Jeremías 18
18
Manka ruraqman iwalatsinqan
1Jeremíastam Dios Yaya nirqan: 2<<Ayway manka ruraq runapa wajinman. Tsaychömi nishayki runakunata imata willanaykipaq>>.
3Manka ruraq kaqpa aywarmi tarirqä tornuwan mankata ruraykaqta. 4Ruranqan manka munanqannö mana yarquptinmi tsay mitullapita yapay juk mankatana munanqannö rurarqan.
5Tsaymi Dios Yaya revelamar nimarqan: 6<<Israel runakuna, manka ruraq runa ruranqannö ¿manatsuraq noqapis qamkunata rurayaqman? Manka ruraqpa makinchö mitu kanqannömi qamkunapis makïchö kaykäyanki.#Isa. 64.8; Rom. 9.20-21.
7<<Nacionkunapa contranmi willakatsï munanqä höra castigar ushakätsinäpaq. 8Peru tsay nación runakuna jutsa rurayta dëjaskir allitana rurayaptinqa castiganäpaq kaykarpis manam castigashaqnatsu.
9<<Wakin kaq nacionkunatam yanapä mas poderyuq kayänanpaq. Yanapanäpaq willakatsiptïpis 10tsay nacionchö täkuq runakuna ninqäta mana wiyar jutsata rurayaptinmi yanapanäpaq kaykarpis castigashaq>>.
11<<Jeremías, Judá runakunata y Jerusalénchö täkuqkunata willar ninki: <Dios Yayam nin: Qamkunata castigayänaqpaqmi alistakuykä. Manaraq castigayanqaqyaq jutsaykikunapita arrepentikur allitana rurayay>.
12<<Tsaynö willakuptikim paykuna niyäshunki: <¡Imapaqtan tiempuykitapis perdir tsaynö niyämanki! Noqakunaqa munayanqänömi kawakuyäshaq. Shonqükuna yarpanqannöllam mana allikunatapis rurayäshaq> >>.
Kuyanqan runankuna mana confiakuypaq kayanqan
13Tsaymi Dios Yaya nin:
<<¡Israel runakunam mantsakaypaq mana allita rurayan!
Juklä nacionkunachö mä tapukuyay.
Manam mayqan nacionchöpis kay runakuna mana allita rurayanqannöqa rurayashqatsu.
14Líbano jirkakunachö janka ¿imayllaqa ushakantsuraq?
Tsay jirkapita yaku urämuq ¿imayllaqa tsakintsuraq?
Tsaykuna confiakuypaq kaptinpis kuyanqä runakunam confiakuypaqtsu kayan.
15Paykunam qonqaskayämar mana väliq ïdulukunapaq inciensiuta qoshnïtsiyan.
Ninqänö kawayanqanpa rantinmi mana alli nänipa aywar oqrakashqanö mana allikunata ruraykäyan.
16<<Tsaynö kayanqanpitam paykunata mana llakipar castigashaq.
Nacionninkuna tsunya tikraptinmi imaypis runakuna mantsakäyanqa.
Tsaypa päsaqkunam mantsakar umankunatapis aywiyanqaraq.
17Apäkuy wayranömi Israel runakunata witsikätsishaq.
Contrankuna ushakätsiyänanpaqmi tumakuskishaq.
Tsay junaqmi paykunapita tikrakuskishaq>>.
Jeremíaspa contran willanakuyanqan
18Tsaynö willakuptïmi chikimaqnïkuna kikinkunapura ninakuyarqan: <<Mandamientukunata yachatsimänapaqmi sacerdötikuna kayan. Imata yätsimänapaqpis tantiyaqkunam kayan. Dios Yayapa willakuyninta willamänapaqpis profëtakunam kayan. Manam wanantsiktsu Jeremíasta. Imaykatapis llutalla tumpashun wañutsiyänanpaq. Pay ninqanta ama cäsushuntsu>>.
19¡Dios Yaya, yanapaykallämay!
¡Tumpayämänanpaq conträkuna willanakuyanqanpita castigaykullay!
20Imaypis allillatam paykunapaq rurashkä.
Paykunawan rabyashqa kaptikipis favorninkunam imaypis rugakushkaq.
Llutanta ruraptïnömi kananqa conträ shäriyashqa.
21Peru tsaynö kayanqanpita wamrankuna guërrachö wañuyätsun y wakin kaqna mallaqaypita wañuyätsun.
Warminkunapis wawannaq viüda quëdayätsun.
Ollqu kaqkunapis qeshyaywan wañuyätsun.
Jövinkunapis guërrachö wañuyätsun.
22Illaqpita asaltantikuna yaykuyaptin wajinkunachö qayaraykachäyanqan wiyakätsun.
Conträ shärir trampata churapäyämanqannö paykunatapis trampata churapuykuy.
23 Dios Yaya, qammi musyanki wañutsiyämänanpaq willanakuyanqanta.
Mana alli ruraq kayanqanpita ama perdonaytsu ni jutsa rurayanqantapis ama qonqaytsu.
Alläpa rabyar paykunata merëciyanqanman castigaykullay.
Currently Selected:
Jeremías 18: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
