Isaías 7

Acazta Isaías willanqan

1Jotampa tsurin y Uzíaspa willkan Acaz Judá nacionpa mandakuqnin rey kaykaptinmi Siria nacionpa mandakuqnin rey Rezínwan Israel nacionpa mandakuqnin rey Peka soldädunkunawan aywayarqan Jerusalénta atacayänanpaq. Pekam Remalíaspa tsurin karqan. Peru mayjina atacarpis manam venciyta puëdiyarqantsu. Kaychömi qellqashqa kaykan manaraq atacayaptin imanö kanqan.#2Rey. 16.5; 2Crón. 28.5-8.

2Rey Acaztam ayllunkunatawan willar niyarqan: <<Siria nación runakunam Efraín runakunawan#7.2 Efraín runakunapaq parlarqa norti kaqlächö Israel nación runakunapaqmi parlaykan. Tsaynöllam kaykan versïculu 8 y 9-chöpis. willanakuyashqa atacamänapaq>>.

Tsaynö niyaptinmi rey Acaz y mandakunqan runakunapis mantsakar jachakuna wayrawan kuyuqnöraq tsuktsukyäyarqan.

3Tsaymi Isaíasta Dios Yaya nirqan: <<Wamrayki Sear-jasubta#7.3 Sear-jasub ninanqa wallkalla runakuna kutimunqam ninanmi. pusharkur ayway rey Acazwan tinkunaykipaq. Paywanmi tinkunki jana kaq estanquipita yaku yarqamuq sekyachö. Tsay estanquiqa Taqshakuna Pampaman näni aywaqchömi kaykan.

4<<Tinkuskir reyta ninki: <Siria nacionpa mandakuqnin rey Rezínwan Israel nacionpa mandakuqnin rey Peka qampaq alläpa rabyashqa kayaptinpis ama yarpachakuytsu ni llakikuytsu. Paykunam mayjina rabyarpis mitsushqa tisun qoshniykaqnölla kaykäyan.

5<< <Tsay reykunam ushakätsishunaykipaq willanakur niyashqa: 6<<Judá runakunata atacashun. Venciskir tsay nacionpa mandakuqnin rey kananpaq Tabeelpa tsurinta churashun>>.

7<< <Paykuna tsaynö yarpäyaptinpis poderninchö katsimaqnintsik Dios Yayam nin:

<< <¡Yarpäyanqannöqa manam imay päsanqatsu ni imapis kanqatsu!

8Siria nacionpa capitalninmi Damasco markalla.

Damasco markachö mandakuq reymi Rezínlla.#7.8 Tsaynö nirqan Siria nacionpa mandakuqnin runalla kanqanta y payta Dios Yaya mana yanapanqanta tantiyatsirmi. Tsaynöllam versïculu 9-chö nirqan Efraín niyanqan Israel nacionpaq.

Kananpita soqta chunka pitsqa (65) watachömi Efraín nación jankat ushakanqa.

9Efraín nacionpa capitalninmi Samaria markalla.

Y Samaria markachö mandakuq reymi Remalíaspa tsurinlla.

Ninqäta mana creyirmi qamkunapis ushakäyanki> >>.

Emanuel yurinanpaq willakunqan

10 Dios Yayam mastapis Acazta nirqan: 11<<Ninqäta cumplinäpaq kanqanta musyanaykipaq mañamay juk señalta rikätsinaqpaq. Mañamanqayki señaltam kay patsachöpis ciëluchöpis rikätsishayki>>.

12Tsaymi Acaz nirqan: <<Noqa manam ima señaltapis mañashaqtsu ni Dios Yayata pruëbaman churashaqtsu>>.

13Niptinmi Isaías nirqan: <<Davidpita miraq Acaz, kanan shumaq wiyamay. Llapan mandäsishuqniki castaykikunawan runakunata rabyatsir ¿manaku contentu kayanki? Kananqa ¿Dios Yayatapis rabyatsiytaku munaykäyanki? 14Kananqa kikin Dios Yayam señalta rikätsiyäshunki. Juk doncëlla jipashmi ollqu wamrata qeshyakunqa. Tsay wamrapa shutinmi churanqa Emanuelta.#7.14 Emanuel ninanqa Dios Yaya noqantsikwan kaykan ninanmi. 15Tsay wamraqa yarpayninman manaraq charmi mantequïllatawan abëjapa mishkinllata mikunqa.#7.15 Kay textuchömi nin tsay witsay muchuy kananpaq kanqanta (Isa. 7.22). 16Tsay witsaymi mantsanqayki ishkay reykunapa nacionninkuna ushakäyanqa.

17<<Dios Yaya alläpa ñakaykunata kachamuptinmi qampis, mandakunqayki runakunapis y llapan castaykikunapis alläpa ñakayanki. Efraín runakunawan Judá runakuna rakikäyanqan junaqpita kananyaq manam imaypis runakuna tsaynö ñakayashqatsu. Tsay ñakatsiyäshuqnikiqa Asiria nacionpa mandakuqnin reymi kanqa.

18<<Tsay witsaymi Dios Yaya Egipto runakunata maytsika pawrätanöraq y Asiria runakunata abëjatanöraq kachamunqa. 19Paykuna shamurmi tsunya raqrakunaman, machaykunaman, kasha muntikunaman y wätakuna yakuta upyakuyänan partikunaman churanakuyanqa.

20<<Shayämunanpaqmi Éufrates mayu tsimpanpita Asiria nacionpa mandakuqnin reyta y soldädunkunatapis Dios Yaya contratamunqa. Venciyäshurnikim kawaykar quëdaqkunata alläpa penqakatsirnin aqtsankunata, shaprankunata y penqayninchö shaprankunatapis rutuyanqa.

21<<Tsay witsaymi kawaykar quëdaqkuna juk wäkata y ishkay üshata wätayanqa. 22Runakuna wallkaqlla kayaptinmi lichita upyayänanpaq y mantequïllata mikuyänanpaq paqtanqa. Tsaymi mantequïllatawan abëjapa mishkinta pacha junta mikuyanqa.

23<<Tsaynöllam waranqa (1,000) üva plantaraykaq chakra kaptinpis y waranqa yuraq qellay chaniyuq chakra kaptinpis kashakunallana juntanqa. 24Entëru nación muntillana kaptinmi tsaychöqa flëchawan chucaru wätakunata achkuyanqa. 25Ñawpata lampawan aruyanqan alli chakrakunachöpis kashakunallanam juntanqa. Tsaymi tsaychö muruyanqanatsu, sinöqa wäkakuna y üshakuna mikuyänan jirkakunallanam kanqa>>.

Currently Selected:

Isaías 7: qxn

Highlight

Copy

Compare