Popular Bible Verses from Santiago 1

Share

Kuyashqa wawqikuna y panikuna, ima ñakaychö karpis llapan shonquykikunawan kushikuyay. Musyayankim imatapis ñakarraq llapan shonquykikunawan Dios Yayaman creyikuyanqaykita.

Mayqaykipis Dios Yaya munanqannö kawakuyta mana puëdirqa tantiyatsishunaykipaq payta mañakuyay. Mañakuyaptikiqa tantiyatsiyäshunkim. Mañakuq kaqtaqa imaypis yanapanmi.

Kuyashqa wawqikuna y panikuna, tsaynö kaykaptinqa yachaq tukur alläpa parlayaytsu, sinöqa wakinpis parlayänanpaq upälla kakuyay. Tsaynölla sasllaqa ama rabyakuyaytsu.

Peru mana ajayaypa creyikurmi Dios Yaya munanqannö kawakuyänaykipaq shumaq yachakuyanki.

Willakuyninta wiyayanqaykillawanqa ama contentakuyaytsu, sinöqa cäsukur kawakuyay. Tsaynö mana kawayaptikiqa yachakuyanqaykipis manakaqllapaqmi kanqa.

Imayka ñakaychö karpis Dios Yayaman mana ajayaypa creyikuq runaqa kushishqam kawakun. Tsaynö creyikurmi Dios Yayapa puntanchö corönata chaskinqa. Tsay corönaqa mana ushakaq kawaymi. Tsay corönata chaskiyänanpaqmi kuyaqnin kaqkunata Dios Yaya prometirqan.

Llapan allikunata chaskiyanqaykiqa atsikyaqkunata kamaq Taytantsikpitam. Payqa manam llantu päsaqnötsu, sinöqa imaypis kanqannöllam kaykan.

Dios Yayapa willakuyninta wiyaykar mana cäsukuq runaqa qaqllanta espëjuchö rikaykarpis aywakur sas qonqaskiqnömi kaykan.

Dios Yayaman rasunpa creyikurqa waktsakunata y viüdakunata faltapukuyaptin yanapayanki. Wakin kaqkuna jutsata rurar kawayaptinpis noqantsikqa ama jutsata rurashuntsu.

Yarpaynikikunaman jutsa ruray shamuptin ama niyaytsu jutsata rurayänaykipaq Dios Yaya yarpätsiyäshunqaykita. Dios Yayaqa manam ni imaypis jutsata rurantsu ni pitapis jutsata rurananpaq yarpätsintsu. Tsaypa rantinqa tsay yarpay kikikipa shonquykikunapita kanqanta tantiyakuyay.

Waktsa wawqikuna y panikuna, Dios Yaya kuyayäshunqaykita kushikuyay.