllakuyantsu?>>

3Jesúsnam nirqan: <<Qamkunapis ¿imanirtan Dios Yayapa mandamientunta cumpliyanqaykipa rantin costumbrikikunata mas cumpliyanki? 4Dios Yayapa mandamientunmi nin: <Mamaykita y taytaykita respitanki>.#Éxo. 20.12; Deut. 5.16. Tsaynöllam nin: <Pipis mamanta o taytanta mana respitaq kaqqa wañutsishqa katsun>.#Éxo. 21.17; Lev. 20.9.

5<<Peru qamkunaqa yachatsirmi nikäyanki: <Imaykikunapis Dios Yayallapaq kanqanta nikarqa mananam tsaykunata yatayankimantsu mamaykita ni taytaykita yanapayänaykipaq>. 6Mamanta y taytanta manana yanapayänanpaq yachatsikurqa Dios Yayapa palabranta manakaqmanmi churaykäyanki. 7¡Allish tukuq runakuna! Rasun kaqtam Isaías qamkunapaq qellqarqan. Tsay qellqanqanchömi nin:

8<< <Kay runakunaqa shimillankunawanmi <<cäsuqmi>> niyäman.

Peru shonqunkunachöqa juktam yarpaykäyan.

9Ninqäkunata yachatsikuyanqanpa rantinmi runakuna niyanqallanta yachatsikuyan.

Tsaymi adorayämanqanpis manakaqllapaq kaykan> >>.#Isa. 29.13.

10Runakunata qayaskirnam Jesús nirqan: <<Kay niyanqaqkunata shumaq tantiyayay. 11Manam imatapis mikunqanpitatsu pipis impüru kaykan, sinöqa llutankunata parlanqanpitam>>.

12Discïpulunkunanam Jesústa niyarqan: <<¿Tantiyankiku tsaynö niptiki fariseukuna rabyakuyanqanta?>>

13Jesúsnam nirqan: <<Ciëluchö Taytä mana plantanqan jacha karmi paykunaqa chakrapita llupishqa kayanqa. 14Paykunata ama cäsuyaytsu. Paykunaqa qaprapura pushanakuqnömi kayan. Qaprapura pushanakurmi ishkanpis pözuman jeqarpuyanqa>>.#Luc. 6.39.

15Tsaynö niptinmi Pedro nirqan: <<Taytay, mikuyman iwalatsiypa yachatsikunqaykita tantiyaykatsiyällämay>>.#Mat. 15.11.

16Jesúsnam nirqan: <<¿Qamkunapis manaku tantiyayanki? 17Runaqa manam mikuyta mikunqanpitatsu impüru tikran. Mikunqanqa pachanpita päsakunllam. 18Peru shonqunchö mana allita yarpanqanta parlarmi sïqa impüru tikran.#Mat. 12.34. 19Runakunaqa shonqunchö mana allikunata yarparmi runa majinta wañutsiyan, majayuq kaykar jukwan kakuyan y fornicación jutsata rurayan. Tsaynöllam suwakuyan, llullakuyan y runa majinta ashayan. 20Tsaykunata rurarmi runaqa impüru tikran. Manam makinta mana mayllakur mikurtsu impüru tikran, sinöqa shonqunchö mana allikunata yarparmi>>.

Mana Israel warmi Jesúsman creyikunqan

Marcos 7.24-30

21Tsaypitanam Jesús aywarqan Tiro y Sidón markakuna lädupa. 22Tsay markakunachömi cananeo niyanqan mana Israel runakuna täkuyan. Tsaymi juk cananea warmi Jesús kaqman aywar alläpa rugakur nirqan: <<¡Davidpa Tsurin Jesús, llakipaykallämay! Warmi wawätam supay löcayätsir alläpa ñakatsin>>.

23Tsaynö niptinmi Jesús ni imatapis parlakurqantsu. Tsaymi discïpulunkuna Jesústa niyarqan: <<Alläpa qayaraykacharmi taqay warmi qatiraykämantsik. Taytay, aywakunanpaq niykuy>>.

24Tsaymi tsay warmita Jesús nirqan: <<Oqrakashqa üshanö kaykaq Israel runakunallamanmi Dios Yaya kachamashqa>>.

25Tsaynö niptinmi tsay warmi Jesúspa puntanman qonqurikuykur nirqan: <<¡Taytay, yanapaykallämay!>>

26Jesúsnam nirqan: <<Qamta yanaparqa wamrakunapa tantanta qechuskir allqukunata qaraqnömi käman>>.

27Warminam nirqan: <<Awmi, taytay. Peru mësapita shikwapukuyanqantam allqukunapis mikuyan>>.

28Jesúsnam nirqan: <<Rasunpam creyikamunki. Rugakamanqaykinömi kanqa>>.

Tsay höram tsay warmipa wawan kutikaskirqan.

Qeshyaqyashakunata Jesús kutikätsinqan

29Tsaypita aywarmi Galilea qocha kuchunpa Jesús päsarqan. Tsaypitanam juk lömaman witsarkur jamarqan. 30Tsaymanmi atskaq runakuna chätsiyarqan wishtukunata, qaprakunata, ratakunata, mana parlaqkunata y tukuyläya qeshyaywan qeshyaykaqkunatapis. Tsaychömi llapan qeshyaqyashakunata Jesús kutikätsirqan. 31Tsaymi runakuna alläpa kushikuyarqan upakuna parlaqta wiyar, ratakuna kutikashqata rikar, wishtukuna puriqta rikar y qaprakuna rikaqta rikar. Tsaynö kushikurmi Dios Yayata alabayarqan.

Chusku waranqa runakuna mikuyänanpaq milagruta Jesús ruranqan

Marcos 8.1-10

32Tsaypitanam discïpulunkunata qayaskir Jesús nirqan: <<Kay runakunatam alläpa llakipä. Kimsa junaqnam mikuytapis mana yawar paqtantsik kaykäyan. Mallaqllata <aywakuyay> niptïqa wajinkunaman manaraq chäyaptinmi shonqunkunapis ushakanqa>>.

33Discïpulunkunanam niyarqan: <<Kay jäkuqchöqa ¿maychöraq mikuytapis tarishwan kaytsikaq runakunapaq?>>

34Jesúsnam tapurqan: <<¿Aykatan tantaykikuna kayäpushunki?>>

Niptinnam niyarqan: <<Taytay, qanchis tantawan juk ishkay pescädullam kayäpaman>>.

35Tsaynö niyaptinmi runakuna jamakuyänanpaq Jesús nirqan. 36Jamaskiyaptinnam pescäduta y qanchis tantata aptarkur Dios Yayata mañakur agradëcikurqan. Tsaypitanam tantata pakiskir discïpulunkunata makyarqan aypukuyänanpaq. 37Tsaymi pacha junta llapan mikuyarqan. Sobraq kaqkunatanam qanchis canasta juntata discïpulunkuna qoriyarqan. 38Tsaychö mikuqkunam chusku waranqanö (4,000) kayarqan. Warmikunatawan wamrakunataqa manam yupayarqantsu.

39Runakunata aywakuyänanpaq niskirnam büquiman lätarkur discïpulunkunawan Magdala partiman Jesús aywarqan.

Currently Selected:

Mateo 15: qxn

Highlight

Copy

Compare