Popular Bible Verses from Isaías 65

Share

<<Manaraqpis mañakayämaptinmi yanapashaq. Manaraq rugakayämayta ushayaptinmi änishaq.

<<Ciëluta y patsatapis mushuqtanam kamashaq. Llapanpis mushuqna kaptinmi unay päsanqankunata pipis yarpanqanatsu.

Manakaqllapaqqa manam aruyanqatsu. Wamrankunapis mananam wañuyanqanatsu. Tsaynömi kayanqa bendicionnïta chaskiq runakunapita miraq kar. Paykunapita miraqkunapis tsaynöllam bendicionnïta chaskiyanqa.

Waji rurayanqanchömi juk runakunanatsu täkuyanqa, sinöqa kikinkunanam täkuyanqa. Üva plantayanqantapis manam juk runakunatsu pallar apayanqa, sinöqa kikinkunam pallayanqa. Jachakuna atska wata kanqannömi kuyanqä runakunapis atska wata kawayanqa. Arukuyanqanwanmi akranqä runakuna kushishqa kawakuyanqa.

<<Wamrakunapis yuriyanqanpita juk ishkay junaqllata mananam wañuyanqanatsu. Awkinkunapis alläpa awkinyäyanqanyaqmi kawayanqa. Pachak (100) watayuq wañuqkunapis jövinllaraq wañuqnömi kayanqa. Manaraq pachak wataman char wañuqkunapaqmi niyanqa: <Maldicionädu karmi wañun>.

Üshawan atuqpis paqtam qewata mikuyanqa. Leonpis törunömi qewata mikunqa. Peru culebram sïqa maldicionädu kar allpata mikurlla kawanqa. Sagrädu lömächö manam ni pipis mana allikunata rurayanqanatsu>>. DIOS YAYAM tsaynö nin.

Mushuq Jerusalénta rikarmi kikïpis kushikushaq. Kuyanqä runakuna tsaychö täkuqta rikarmi alläpa kushikushaq. Tsaychöqa manam imaypis waqayanqanatsu ni llakikuyanqanatsu.