Jeremías 10
10
Ïdulukuna manakaqlla kanqan
1Israel runakuna, Dios Yaya niyäshunqaykita cäsuyay. 2Dios Yayam nin:
<<Juklä nación runakunanö ama kayaytsu.
Ciëluchö ima señaltapis rikar alläpa mantsakäyaptinpis qamkunaqa ama mantsakäyaytsu.
3Tsay runakunam imapaqpis mana väliq ïdulukunaman creyiyan.
Tsay ïdulukunata rurayänanpaqmi muntipita qeruta walluyämun.
Llaqllay yachaq runawanmi shumaqta llaqllatsiyan.
4Qoriwan y yuraq qellaywan adornarkurmi mana qotukänanpaq shumaq clävayan.#Sal. 115.4-8; 135.15-18; Isa. 40.19-20; 44.9-20.
5Tsay ïdulukunam chakrachö wällinö mana parlaq kayan.
Kikillanpita mana puriptinmi matankashqa puritsiyan.#Isa. 46.1, 7.
Tsay ïdulukunata ama mantsayaytsu.
Manam allitapis ni mana allitapis rurayantsu>>.#Isa. 41.23-24, 29.
6 Dios Yaya, qamnöqa manam ni pipis kantsu.
Qamqa poderösum kanki.
7Maytsay nacionkunapa mandakuqnin reymi kanki.
Tsaynö kaykaptikiqa ¿piraq qampita mana mantsakunmantsu?#Apoc. 15.4.
May nacionchö yachayyuq runapitapis mas yachayyuqmi kanki.
Pïmay reypitapis mas poderyuqmi kanki.
Tsaynö kaykaptikiqa ¿piraq mantsashunkimantsu?
8Ïduluta ruraqkunaqa llapanpis yarpayninnaq mana yachayyuqmi kayan.
Qerupita rurashqa ïduluqa ¿imataraq runakunata yachatsinqa?
9Tsay ïdulukunatam llaqllay yachaqkunalla rurayan.
Llaqllaskirmi Tarsispita apayämunqan yuraq qellaywan y Ufazpita apayämunqan qoriwan enchapayan.
Tsaypitam azul y granäti tëlata jiraskir shukutsiyan.
10Rasunpa kaq Diosqa Dios Yayam.
Paymi imayyaqpis kawaq Dios kar imaypis rey.
Pay rabyaptinqa kay mundupis karkaryanmi.
Pay castigaptinqa manam mayqan nacionpis awantantsu.
11Dios Yayam nimarqan:
<<Ïdulukunata adoraqkunata niy:
<Adorayanqayki ïdulukunaqa manam kay patsata ni ciëlutapis rurayashqatsu.
Tsaykunam kay patsapita llapan illakäyanqa> >>.
12Dios Yayam poderösu kayninwan kay patsata kamashqa.
Yachayyuq kayninwanmi kay munduta patsätsishqa.
Yarpayyuq kayninwanmi ciëlutapis rurashqa.
13Pay mandaptinmi ciëluchö kaykaq yakupis qayarämun,
pukutaypis patsapa kuchunpita shärimun,
illaqu chilapyaqwan tamyamun
y wayrapis churaräkunanpita yarqamun.#Sal. 135.7.
14Llapan runakunam upanö kar imatapis mana tantiyakuq kayan.
Ïdulukunata rurayanqanpitam penqakuyanqa.
Tsay ïdulukunaqa manam imatapis rurayantsu.
Runakuna confiakuyaptinpis manam pitapis yanapayantsu.
15Manakaqllapaqmi kayan.
Dios Yaya castiganan junaqmi tsay ïdulukuna ushakäyanqa.
16Jacob confiakunqan Dios Yayaqa manam ïdulukunanötsu.
Paymi llapan imaykatapis kamashqa.
Herencian kanapaqmi Israel runakunata akramashkantsik.
Shutinpis llapanta mandaq Yahwehmi.
Judá nacionta ushakätsinqan
17Judá runakuna, imaykaykikunatapis alistakuyay. Contraykikunam kunchawaykäyäshunkina prësu apayäshunaykipaq. 18Dios Yayam nin: <<Kay nacionpita karumanmi qarquyäshayki. Tsaynö castigayaptiqmi alläpa ñakayanki>>.
19Marka majïkunapaq llakikuptïmi shonqu nanaypis tsariman.
Kay nanayta manam awantänatsu.
Tsaynö kaptinpis alfin imanäshaqtan.
20Täkunqä carpäpis jankatmi qotukar ushakashqa.
Tsaraq waskankunapis rachirmi ushakashqa.
Tsurïkunatapis llapantam prësu apakuyashqa.
Mananam ni jukllayllapis quëdayashqatsu.
Manam pipis kannatsu yapay carpäta shäritsinanpaq ni cortïnankunata churananpaq.#10.20 Kay textuchömi Jerusalén markata Jeremías iwalatsirqan ishkishqa carpaman. Jerusalénchö täkuq runakunatanam iwalatsirqan kikinpa tsurinkunaman. Manaraq castïgu kaptinpis päsashqatanönam kay versïculukunachö Jeremías parlarqan.
21Tsaynö desgracia päsashqa reypis y autoridäkunapis yarpayninnaq upa kar Dios Yayata mana ashiyanqanpitam.
Tsaymi llapan runakunapis maytsaypa witsikäyashqa.#Jer. 23.1-4; Eze. 34.1-10.
22Judá runakuna, ¡llapayki wiyayay!
¡Norti kaqläpitam mana alli willakuy chämushqa!
Markantsikkunata ushakätsiyänanpaqshi atska tröpa soldädukuna shamuykäyan.
Paykuna ushakaskatsimashqam chacalkunallana markantsikkunachöpis pärayanqa.
Dios Yayata Jeremías mañakunqan
23 Dios Yayalläkuna, qamllam musyanki waray warantin imanö kayänäpaq kanqanta.
Tsayqa manam kikïkunapitatsu, sinöqa qampitam.#Prov. 20.24.
24Corrigirpis mana rabyakuyllapa corrigiykayällämay.
Rabyashqa corrigiyämarqa jankatchi ushakaskatsiyämanki.#Sal. 6.1; 38.1.
25Ushakätsiyämanqaykipa rantin juklä nación runakunata ushakaykatsillay.
Kuyanqayki Israel runakuna kaykäyaptïmi tsay runakuna ushakätsiyämashqa.
Kay entëru nacionnikitam chipyat ushakätsiyashqa.
Tsay runakunaqa manam shutikita parlayantsu ni reqiyäshunkitsu.#Sal. 79.6-7.
Currently Selected:
Jeremías 10: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
