Jeremías 5
5
Jerusalén runakuna jutsata rurayanqan
1Dios Yayam nin:
<<Jerusalén cällikunapa purir shumaq rikachakuyay.
Entëru pläzakunata ashiyay.
Tsaychö mä ¿tariyankikush jukllayllatapis alli ruraq runata y rasun kaqllata parlaqta?
Jukllayllatapis tariyaptikiqa Jerusalénchö täkuqkunatam perdonashaq.
2Tsay runakunam shutïchö jurarpis janan shonqulla jurayan>>.
3 Dios Yaya, qammi munanki runakuna prometiyäshunqaykinölla imaypis cäsuyäshunaykita.
Jerusalén runakunaqa corrigir astaptikipis manam cäsuyäshunkitsu.
Castigaptikipis manam wiyakuyantsu.
Paykunapa shonqunkunam ruminö.
Jutsata rurarpis manam arrepentikuyantsu.
4Tsaymi nirqä: <<Mana yachayyuq runakunallam llutanta rurayan.
Dios Yayapa yachatsikuyninta mana musyarmi pay munanqannö kawayantsu.
5Peru rïcu runakunam sïqa Dios Yayapa näninta reqir pay munanqannö kawayan>>.
Tsaynö yarparmi aywarqä rïcu runakuna kaqman Dios Yaya munanqannö kawayanqanta o mana kawayanqantapis musyamunäpaq.
Peru paykunawan parlarmi tantiyarqä rïcu runakunapis Dios Yaya munanqannö mana kawayanqanta.
6<<Tsaynö kayanqanpitam muntipita yarqamuq leonnö wañutsiyanqa.
Tsunyachö päraq löbunömi rachir ushayanqa.
Marka lädunkunachöpis tigri shuyaraqnömi wañutsiyänanpaq shuyaräyanqa.
Markapita yarquqtam pitapis wañutsiyanqa.
Tsaynömi päsanqa yapay yapay mana cäsukur jutsata rurayanqanpita>>.
7Dios Yayam nin:
<<Israel runakuna, tsaynö kayanqaykipitam perdonayäshaykitsu.
Qamkuna jaqiskayämarmi mana rasunpa kaq dioskunapa shutinchö juraykäyanki.
Llapan wanayanqaykita alistapaykäyaptiqmi ollqunta warmi jaqinqannö qamkunapis jaqiyämashkanki.
Prostitütakunapa wajinman aywaqnömi grüpu grüpu juk dioskunata adoraq aywaykäyanki.
8Tsaynöllam yëwata wera potru qatiraqnö runa majikikunapa warminkunata qatiraykäyanki.
9Tsaynö runakunatam mana llakipaypa castigashaq.
10<<Jerusalén runakuna üva chakrä ñawpata kashqa karpis kananqa manam chakränatsu kayan.
Tsaynö kaykäyaptin contrankuna shamur corral jananpa yaykuskir üva chakräkunata ushakätsiyätsun.
Üväpa rämankunata rutuyätsun.#5.10 Üväpa rämankunata rutuyätsun ninanqa Jerusalén runakunata wañutsiyätsun ninanmi.
Peru ama llapantaqa ushakätsiyätsuntsu.#Isa. 5.1-7; Jer. 2.21.
11Israel runakuna y Judá runakuna yapay yapay äniskayämar manam cumpliyantsu.
Noqa Dios Yayam nï.
12<<Jerusalén runakunam manakaqman churayämar niyan:
<Dios Yayaqa manam kantsu.
Ima desgraciapis manam päsamäshuntsu.
Manam guërrapis ni muchuypis kanqatsu.
13Dios Yayapa profëtankuna willakuyanqanqa wayra päsaqnöllam.
Paykunataqa manam pipis kachamushqatsu.
Castïgu shamunanpaq willakuyanqanpis kikinkunapaq katsun> >>.
14Tsaymi llapanta mandaq Dios Yaya nimashqa:
<<Tsaynö niyanqanpitam shutïchö willakunqayki ninanö kanqa.
Tsay runakunanam yantanö kayanqa.
Nina rupaptin yanta ushakanqannömi paykunapis ushakäyanqa.
15Israel runakuna, qamkunata atacayäshunaykipaqmi karu nación runakunata pushamushaq.
Tsay runakunam unaypitana alläpa kallpasapa kayan.
Paykuna parlayanqanta mana tantiyarmi ima niyanqantapis musyayankitsu.
16Paykunam llapanpis valienti alli pelyaq kayan.
Pitapis flëcharmi wañutsiyan.
17Llapan mikuynikikunatam ushayanqa.
Tsurikikunatapis warmita y ollqutam wañutsiyanqa.
Üshaykikunata, wäkaykikunata, üvaykikunata y hïgusnikikunatam ushayanqa.
Alli segurashqa confiakuyanqayki markaykikunatam ushakätsiyanqa>>.#Deut. 28.49-52.
18 Dios Yayam nimarqan: <<Tsaynö castigarpis manam llapaykitatsu ushakätsiyäshayki. 19Desgraciakuna päsaptinmi tapuyäshunki imanir Diosnin kaykar tsaynö ruranqäta. Tapuyäshuptiki ninki: <Qamkunam Dios Yayata qonqaskir juklä nacionkunapa diosninkunata nacionnikikunachö adorayashkanki. Tsaypitam qamkunapis juklä nación runakunata juklä nacionchö serviyanki> >>.
Castïgu shamunanpaq willakunqan
20Dios Yayam nin:
<<Jacobpita miraq Israel runakuna y Judá runakuna, willakunqäta wiyayämay.
21Ñawiki kaykaptin mana rikaq,
rinriki kaykaptin mana wiyaq,
mana yachayyuq upa runakuna, wiyayämay.#Isa. 6.9-10; Eze. 12.2; Mar. 8.18.
22Noqa Dios Yayam nï:
Lamar kuchunpita masta mana päsananpaqmi arenïllata churashkä.
Tsaymi mayjina wayrawan laqchikarpis päsantsu.#Job 38.8-11; Sal. 104.6-9; Prov. 8.29.
Lamarpis cäsuykämaptinqa ¿imanirtan qamkuna cäsuyämankitsu?
Castigakuq kanqäta musyaykarqa ¿imanirtan noqapita mantsakur puntächö tsuktsukyäyankitsu?
23<<Qamkunaqa ishkay cära mana cäsukuq karmi jaqiyämashkanki.
24Shonquykikunallachöpis manam yarpäyankitsu noqapita mantsakuyänaykipaq kanqantaqa.
Manam tantiyayankitsu mikuynikikuna alli qeshpinanpaq punta tamyata y qepa tamyata tamyatsimunqätapis.
Tsaynöllam tantiyayankitsu mikuynikikunata qoriyänaykipaqpis noqaraq usyätsimunqäta.
25Tsaymi kananqa jutsaykikunapita tamyatsimushaqnatsu.
Imayka allikunata tariyänaykipaq kaqtapis manam tariyankinatsu.
26<<Qamkunachömi mana alli runakuna kayan.
Tsay mana alli runakunam trampawan pishqukunata achkuqnö runa majinkunata engañayänanpaq shuyaraykäyan.
27Jaulachö atska pishqukuna kanqannömi suwakuyanqankunapis wajinkunachö atska kaykan.
Tsaynö rïcuyarmi paykuna poderyuq tikrayashqa.
28Alli allita mikurmi weray weray kaykäyan.
Mana arrepentikurmi llutankunata rurayan.
Mamannaq y taytannaqkuna quëjakuyaptinpis manam favornin shäriyantsu.
Waktsa sufriykaqta rikaykarpis manam yanapayantsu.
29<<Noqa Dios Yayam nï:
Tsaynö runakunataqa mana llakipaypam castigashaq.
Rabyatsiyämanqanpitam castigashaq.
30Paykunam alläpa mantsakaypaq mana allikunata kay nacionchö ruraykäyan.
31Profëtakunam llullakur willakuyan.
Sacerdötikunapis shonqunkuna yarpanqallantam yachatsikuyan.
Tsaynö kayaptinpis qamkunataqa manam ni ima importakuyäshunkitsu.
Tsaypa rantinmi paykuna tsaynö kayänanta munayanki.
Ushakäyänayki junaq chämuptin ¿imanöraq salvakäyanki?>>
Currently Selected:
Jeremías 5: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
