Santiago 1

Santiago saludakunqan

1Maytsaychö täkuq chunka ishkay trïbu Israel runakuna:

Noqa Santiagum,#Mat. 13.55; Mar. 6.3; Gál. 1.19. Dios Yayapa y Señor Jesucristupa serviqnin kar saludayämuq.

Imaykata sufrirpis Dios Yayaman creyikunapaq ninqan

2Kuyashqa wawqikuna y panikuna, ima ñakaychö karpis llapan shonquykikunawan kushikuyay. 3Musyayankim imatapis ñakarraq llapan shonquykikunawan Dios Yayaman creyikuyanqaykita. 4Peru mana ajayaypa creyikurmi Dios Yaya munanqannö kawakuyänaykipaq shumaq yachakuyanki.

5Mayqaykipis Dios Yaya munanqannö kawakuyta mana puëdirqa tantiyatsishunaykipaq payta mañakuyay. Mañakuyaptikiqa tantiyatsiyäshunkim. Mañakuq kaqtaqa imaypis yanapanmi.#Mat. 7.7-11; Juan 16.23-24. 6Peru llapan shonquykikunawan creyikur mañakuyay. Mañakur ama yarpäyaytsu <<¿wiyamanqatsuraq o manatsuraq?>> nirqa. Tsaynö yarparqa lamarta wayra waklä kayläman laqchikätsinqannömi kaykäyanki. 7Tsaynö kaykarqa ama yarpäyaytsu Dios Yayapita imatapis chaskiyänaykipaq kanqanta. 8Tsaynö mañakuq runaqa manam creyikuntsu ni Dios Yaya munanqannötsu kawan.

Waktsakunata y rïcukunata plëtunqan

9Waktsa wawqikuna y panikuna, Dios Yaya kuyayäshunqaykita kushikuyay. 10Rïcu wawqikuna y panikuna, qamkunapis kushikuyay riquëzaykikunaman mana confiakuyänaykipaq Dios Yaya tantiyatsiyäshunqaykita. Rïcu karpis waytanö ushakaqllam kayanki.

11Alläpa achaptinmi qewapis tsakiskin.

Waytapa tuktun kuyakuypaq kaykarpis shushurmi ushakan.

Tsaynöllam rïcukunapis mas rïcuyaypaq ayrajaykar ushakäyanqa.#Isa. 40.6-7.

Dios Yaya alli ruraq kanqan

12Imayka ñakaychö karpis Dios Yayaman mana ajayaypa creyikuq runaqa kushishqam kawakun. Tsaynö creyikurmi Dios Yayapa puntanchö corönata chaskinqa. Tsay corönaqa mana ushakaq kawaymi. Tsay corönata chaskiyänanpaqmi kuyaqnin kaqkunata Dios Yaya prometirqan.

13Yarpaynikikunaman jutsa ruray shamuptin ama niyaytsu jutsata rurayänaykipaq Dios Yaya yarpätsiyäshunqaykita. Dios Yayaqa manam ni imaypis jutsata rurantsu ni pitapis jutsata rurananpaq yarpätsintsu. 14Tsaypa rantinqa tsay yarpay kikikipa shonquykikunapita kanqanta tantiyakuyay. 15Shonquykikuna yarpanqanta rurarmi jutsata ruraykäyanki. Jutsa ruraqkunataqa Dios Yayam infiernuman jitarpunqa.

16Kuyashqa wawqikuna y panikuna, ama llutankunata yarpäyaytsu. 17Llapan allikunata chaskiyanqaykiqa atsikyaqkunata kamaq Taytantsikpitam. Payqa manam llantu päsaqnötsu, sinöqa imaypis kanqannöllam kaykan. 18Kikin munanqannöllam alli willakuyninwan mushuq kawayta qaramashkantsik llapan kamanqankunapitapis mas kuyay wamrankuna kanapaq.#1Ped. 1.23.

Jesucristupa willakuyninta cäsunapaq ninqan

19Kuyashqa wawqikuna y panikuna, tsaynö kaykaptinqa yachaq tukur alläpa parlayaytsu, sinöqa wakinpis parlayänanpaq upälla kakuyay. Tsaynölla sasllaqa ama rabyakuyaytsu. 20Rabyakurqa manam Dios Yaya munanqannötsu kawayanki.

21Mana alli ruraykunatawan imayka viciukunata dëjayay. Willakuyninta shonquykikunaman Dios Yaya murushqa kaykaptinqa willakuyninta shumaq cäsukuyay. Paypa willakuyninqa salvayäshunaykipaq poderyuqmi. 22Willakuyninta wiyayanqaykillawanqa ama contentakuyaytsu, sinöqa cäsukur kawakuyay. Tsaynö mana kawayaptikiqa yachakuyanqaykipis manakaqllapaqmi kanqa.

23Dios Yayapa willakuyninta wiyaykar mana cäsukuq runaqa qaqllanta espëjuchö rikaykarpis 24aywakur sas qonqaskiqnömi kaykan. 25Peru Dios Yayapa willakuyninta mana qonqar cäsukurmi sïqa espëjuchö rikar qaqllan imanö kanqanta mana qonqaqnö kaykan. Tsaynö kawaqtam Dios Yaya imaykachöpis yanapanqa.

26Mayqaykipis <<Dios Yayamanmi creyikü>> nikar mana allikunata parlarqa manam rasunpatsu creyikuyanki. Tsaynö kayaptikiqa Dios Yayaman creyikuyanqaykipis manakaqllapaqmi. 27Dios Yayaman rasunpa creyikurqa waktsakunata y viüdakunata faltapukuyaptin yanapayanki. Wakin kaqkuna jutsata rurar kawayaptinpis noqantsikqa ama jutsata rurashuntsu.

Currently Selected:

Santiago 1: qxn

Highlight

Copy

Compare