Jeremías 11
11
Dios Yayawan pactu rurayanqanta mana cumpliyanqan
1Jeremíastam Dios Yaya nirqan: 2<<Judáchö y Jerusalénchö täkuq runakunata parlapar paykunawan pactuta ruranqäta yarpätsinki. Yarpätsir ninki: 3<Israel runakunata kuyaq Dios Yayam nin: Pactu ruranqäta mana cumpliq runakunam maldicionädu kayan. 4Unay castaykikunatam Egiptuchö fiërru jornuchönö ñakaykaqta jipimurqä. Paykunatam nirqä: <<Cäsuyämar ninqänölla kawakurqa kuyanqä runakunam kayanki. Tsaymi noqa qamkunapa Diosnikikuna kashaq>>.
5<< <Abrahamta, Isaacta y Jacobta äninqäta cumplirmi alli nacionman pusharqä. Tsaychöqa lichipis abëjapa mishkinpis yakunöraqmi atska kaykan. Äninqänöllam kay nacionchö kananyaqpis täkuykäyanki> >>.
Tsaynö nimaptinmi nirqä: <<¡Dios Yaya, tsaynö imaypis kaykullätsun!>>
6Tsaymi Dios Yaya nimarqan: <<Judáchö kaq markakunachö y Jerusalén cällikunachöpis willakur niy: <Unay castaykikunawan pactu ruranqäta cäsukuyay. 7Unay castaykikunata Egiptupita jipimurmi yapay yapay tantiyatsirqä cäsuyämänanpaq. 8Peru paykunaqa manam cäsuyämashqatsu ni pactu ruranqätapis cumpliyashqatsu. Tsaymi shonqunkuna yarpanqallanta imaykatapis rurayashqa. Mana cäsuyämanqanpitam pactuta rurar ninqänölla paykunata castigashaq> >>.
9Yapaymi Dios Yaya nimarqan: <<Judá runakunawan Jerusalénchö täkuq runakunam willanakuyashqa 10unay castankunanölla ninqäkunata mana cäsur jutsata rurayänanpaq. Tsaymi juklä runakuna adorayanqan dioskunata adoraykäyan. Tsaynöpam Judá runakuna y Israel runakunapis unay castankunawan pactu ruranqäta cumpliyantsu.
11<<Tsaymi paykunata mana llakipaypa castigaptï mayqanpis qeshpiyanqatsu. Salvanäpaq rugayämaptinpis manam salvashaqtsu. Noqa Dios Yayam nï. 12Tsaymi Judá y Jerusalén runakuna adorayanqan dioskunata rugakur inciensiuta qoshnïtsiyanqa. Tsaynö rugakuyaptinpis tsay diosninkuna manam salvanqatsu.
13<<Judá runakuna, markaykikuna maytsika kanqannömi diosnikikunapis maytsika kayan. Jerusalén runakuna, cällikikuna atska kanqannömi Baalpaq qoshnïtsiyänaykipaq atska altarkunata perqayashkanki.
14<<Jeremías, tsay runakunata llakipänäpaq amana mañakamaynatsu. Sufriyanqan höra rugakayämaptinpis manam cäsushaqnatsu.
15<<Kuyanqä runakuna, tsayläya mana allikunata ruraskir ¿imatanatan templüchö ashiyanki? Sacrificiuta altarnïchö waykayaptiki ¿mana castigayänaqpaq kanqantaku yarpäyanki? ¿Tsaykunata rurarku kushikuyanki? 16Mas unaynam qamkunata niyarqaq atska wayuyyuq rämasapa olïvunö kayanqaykita. Peru kananqa räyu shikwar rupashqa olïvunömi kayanki.
17<<Noqam olïvuta plantaqnö kay nacionman qamkunata churayarqaq. Peru qamkunam Israelchö y Judáchö Baalta adorar rabyatsiyämashkanki. Tsaynö adorayanqaykipitam llapanta mandaq Dios Yaya kar castigayäshayki>>.
Jeremíasta wañutsiyänanpaq contrankuna willanakuyanqan
18Tsaypitanam Dios Yaya musyatsimarqan runakuna conträ shärir willanakuykäyanqanta. 19Pishtananpaq apaptin üsha mana musyanqannömi noqapis tantiyarqätsu conträ parlayanqanta. Conträ shärirmi niyarqan: <<Alli wayuykaq jachata walluqnö payta wañutsishun. Kay munduchö amana kawatsunnatsu. Paytaqa ama pipis yarpätsunnatsu>>.
20Llapanta mandaq Dios Yaya, qammi alli juez kanki.
Musyankim runakuna imata yarpäyanqantapis.
Noqam qampa makikiman llapanta churaykämü.
Taytay, tsay runakunata imanö castiganqaykita rikaytam munä.#Jer. 20.12.
21Tsay Anatot runakunam niyämarqan: <<Wañuyta mana munarqa Dios Yayapa shutinchö willakuynatsu>>.
22Peru llapanta mandaq Dios Yayam nin: <<Tsaynö niyanqanpitam Anatot runakunata castigashaq. Jöven kaqkunam guërrachö wañuyanqa. Tsurinkunam warmipis ollqupis mallaqaypita wañuyanqa. 23Anatot runakunata juzganä junaq chämunqanam. Paykunata castigaptï manam ni jukllayllapis kawaykar quëdayanqatsu>>.
Currently Selected:
Jeremías 11: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
