Isaías 65
65
Mana cäsukuqkunata castigananpaq ninqan
1Dios Yayam nin:
<<Mana mañakamaqkunatam yanapashkä.
Mana ashimaqkunatam parlapashkä.#Rom. 10.20.
Mana rugakamaqkunatam nishkä: <¡Yanapayänaqpaqmi kaychö kaykä!>
2Mana cäsumaq runakunamanmi waran waran rikräta makyarashkä.
Tsaynö kaykaptïpis kikinkuna munayanqannöllam llutankunata rurar kawaykäyan.#Rom. 10.21.
3Rikänächö mana alli ruraykunata mana dëjarmi alläpa rabyatsiyäman.
Ïdulukunapaq sacrificiutam huertakunachö rupatsiyan.
Tikawan perqashqa altarkunachömi ïdulukunapaq inciensiuta qoshnïtsiyan.
4Wañushqakunapa almankunata tapukurmi panteonkunachö waraypa jamaräyan.
Kuchi aytsatam mikuyan.#Lev. 11.7; Deut. 14.8.
Mana mikuna wätakunapa aytsantam calduyan.
5<<Tsaynö ruraykarmi runa majinkunata niyan:
<¡Qamkunapita mas santum kayä!
¡Ama witipäyämaytsu!
¡Ama yatayämaytsu!>
<<Utsuta waykayaptin qoskiqnömi tsay runakuna jutsata rurarnin rabyatsiyäman.
Mana upiypa nina rupaqnömi mana dëjaypa llutankunata ruraykäyan.
6Paykuna llapan jutsa rurayanqanmi librüchö qellqashqa kaykan.
Mana castigarqa manam dëjashaqtsu.
Llutankunata rurayanqanpitam alli cösa castigashaq.
7Unay castankunanöllam jirkakunachö ïdulukunapaq inciensiuta qoshnïtsiyan.
Lömakunachö ïdulukunata adorarmi rabyatsiyäman.
Tsaymi kikinkunapa jutsankunapita y unay castankunapa jutsankunapita castigashaq.
Según jutsa rurayanqanmanmi castigashaq>>.
Dios Yayam tsaynö nin.
Serviqninkunata salvananpaq ninqan
8 Dios Yayam nin:
<<Juk sartallatapis alli üvata tariykurmi kushishqa niyan:
<Kay üvaqa wayuykanraqmi. Ama mutushuntsu>.
Runakuna niyanqannöllam noqapis jutsa ruraqkunata ushakätsirpis servimaqnïkunata llakipäshaq.
9Tsaymi nacionnïchö täkuyänanpaq Israel runakunapita y Judá runakunapita akrashaq.
Tsay akranqä runakunapa posesionninkunam kay nación kanqa.
Serviqnïkuna karmi kaychö täkuyanqa.
10Noqaman confiakamuq runakunapa üshankuna mitsikuyänanmi Sarón pampapis kanqa.
Acor Pampachöpis paykunapa wäkankunam pärayanqa.#Jos. 7.24-26.
11<<Peru wakikim sïqa dëjayämashkanki.
Sagrädu jirkätapis mananam cäsuyankinatsu.
<Suertita taritsikuq diospaq> nirmi ïdulukunapaq mikuykunatapis churaykäyanki.
<Alli destïnuta taritsikuq diospaq> nirmi vïnutapis wiñapuykäyanki.
12Tsaynö rurayanqaykipitam espädawan wañutsiyäshunaykipaq destinayäshayki.
Qayayaptiqpis manam wiyayämashkankitsu.
Parlapäyaptiqpis manam cäsuyämashkankitsu.
Qamkunam mana munanqä y mana gustämanqan kaqkunata ruraykäyanki>>.#Isa. 66.4; Jer. 7.13.
13Tsaymi Dios Yaya nin:
<<Servimaqnïkunam pacha junta mikuyanqa.
Peru qamkunam sïqa mallaqäyanki.
Servimaqnïkuna upyayänanpaqmi yaku kanqa.
Peru qamkunam sïqa ankakayparaq yakunäyanki.
Servimaqnïkunam kushishqa kawakuyanqa.
Peru qamkunam sïqa penqakuychö kayanki.
14Servimaqnïkunam llapan shonqunkunawan kushikur cantayanqa.
Peru qamkunam sïqa shonqu nanaywan alläpa waqayanki.
15<<Qamkunatam kikï wañutsiyäshayki.
Tsaymi pipis rabyatsiqninta maldicionar ninqa:
<Israel runakunatanömi qamtapis ushakätsishunki>.
Peru servimaqnïkunapaqmi sïqa mushuq shutin churashaq.
16Tsay witsay pipis bendicionta churaq kaqqa shutïchömi bendicionta churanqa.
Tsaynöllam pipis juraq kaqqa shutïchö juranqa.
Unay ñakayanqankunatam qonqayanqa.
Jutsankunapita castiganqätapis mananam yarpäyanqanatsu>>.
Ciëlupis y kay patsapis mushuq kananpaq ninqan
17<<Ciëluta y patsatapis mushuqtanam kamashaq.#Isa. 66.22; 2Ped. 3.13; Apoc. 21.1.
Llapanpis mushuqna kaptinmi unay päsanqankunata pipis yarpanqanatsu.
18Tsaynö kananpaq kaykaptinqa ¡kushikuyay!
Kushikuypaq kananpaqmi mushuq Jerusalénta kamashaq.
Tsaychö täkuqkunam imayyaqpis kushishqa kawakuyanqa.
19Mushuq Jerusalénta rikarmi kikïpis kushikushaq.
Kuyanqä runakuna tsaychö täkuqta rikarmi alläpa kushikushaq.
Tsaychöqa manam imaypis waqayanqanatsu ni llakikuyanqanatsu.#Apoc. 21.4.
20<<Wamrakunapis yuriyanqanpita juk ishkay junaqllata mananam wañuyanqanatsu.
Awkinkunapis alläpa awkinyäyanqanyaqmi kawayanqa.
Pachak (100) watayuq wañuqkunapis jövinllaraq wañuqnömi kayanqa.
Manaraq pachak wataman char wañuqkunapaqmi niyanqa: <Maldicionädu karmi wañun>.
21<<Wajinkuna ruraskirmi kuyanqä runakuna tsaychö täkuyanqa.
Üvata plantarmi wayuyninta mikur kawayanqa.#Jer. 31.5; Amós 9.14.
22Waji rurayanqanchömi juk runakunanatsu täkuyanqa, sinöqa kikinkunanam täkuyanqa.
Üva plantayanqantapis manam juk runakunatsu pallar apayanqa, sinöqa kikinkunam pallayanqa.
Jachakuna atska wata kanqannömi kuyanqä runakunapis atska wata kawayanqa.
Arukuyanqanwanmi akranqä runakuna kushishqa kawakuyanqa.
23Manakaqllapaqqa manam aruyanqatsu.
Wamrankunapis mananam wañuyanqanatsu.
Tsaynömi kayanqa bendicionnïta chaskiq runakunapita miraq kar.
Paykunapita miraqkunapis tsaynöllam bendicionnïta chaskiyanqa.
24<<Manaraqpis mañakayämaptinmi yanapashaq.
Manaraq rugakayämayta ushayaptinmi änishaq.
25Üshawan atuqpis paqtam qewata mikuyanqa.
Leonpis törunömi qewata mikunqa.
Peru culebram sïqa maldicionädu kar allpata mikurlla kawanqa.#Gén. 3.14.
Sagrädu lömächö manam ni pipis mana allikunata rurayanqanatsu>>.#Isa. 11.6-9.
Dios Yayam tsaynö nin.
Currently Selected:
Isaías 65: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
