Mateo 14

Bautizaq Juanta Herodes wañutsinqan

Marcos 6.14-29; Lucas 9.7-9

1Tsay witsaymi Galileapa mandakuqnin Herodes musyarqan Jesúspaq pïmaypis parlayanqanta. 2Tsaymi yanapaqninkunata Herodes nirqan: <<Tsay runaqa Bautizaq Juanmi kawamushqa kanqa. Tsaymi milagrukunata rurananpaq poderyuq kaykan>>.

3Ñawpatam Juanta Herodes prësu achkuskatsir cadenawan watarkur carcelman qaykatsishqa karqan. Tsaynö rurarqan Herodías shutiyuq warmi mañakuptinmi. Herodíasqa Herodespa wawqin Felipipa warminmi karqan. 4Herodes warmintanö Herodíasta katsiptinmi Juan nirqan: <<Wawqikipa warminwan täkurmi alläpa jutsata ruraykanki>>.#Lev. 18.16; 20.21; Luc. 3.19-20.

5Tsaynö ninqanpitam Herodes Juanta wañutsiyta munarqan. Peru profëta kanqanta llapan runakuna niyaptinmi mantsakurqan.

6Tsaypitanam Herodespa santunchö Herodíaspa jipash wamran llapan qayatsinqankunapa puntanchö shumaq tushurqan. Tsayta rikarmi Herodes alläpa kushikur 7Dios Yayapa shutinchö jurar tsay jipashta prometir nirqan: <<Imatapis mañamanqaykitam qarashayki>>.

8Jipashnam maman yachatsinqannölla Herodesta nirqan: <<Bautizaq Juanpa umanta juk plätuchö qaraykamay>>.

9Tsayta mañaptinmi rey Herodes alläpa llakikurqan. Peru qayatsinqankunapa puntanchö jurashqa karmi mañanqanta qarayänanpaq wardiakunata nirqan. 10Wardiakunanam Juanpa umanta carcelchö roquskir 11juk plätuchö apamur jipashta entregayarqan. Jipashnam mamanta entregarqan.

12Tsaynö rurayanqanta musyaskirnam Juanpa discïpulunkuna ayanta qoriskir pampayarqan. Tsaypitam Jesúsman aywaykur willayarqan.

Pitsqa waranqa runakuna mikuyänanpaq milagruta Jesús ruranqan

Marcos 6.30-44; Lucas 9.10-17; Juan 6.1-14

13Tsayta musyaskirnam büquiman lätarkur desiertuman Jesús japallan aywarqan. Aywanqanta musyaykurnam runakuna markakunapita chakillapa Jesústa qatirnin aywayarqan. 14Büquipita yarpuskirnam atskaq runakuna shuyaraykäyaqta Jesús tarirqan. Tsaymi llakipar qeshyaykaqkunata kutikätsirqan.

15Patsa qoyaykaptinnam#14.15 Wakin runakunaqa patsa tsakaykaptinnam niyan. discïpulunkuna Jesúsman witiykur niyarqan: <<Desiertuchömi kaykantsik. Patsapis qoyaykannam. Markakunapa aywar mikuyninkuna rantiyämunanpaq runakunata niy>>.

16Jesúsnam nirqan: <<Manam mikuy ashiq aywayanmantsu. Qamkuna mikuyninkuna qarayay>>.

17Discïpulunkunanam niyarqan: <<Pitsqa tantawan ishkay pescädullam kayäpaman>>.

18Jesúsnam nirqan: <<Tsayta apayämuy>>.

19Tsaypitam runakunata Jesús nirqan pampaman jamakuyänanpaq. Pitsqa tantatawan ishkay pescäduta aptarkurmi ciëluman rikarkur Dios Yayata Jesús agradëcikurqan. Tantata pakiskirnam discïpulunkunata makyarqan runakunata aypuyänanpaq. 20Pacha junta mikuskiyaptinnam sobraq kaqta chunka ishkay canasta juntata qoriyarqan. 21Tsaychö mikuqkunaqa pitsqa waranqanömi (5,000) kayarqan. Warmikunatawan wamrakunataqa manam yupayarqantsu.

Yaku jananpa Jesús aywanqan

Marcos 6.45-52; Juan 6.15-21

22Tsaypitanam discïpulunkunata Jesús nirqan büquiman lätarkur wak tsimpaman puntayänanpaq. Aywaskiyaptinnam tsaychö runakunata despidiskir 23Dios Yayata mañakunanpaq jirkapa kikillan witsarqan. Tsaychömi patsa qoyanqanyaq#14.23 Wakin runakunaqa patsa tsakanqanyaq niyan. mañakurqan. 24Tsayyaqmi discïpulunkunaqa qocha pullantana büquiwan aywaykäyarqan. Alläpa wayrar yakuta laqchikätsiptinmi sufriykäyarqan.

25Patsa waraykaptinnam discïpulunkuna kaqman yaku jananpa Jesús aywaykarqan. 26Tsayta rikaskirmi discïpulunkuna alläpa mantsakar qayaraykachar niyarqan: <<¡Achachay! ¡Almam shamuykan!>>

27Tsaymi Jesús nirqan: <<¡Noqam kä! ¡Ama mantsakäyaytsu!>>

28Pedrunam nirqan: <<Taytay, rasunpa qam karqa noqapis yaku jananpa shamunäpaq permïtiykullay>>.

29Jesúsnam nirqan: <<Shamuy>>.

Tsaymi büquipita yarpuskir yaku jananpa Jesús kaqman aywar qallaykurqan. 30Alläpa wayraptinnam mantsakaywan tallpukarnin qayarar nirqan: <<¡Taytay, salvaykallämay!>>

31Jesúsnam jina höra makinpita achkurkur nirqan: <<Mana creyikuq janan shonqu runa, ¿imanirtan confiakamankitsu?>>

32Büquiman lätarkuyaptinnam wayrapis päraskirqan. 33Tsayta rikaykurnam büquichö kaykaqkuna qonqurikuykur niyarqan: <<¡Taytay, rasunpam Dios Yayapa Tsurin kanki!>>

Genesaretchö qeshyaqyashakunata Jesús kutikätsinqan

Marcos 6.53-56

34Qochata tsimpaskirnam Genesaret pampaman chäyarqan. 35Tsaychö runakuna Jesústa reqiskirmi maytsaypa willakatsiyarqan. Tsaymi llapan qeshyaykaqkunata kutikätsinanpaq apayämurqan. 36Chaykatsirmi Jesústa rugayarqan llatapanpa kuchunllatapis qeshyaykaqkuna yataykuyänanpaq. Tsaychömi llapan yataq kaqkunaqa kutikäyarqan.

Currently Selected:

Mateo 14: qxn

Highlight

Copy

Compare